جۋىردا پەتروپاۆلداعى «Digital Urpaq» وقۋشىلار سارايىندا «مەن سەنىڭ ءومىرىڭنىڭ جالعاسىمىن...» اتتى وبلىستىق اكەلەر فورۋمى ءوتتى. مۇنى «سەنىمەن بولاشاق» اتتى رەسپۋبليكالىق قوعامدىق بىرلەستىگىنىڭ وبلىستىق فيليالى مەن «قازاق ءتىلى» قوعامى ۇيىمداستىردى.
فورۋمدا بالا تاربيەسىندەگى اكەنىڭ ءرولى تۋرالى اڭگىمەلەر مەن پىكىرلەر ورتاعا سالىندى. «اربانىڭ الدىڭعى دوڭعالاعى قايدا جۇرسە, سوڭعىسى سوندا جۇرەدى» دەگەندەي, اكەنىڭ مىنەزى, داعدىسى بالا بويىنا سىڭىرىلەتىنى تۋرالى دالەلدەر ايتىلدى.
«ەگەر اكە مادەنيەتتى بولىپ, ءوزىن رۋحاني باي تۇلعا رەتىندە كورسەتە بىلسە, بالانىڭ بويىنا دا سول ۇلگى ەگىلەدى. سىرتقى كۇش پەن ورتانىڭ اسەرى قانشا كۇشتى بولسا دا, بالا الدىمەن ءوزى جاقسى كورەتىن اكەنىڭ قاسيەتىن بويىنا ەرىكسىز سىڭىرەدى», دەدى فورۋمدا ءسوز سويلەگەن بايىرعى ۇستاز, قالالىق اقساقالدار القاسىنىڭ توراعاسى جانگەلدى ءتاجين.
جالپى, جيىننىڭ ماقساتى – قوعامدا اتا-انانىڭ, اكەنىڭ بەدەلى مەن بەلسەندىلىگىن ارتتىرۋ, بالا تاربيەسىندەگى ءرولىن كۇشەيتۋ, وتباسى قۇندىلىقتارىن ناسيحاتتاۋ, بالا قۇقىعى, ءبىلىمى, دەنساۋلىعى, قاۋىپسىزدىگى سياقتى وزەكتى ماسەلەلەردى تالقىلاۋ. جيىندا وبلىستىق ءبىلىم باسقارماسىنىڭ باسشىسى ءنازىر جاشىبەكوۆ, «سەنىمەن بولاشاق» رقب قۇرىلتايشىسى نۇركەن اسانوۆ, ارداگەر ۇستاز, م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ پسيحولوگيالىق قىزمەتىنىڭ باسشىسى پاۆەل مويسەەۆ, اكەلەر وداعى وبلىستىق فيليالىنىڭ توراعاسى ەۆگەني ماكسيموۆ, ۇلتتىق ۇلان اكادەمياسىنىڭ مورالدىق-پسيحولوگيالىق قامتاماسىز ەتۋ تسيكلىنىڭ باستىعى, پولكوۆنيك ارحات تاتتىمبەتوۆ قاتىسىپ, ءسوز سويلەدى. سونىمەن بىرگە بەلسەندى اكەلەر, وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەلەرى, وبلىستىق ءبىلىم بەرۋ ۇيىمدارىنىڭ اتا-انالار كوميتەتى مەن قامقورشىلىق كەڭەس مۇشەلەرى, پسيحولوگتەر مەن پەداگوگتەر, زاڭگەرلەر, باق وكىلدەرى بولدى. وبلىستىق ارداگەرلەر ۇيىمىنىڭ توراعاسى ەسكەندىر ەلەۋسىزوۆ تە بالا تاربيەسىندەگى اكەلەر رولىنە توقتالىپ ءوتتى.
بىلتىر «سەنىمەن بولاشاق» رقب وبلىستىق ءبىلىم باسقارماسىمەن ىنتىماقتاستىق تۋرالى مەموراندۋمعا قول قويعان ەدى. فورۋم وسى ىنتىماقتاستىق جۇمىستار اياسىندا بىرلەسىپ وتكىزىلدى. ءىس-شارانىڭ ەكىنشى بولىمىندە جاس اكەلەرگە ارنالعان سەمينار-ترەنينگ ۇيىمداستىرىلدى. وبلىستاعى بىلىكتى پسيحولوگ ماماندار «بالانىڭ ومىرىندەگى – اكە: ونىڭ ءرولى مەن اسەرى» اتتى سەكتسيادا ءبولىنىپ ءدارىس وقىدى. ءىس-شارانى «قازاق ءتىلى» قوعامى وبلىستىق فيليالىنىڭ توراعاسى جانات مۇحامەدجانوۆ اشىپ, جۇرگىزىپ وتىردى. جيىن بارىسىندا قالاداعى ەرمەك سەركەباەۆ اتىنداعى دارىندى بالالارعا ارنالعان مەكتەپ پەن وبلىستىق فيلارمونيانىڭ ونەرپازدارى مۋزىكالىق قولداۋلار كورسەتتى. وسىنىڭ ءوزى جايشىلىقتا تەك ءسوز ايتىلاتىن قالىپتى كونفەرەنتسيالاردان ەرەكشە بولىپ, تىڭدارمانداردى شارشاتپاي, سەرگەك وتىرۋىنا سەپ بولدى. ءىس-شاراعا وبلىستىڭ قوعام بەلسەندىلەرى, قالا مەكتەپتەرىنىڭ مۇعالىمدەرى, ۋنيۆەرسيتەت پەن كوللەدج وقىتۋشىلارى, اتا-انالار, ستۋدەنتتەر مەن وقۋشىلار قاتىستى.
پەتروپاۆل