تسيفرلى اقشا سىناقتان ءوتتى

قارجىگەرلەر كونگرەسىنىڭ جۇمىسىنا قاتىسقان ۇلتتىق بانك توراعاسى تيمۋر سۇلەيمەنوۆ قازاقستاندا سەنىمدى قارجى­لىق ينفراقۇرىلىم مەن نارىقتىق ەكونوميكاعا بەيىمدەلگەن بانك جۇيەسى قۇرىلعانىن ايتىپ ءوتتى. باس بانكير اتاپ وتكەندەي, اقشانىڭ جاڭا ءتۇرى – تسيفر­لى تەڭگەنىڭ قولدانىسقا ەنۋى تەڭگە تاري­حى­نىڭ جاڭا كەزەڭىنە جول اشادى. «بۇگىن ۇلتتىق ۆاليۋتامىزدىڭ 30 جىلدىق مەرەيتويى كۇنى اقشانىڭ ءۇشىنشى نىسانى – تسيفرلى تەڭگە ىسكە قوسىلدى. ءبىزدىڭ ويىمىزشا, بۇل – قارجىلىق جۇيەمىزدى كەزەڭ-كەزەڭىمەن وزگەرتۋگە مۇمكىندىك بەرەتىن تاريحي وقي­عا. بۇل لەزدىك ەلەكتروندىق تولەمدەر, ونىڭ ىشىندە ينتەرنەت جەلىسىنە قول جەتكىزبەستەن-اق جۇزەگە اسىرىلادى», دەپ اتاپ ءوتتى تيمۋر سۇلەيمەنوۆ.

 جاڭا جۇيەنىڭ ارتىقشىلىعى, 100% تۇراقتىلىقتى قامتاماسىز ەتەتىن بلوكچەين جۇيەسىمەن تولىقتاي بىرىكتىرىلگەن.

قىسقاسى, تست بيىلعى كونگرەستىڭ باس­تى تاقىرىبى بولدى.

تسيفرلى تەڭگەنىڭ تانىستىرىلى­مىندا ۇلتتىق بانك (ۇب) وكىلدەرى كوممەر­تسيا­لىق بانكتەر كليەنتتەردىڭ شوتتا­رىنا تسيفرلى ۆاليۋتانى اۋداردى. سودان كەيىن تسيفرلى تەڭگەنىڭ كومەگىمەن العاشقى ناقتى بولشەك ساۋدا دا جاسالدى. ۇلتتىق بانك ۇلتتىق تولەم كورپو­را­تسياسىنىڭ توراعاسى بينۇر جالەنوۆتىڭ ايتۋىنشا, كەيىنگى بەس جىلدا قولما-قول اقشاسىز تولەمدەر ۇلەسى 16 ەسە ءوسىپتى. تسيفرلى تەڭگەنى «ەۋرازيالىق بانك», «حالىق بانكى», «بانك تسەنتر كرەديت» جانە «Altyn bank» قوسىمشالار ارقىلى قولدانۋعا, قولما-قول اقشاعا الەمنىڭ كەز كەلگەن نۇكتەسىندە اۋدارۋعا بولادى. سونىمەن قاتار الەۋمەتتىك كارتا, «وڭاي» كارتاسىمەن ينتەگراتسيالانادى.

بۇل فاكتور تۇتىنۋشىلارىمىزدىڭ زاڭدى تۇردە الەمدەگى ەڭ وزىق جانە يننوۆاتسيالىق ونىمدەردى قابىلداۋعا دايىن ەكەنىن تاعى دا دالەلدەپ تۇر. ۇب وكىلى ءبىرىنشى كەزەكتە تەحنولوگيالاردان ابستراكتسيالاۋعا جانە تسيفرلىق ەكونوميكادا تولەم قۇرالى سايكەس كەلۋى كەرەك نەگىزگى كريتەريلەر مەن قاعيداتتاردى تۇجىرىمداۋعا تىرىسقانىن دا قاپەرگە سالىپ ءوتتى. ونىڭ ايتۋىنشا, جەكە قارا­جات­تىڭ سەنىمدىلىگى, قولجەتىمدىلىگى, قاۋىپسىزدىگى وزەكتى بولىپ قالا بەرە­دى. تسيفرلى تەڭگە – قولما-قول جانە قولما-قول اقشاسىز اقشادان باسقا تو­لەم­نىڭ ءۇشىنشى ءتۇرى. بۇل ولاردىڭ قا­سيەت­تەرىن بىرىكتىرەدى. «تست-مەن ينتەر­نەتكە قوسىلماي-اق وفلاين تولەي الاسىز. سونداي-اق قاراپايىم بانكتىك قوسىمشالاردا تسيفرلى تەڭگەنى ونلاين تۇردە جۇمساي الاسىز», دەيدى ب. جالەنوۆ.

ب.جالەنوۆتىڭ ايتۋىنشا, ۇلتتىق بانكتىڭ تسيفرلىق ۇلتتىق ۆاليۋتالارداعى ترانسشەكارالىق تولەمدەرگە ارنالعان «SWIFT» پلاتفورماسىن تەستىلەۋگە قاتى­ساتىن الەمدەگى العاشقى ءۇش ورتالىق بانكتىڭ تىزىمىندە تۇر. كەلەر جىل تست وفلاين تولەمدەردە قولدانىلسا, 2025 جىلى نارىقتىڭ بارلىق سەگمەنتى ءۇشىن قولجەتىمدى بولادى.

تسيفرلى ۆاليۋتانى ەنگىزۋدەگى ال­عاشقى قاناتقاقتى جوبا 2021 جىلى ازىرلەنىپ, ونىڭ العاشقى ناتيجەلەرى قارجىگەرلەردىڭ IX كونگرەسىندە ۇسىنىلدى. ەكى جىلدان كەيىن سالا ما­مان­دارىنا حالىقارالىق تولەم جۇيە­لەرىمەن ۇيلەسىمدى تسيفرلى تەڭگە تو­لەم كارتاسىنىڭ جوباسى دايىندالىپ جات­قانىن ايتتى.

كەشەگى وتكەن كونگرەستەگى ەكىنشى جاڭالىقتى قازاقستان ۇلتتىق بانكىنىڭ بانكنوتتار مەن مونەتالار ديزاينى باسقارماسىنىڭ باس ديزاينەرى سانجار نۇرقاسىموۆ جەتكىزدى.

جاڭا ديزاين «ساق ءستيلى» ەلەمەنتتەرىنە نەگىزدەل­گەن جانە كوشپەلىلەردىڭ بىرەگەي مادەنيەتىنەن باستاپ بۇگىنگى قازاقستانعا دەيىنگى ەل مۇراسىن بەينەلەيدى. «جاڭا بانكنوتتار سەرياسى دايىن بولعان كەزدە اينالىمعا ەنەدى. نومينالى 5 000 تەڭگەلىك جاڭا ديزاين ۇلگىسىندەگى العاشقى بانكنوتتار وسى جىلدىڭ سوڭىنا دەيىن قولدانىسقا شىعادى. حالىقارالىق تا­جىريبەگە سايكەس بانكنوتتاردىڭ ديزاينى جالعان اقشا جاساۋعا جول بەرمەۋ جانە ونىڭ الدىن الۋ ءۇشىن جەتىلدىرىلگەن قورعانىش قابىلەتىن ەنگىزۋ ماقساتىندا كەزەڭ-كەزەڭىمەن جاڭارتىلىپ وتىرادى», دەيدى س.نۇرقاسىموۆ.