استانادا دزيۋدودان كەزەكتى ەل چەمپيوناتى ءوتىپ جاتىر. بۇل تۋرنيردە 17 ءوڭىر جانە 3 قالادان 463 سپورتشى باق سىناپ جاتىر, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
بىرىنشىلىكتىڭ اشىلۋ سالتاناتىنا قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەەۆ, استانا قالاسىنىڭ دەنە شىنىقتىرۋ جانە سپورت باسقارماسى باسشىسى سامات جىلقىباەۆ, سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ قاتىستى.
«مەملەكەت باسشىسىنىڭ «وتاندىق سپورتتا ءادىل باسەكەلەستىك قاعيداتىن ورناتۋ» تۋرالى تاپسىرماسىنا سايكەس, بۇگىنگى چەمپيوناتقا شەتەلدەن 3 تاۋەلسىز تورەشى شاقىرتىلدى. قازىرگى تاڭدا ەلىمىزدە دزيۋدومەن 133 مىڭعا جۋىق ادام تۇراقتى تۇردە اينالىسادى. سونىڭ ناتيجەسىندە ەل سپورتشىلارى حالىقارالىق ءدۇبىرلى دودالاردا توپ جارىپ, ۇلت ابىرويىن اسقاقتاتىپ ءجۇر. ولار وسكەلەڭ ۇرپاققا ۇلگى-ونەگە بولىپ, جاستاردى جارقىن جەڭىستەرگە جەتەلەيدى», دەدى جارىستىڭ اشىلۋ سالتاناتىندا ەربول مىرزابوسىنوۆ.
بۇگىنگى جارىس كۇنىنىڭ ناتيجەسى بويىنشا ەرلەر جانە ايەلدەر اراسىندا 5 سالماقتا جەڭىمپازدار انىقتالادى.
ايتا كەتەيىك, چەمپيوناتتىڭ قورىتىندىسى بويىنشا 2024 جىلعا دزيۋدودان ۇلتتىق قۇراما جاساقتالادى. جارىس جاقسىلىق ۇشكەمپىروۆ اتىنداعى جەكپە-جەك سارايىندا 15 قاراشاعا دەيىن جالعاسادى.