پرەمەر-ءمينيستردىڭ ورىنباسارى سەرىك جۇمانعاريننىڭ توراعالىعىمەن وتكەن كەڭەستە جىلىجاي شارۋاشىلىقتارىنا مەملەكەتتىك قولداۋ شارالارىنىڭ ناتيجەلەرى قارالدى.
بيىل العاش رەت سۋبسيديالاۋدىڭ جالپى ەرەجەلەرىنە فەرمەرلىك جىلىجايلارعا سۋبسيديا الۋعا مۇمكىندىك بەرەتىن نورما ەنگىزىلدى. ەندى جىلىجايلار ورنالاسقان وبلىس اكىمدىكتەرى ءتيىستى وكىمدەردى قابىلداپ, سۋبسيديا مولشەرىن بەلگىلەۋگە ءتيىس. اۋىل شارۋاشىلىعى مينيسترلىگىنىڭ مالىمەتىنشە, قازىرگى تاڭدا ەكى ءوڭىر عانا بۇل جۇمىستى جۇرگىزىپ جاتىر. ولار – شىمكەنت پەن تۇركىستان وبلىسى. ونىڭ ىشىندە تۇركىستان ءوڭىرى ونەركاسىپتىك جىلىجايلار ءۇشىن – 8,1 ملن تەڭگە/گا, فەرمەرلىك جىلىجايلار ءۇشىن – 4,8 ملن تەڭگە/گا. شىمكەنت بيىل 20 قاراشاعا دەيىن نورماتيۆتەر بويىنشا بۇيرىق شىعارۋدى جوسپارلاپ وتىر.
«جىلىجاي شارۋاشىلىعىن دامىتۋ ءۇشىن مەملەكەت كەلەسى قولداۋ شارالارىن كورسەتۋدە: ينۆەستيتسيالىق سۋبسيديالار اياسىندا جىلىجاي كەشەندەرىن سالۋ جانە كەڭەيتۋ جوبالارىن ىسكە اسىرۋ كەزىندە شىعىنداردىڭ 25%-ىن, تامشىلاتىپ سۋارۋ جۇيەسىن قۇرۋ جانە كەڭەيتۋ كەزىندە 50%-ىن وتەۋ كوزدەلگەن», دەپ حابارلادى اۋىل شارۋاشىلىعى ۆيتسە-ءمينيسترى ازات سۇلتانوۆ.
ۇلتتىق اككرەديتتەۋ ورتالىعىنىڭ مالىمەتى بويىنشا فەرمەرلىك جىلىجاي شارۋاشىلىقتارىنىڭ تاعى 142 ءوتىنىمى – ينسپەكتسيا ورگاندارىنىڭ قاراۋىندا.
كەڭەس قورىتىندىسى بويىنشا سەرىك جۇمانعارين اكىمدىكتەر مەن باقىلاۋشى مەملەكەتتىك ورگاندارعا كوكونىستەردى جابىق توپىراققا وتىرعىزۋ الدىندا جىلىجايلارعا ۋاقتىلى كومىر جەتكىزۋدى باقىلاۋعا الۋدى تاپسىردى.
«جىلىجايلار مەن كوكونىس قويمالارى – اۋىل شارۋاشىلىعى ينفراقۇرىلىمىنىڭ ماڭىزدى ەلەمەنتتەرىنىڭ ءبىرى. ءبىز ءبىرىنشى كەزەكتە ازىق-ت ۇلىك قاۋىپسىزدىگى اياسىندا ەلىمىزگە قاجەتتى داقىلداردى وسىرەتىن شارۋاشىلىقتارعا مەملەكەتتىك قولداۋ شارالارىن كورسەتۋىمىز كەرەك. مىسالى, ول داقىلداردىڭ قاتارىندا قىزاناق پەن قيار بار. بارلىق وڭىرگە قولدا بار جىلىجايلاردىڭ ەسەبىن جۇرگىزىپ, ءبىز ءۇشىن باسىم داقىلداردى وسىرەتىندەرگە قولداۋ كورسەتۋدى قامتاماسىز ەتۋ قاجەت», دەپ اتاپ ءوتتى ۆيتسە-پرەمەر.
جىلىجاي الاڭدارىنىڭ نەگىزگى بولىگى ورنالاسقان: تۇركىستان وبلىسىندا – 824,2 گا, الماتى وبلىسىندا – 79 گا, جامبىل وبلىسىندا – 23,2 گا, ماڭعىستاۋ وبلىسىندا – 15,5 گا, قاراعاندى وبلىسىندا – 43 گا, اقتوبە وبلىسىندا – 38 گا, اتىراۋ وبلىسىندا – 15,6 گا, شىمكەنت قالاسىندا – 139,2 گا جانە الماتى قالاسىندا – 11,1 گا.