ءتول تەڭگە – ەلدىكتىڭ نىشانى

ءوز ۆاليۋتامىزبەن ەسەپ ايىرىسۋ­دىڭ قانشالىقتى ماڭىزدى ەكەنىن كەيىنگى بۋىن تۇسىنە جاتار, ال ورتا جانە اعا بۋىن ۇلتتىق قۇندىلىقتار كورىنىس تاپقان دەربەس ۆاليۋتانىڭ قادىر-قاسيەتىن انىق بىلەدى. كوپكە ءمالىم دەسەك تە, كەيبىر دەرەكتەردى وقىرمان ەسىنە سالىپ ءوتۋدىڭ ارتىعى بولماس. ۇلتتىق ۆاليۋتانى اينالىمعا ەنگىزۋ جونىندەگى مەملەكەتتىك كوميسسيا 1993 جىلى 3 قاراشادا قۇرىلدى. 1993 جىلى 12 قاراشادا پرەزيدەنت «قازاقستان رەسپۋبليكاسىنىڭ ۇلتتىق ۆاليۋتاسىن اينالىمعا ەنگىزۋ تۋرالى» جارلىققا قول قويدى. ال 15 قاراشادان باستاپ تەڭگە ەلىمىزدەگى جاڭا اقشا بىرلىگىنە اينالدى. كوپ ۇزاماي, ياعني 1995 جىلى 19 مامىردا ەلىمىزدە بانكنوت فابريكاسى رەسمي تۇردە اشىلدى. ۇلتتىق بانك دەرەگى بو­يىنشا, سول جىلى 83 ميلليوننان اسا, ءبىر جىلدان كەيىن 104 ميلليوننان اسا بانكنوت شىقتى. ال مونەتا سارايى ونىڭ الدىندا, 1992 جىلى وسكەمەن قالاسىنداعى ءۇلبى مەتاللۋرگيا زاۋىتىنىڭ بازاسىندا قۇرىلعان ەدى.

تەڭگە ارقىلى قىز-قىز قايناپ جاتاتىن بانك سەكتورى دا 90-جىلداردان بەرى تالاي باسپالداق­تان ءوتتى. ەسەيدى. ەڭسە تىكتەدى. سان ءتۇرلى تۇيتكىلدىڭ كۇرمەۋىن تارقاتقان بانك سالاسى تاۋەكەلدەرگە ءتوزىمدى بولۋدى دا ۇيرەندى. بىرقاتار رەفورما جۇرگىزىلدى. مەملەكەت تاراپىنان بانكتەردى ساۋىق­تىرۋ دا جۇزەگە اسىرىلدى. مۇنىڭ ارتىعى مەن كەمىن ساراپشىلار تالاي تارازىعا تارتتى دا. ەڭ باس­تىسى, تەڭگە مەن بانك سەكتورى قايتسە نارىقتىق سىن-قاتەرلەرگە قارسى تۇرا الادى دەگەن ساۋالدارعا جاۋاپ تابا باستادىق. بۇل ءبىزدىڭ جاڭار­عانىمىزدىڭ, جەتىلگەنىمىزدىڭ بەلگىسى ەدى.