مەملەكەتتىك كەڭەسشى ەرلان قارين تەلەگرامداعى رەسمي پاراقشاسىندا ەلدەگى ساياسي احۋالعا قاتىستى پىكىر ءبىلدىردى. وندا مەملەكەت باسشىسى قاسىم-جومارت توقاەۆتىڭ سايلاۋالدى باعدارلامالارىندا ايتىلعان ماسەلەلەر ورىندالىپ جاتقانىن اتاپ ءوتتى. سونداي-اق پرەزيدەنتكە حالىقتىڭ سەنىمى جوعارى ەكەنىنە توقتالدى.
«وسىدان ءبىر جىل بۇرىن وتكەن كەزەكتەن تىس پرەزيدەنت سايلاۋىندا قاسىم-جومارت توقاەۆقا سايلاۋشىلاردىڭ 80 پايىزى داۋىس بەردى. بۇل كورسەتكىش حالىقتىڭ پرەزيدەنتكە سەنىمى جوعارى ەكەنىن ايقىن اڭعارتتى. مەملەكەت باسشىسى 2019 جىلى جۇزەگە اسىرا باستاعان اۋقىمدى ءارى جان-جاقتى رەفورمالار ول قايتا سايلانعاننان كەيىن دە دايەكتى تۇردە جالعاسىن تاپتى. پرەزيدەنت سايلاۋى جاڭا ساياسي ناۋقاندار كەزەڭىنە جول اشتى. ناتيجەسىندە, پارلامەنتتىڭ قوس پالاتاسىنىڭ جانە ءماسليحات سايلاۋى ءوتىپ, ولاردىڭ قۇرامى ەداۋىر جاڭاردى», دەپ جازدى ە.قارين.
سونىمەن قاتار ول ەكى اپتا بۇرىن ەلىمىزدە العاش رەت اۋدان جانە وبلىستىق ماڭىزى بار قالا اكىمدەرىنىڭ سايلاۋى وتكەنىنە توقتالعان. وسىلايشا, ەلىمىزدىڭ ساياسي جۇيەسىن دەموكراتيالىق جولمەن وزگەرتۋ ۇدەرىسى ۇزدىكسىز جالعاسىپ كەلەدى.
«پرەزيدەنت قاسىم-جومارت توقاەۆتىڭ ستراتەگيالىق باعدارى قازاقستان قوعامىنىڭ بارلىق سالاسىن قاناتتاستىرا رەفورمالاۋعا باعىتتالعان. سوندىقتان پرەزيدەنت ءوزىنىڭ قىركۇيەكتەگى جولداۋىندا ەلىمىز جاڭا ەكونوميكالىق مودەلگە كوشەتىنىن جاريالادى. بۇل قادام ەكونوميكانى ودان ءارى مونوپولياسىزداندىرۋ مەن ءارتاراپتاندىرۋدى, ونەركاسىپتى, اۋىل شارۋاشىلىعىن, كولىك پەن لوگيستيكانى, قارجى سالاسىن دامىتۋدى, شاعىن جانە ورتا بيزنەسكە جۇيەلى قولداۋ كورسەتۋدى كوزدەيدى.
ساياسي جانە ەكونوميكالىق رەفورمالارمەن قاتار الەۋمەتتىك-گۋمانيتارلىق سالادا دا ماڭىزدى رەفورمالار جۇزەگە اسىرىلادى. ونداعى ماقسات – ءبىلىم بەرۋ, عىلىم جانە مادەنيەت سالاسىن دامىتۋ ارقىلى ۇلتتىڭ جاڭا ساپاسىن قالىپتاستىرۋ», دەدى ە.قارين.
مەملەكەتتىك كەڭەسشىنىڭ سوزىنە سۇيەنسەك, پرەزيدەنتتىڭ سايلاۋ الدىنداعى تۇعىرناماسىندا ايتىلعان نەگىزگى باستامالار بيىل جۇزەگە اسىرىلا باستاعان. ونىڭ قاتارىندا «ۇلتتىق قور – بالالارعا» جوباسى, «اۋىل اماناتى» باعدارلاماسى, زاڭسىز جولمەن الىنعان جانە شەتەلگە شىعارىلعان اكتيۆتەردى ەلگە قايتارۋ سياقتى باستامالار بار. «جالپى, پرەزيدەنت ستراتەگياسىنىڭ بارلىق باعىتى – ساياسات, ەكونوميكا جانە يدەولوگيا ۇشەۋى بىرىككەندە ەلىمىزدى جۇيەلى تۇردە جاڭعىرتۋدى كوزدەيتىن ءبىرتۇتاس باعدارلامانى قۇرايدى», دەيدى مەملەكەتتىك كەڭەسشى.