اقمولا وبلىستىق ادەبيەت جانە ونەر مۋزەيى الەۋمەتتىك جەلىگە سول مۋزەي قورىنداعى ارقاداعى سال-سەرىلەر ءداستۇرىن جالعاستىرعان ايگىلى ءانشى, حالىق اقىنى مولداحمەت تىربيەۆتىڭ كيگەن بوركى تۋرالى قۇندى دەرەكتى جاريالادى.
مۋزەيدىڭ اعا عىلىمي قىزمەتكەرى گۇلزايرا ءسابيتوۆانىڭ جازۋىنشا, بۇل جادىگەردى مۇراجايدىڭ سول كەزدەگى عىلىمي قىزمەتكەرى اقىن, سازگەر كارىم ىلياستەگى تاپسىرعان. بورىكتىڭ توبەسى ءتورت ساي بولىپ كەلەدى. اراسىنا ءجۇن سالىپ, توبەسىن سۇر ءتۇستى ماتامەن قاپتاعان. جيەگى پۇشپاق تەرىمەن كومكەرىلگەن.
حالىق اقىنى مولداحمەت تىربيەۆتىڭ ەسىمى كوزىقاراقتى قاۋىمعا تانىس. ول 1881 جىلى قازىرگى سولتۇستىك قازاقستان وبلىسىنىڭ شال اقىن اۋدانى تۋلاق اۋىلىندا تۋعان. بۇل اۋىل كەڭەس داۋىرىندە «قىزىلتۋ» كەڭشارى, كەيىن «ەڭبەك» اۋىلى دەپ اتالعان. مولداحمەت اتامىز – اتاقتى اقىن, ءانشى ۇكىلى ىبىرايدىڭ تۋعان جيەنى عانا ەمەس, ونەرىن قۋعان شاكىرتى. سونداي-اق كورنەكتى اقىن كاكىمبەك سالىقوۆتىڭ نەمەرە تۋىسقانى.
مولدەكەڭ كاكىمبەكتى بالا كۇنىنەن ونەرگە باۋلىپ, دومبىرا ۇيرەتەدى. ءتالىم -تاربيەسىن بەرەدى. كاكىمبەك اعامىز اتاسى تۋرالى ءبىر ەستەلىگىندە: «مولدەكەڭ مولدا دا, بولىس تا بولعان ايگىلى اقىن, سۋىرىپ سالما ايتىسكەر ءھام ۇزدىك ءانشى, تاماشا دومبىراشى. ولەڭ ۇيرەتۋدەگى ءتاسىلى – ءاۋ دەگەننەن بارىمىزگە ولەڭنىڭ ءسوزىن جازدىرادى, سودان سوڭ ءوزى ادەمىلەپ تۇرىپ ءۇش رەت ايتىپ بەرەدى. ال ءارى قاراي كادىمگى بايقاۋ وتكىزەتىن پروفەسسور سياقتى ءبارىمىزدى تىڭدايتىن, ەڭ جاقسى ايتقانىمىزدى الىپ قالىپ, وڭاشا ۇيرەتەتىن», دەپ جازىپتى.
م.تىربيەۆتىڭ جاناق, ورىنباي, ءبىرجان سال, اقان سەرى, جاياۋ مۇسا, بالۋان شولاق, ۇكىلى ىبىراي سەكىلدى ارقاداعى اقىن-جىرشىلار مەن سال-سەرىلەردىڭ ءداستۇرىن جالعاستىرىپ, سولاردىڭ شىعارمالارىن كەيىنگى ۇرپاققا جەتكىزۋدەگى ەڭبەگى وتە زور. سونىمەن بىرگە ايتىس ونەرىنىڭ دە دامۋىنا زور ۇلەس قوستى. اقىننىڭ ءوزى دە ولەڭ جازىپ, ءان شىعارعان. ونىڭ «جەڭىس» جانە «تەرمە» اتتى اندەرى كەزىندە حالىق اراسىنا كەڭ تاراعان.