تاۋەلسىزدىك جىلدارى قيىندىعى مەن قۋانىشى قاتار ورىلگەن جاڭاتاس قالاسىنىڭ ءبىر قاۋىم جۇرتى تاياۋدا جاڭا پاتەردىڭ كىلتىنە الىپ, مارە-سارە كۇي كەشتى. اۋدان ورتالىعىندا ەكى بولمەلى – 44, ءۇش بولمەلى – 8, ءتورت بولمەلى 4 پاتەرى بار تۇرعىن ءۇي پايدالانۋعا بەرىلدى.
جاڭاتاس قالاسىنداعى 1-ىقشام اۋداندا ورنالاسقان №60 ۇيگە قونىستانعان جەرگىلىكتى حالىقتى ءوڭىر باسشىسى ەربول قاراشوكەەۆ ارنايى قۇتتىقتاي بارىپ, تۇرعىنداردىڭ قۋانىشىنا ورتاقتاستى. ءىس-شارا بارىسىندا ءسوز العان وبلىس اكىمى ءوڭىر حالقىن باسپانامەن قامتاماسىز ەتۋ باعىتىندا اتقارىلىپ جاتقان جۇمىستار جايىندا ءسوز قوزعادى.
«مەملەكەتتىڭ باسىم باعىتتارىنىڭ ءبىرى – باسپانا ماسەلەسىن شەشۋ.
حالىقتى تۇرعىن ۇيمەن قامتۋ ساياساتى مەملەكەت باسشىسى قاسىم-جومارت توقاەۆتىڭ نازارىندا تۇرعانى بارشامىزعا ءمالىم. سوندىقتان بۇل باعىتتا قولعا الىنعان جۇمىستىڭ ماڭىزى زور. حالىقتى باسپانامەن قامتۋ ءوڭىردىڭ ەكونوميكالىق جاعدايىن جاقسارتۋعا جانە حالىقتىڭ تۇرمىستىق ماسەلەسىن شەشۋگە سەپتىگىن تيگىزەرى انىق. ءبىز پاتەر كەزەگىندە تۇرعان وبلىس تۇرعىندارىنىڭ سانىن ازايتۋ ماقساتىندا جىل سايىن تۇرعىن ءۇي قۇرىلىسىنىڭ كولەمىن ۇلعايتىپ وتىرمىز. ماسەلەن, وتكەن جىلى پايدالانۋعا بەرىلگەن تۇرعىن ءۇيدىڭ جالپى كولەمى 693,5 مىڭ شارشى مەتردى قۇراپ, 2021 جىلمەن سالىستىرعاندا 1,5 پايىزعا ارتتى. ال بيىل وبلىس بويىنشا 698,7 مىڭ شارشى مەتر تۇرعىن ءۇي بەرۋدى كوزدەپ وتىرمىز. 2022 جىلى 28 تۇرعىن ءۇي پايدالانۋعا بەرىلسە, وسى جىلى 41 تۇرعىن ءۇي پايدالانۋعا بەرىلمەك. سونىمەن قاتار رەسپۋبليكالىق بيۋدجەتتەن 7,6 ملرد تەڭگەگە تۇرعىن ءۇي كەزەگىندە تۇرعان الەۋمەتتىك وسال توپتار مەن كوپبالالى وتباسىلار ساناتىنا 797 پاتەر ساتىپ الۋ جوسپارلانعان», دەيدى ە.قاراشوكەەۆ.
ءوڭىر باسشىسى كەلتىرگەن دەرەككە سەنسەك, اۋدان ورتالىعىندا 1 638 ازامات پاتەر كەزەگىندە تۇر. ولاردىڭ ماسەلەسىن شەشۋ بويىنشا جەرگىلىكتى اتقارۋشى بيلىككە ناقتى تاپسىرما جۇكتەلگەن. وسى جىلدىڭ وزىندە جاڭاتاس قالاسىندا جاڭعىرتۋدان وتكەن 160 پاتەرلى ءۇش ءۇيدى ساتىپ الىپ, جەرگىلىكتى جۇرتتىڭ يگىلىگىنە بەرۋ كوزدەلىپ وتىر.
جامبىل وبلىسى,
سارىسۋ اۋدانى