تۇركى الەمى ارحەولوگيالىق عىلىمي-زەرتتەۋ ينستيتۋتتارى مەن ورتالىقتارىنىڭ قاۋىمداستىعى (ARICA) قۇرىلدى. 9-10 قاراشادا سامارقاند قالاسىندا (وزبەكستان) تۇركى اكادەمياسى تۇركى مەملەكەتتەرى ۇيىمىنىڭ حاتشىلىعىنىڭ قولداۋىمەن تۇركى الەمى ارحەولوگيا ينستيتۋتتارى مەن ورتالىقتارى باسشىلارىنىڭ العاشقى جۇمىس كەزدەسۋىن ۇيىمداستىردى, دەپ حابارلايدى Egemen.kz.
باسقوسۋعا تۇركى اكادەمياسىنىڭ پرەزيدەنتى شاھين مۇستافاەۆ, ازەربايجان, قازاقستان, قىرعىزستان, تۇركيا, وزبەكستان, تاتارستان (رەسەي فەدەراتسياسى), قاراقالپاقستان (وزبەكستان رەسپۋبليكاسى) جانە موڭعوليا ارحەولوگيالىق زەرتتەۋلەر سالاسىنداعى عىلىمي ينستيتۋتتار مەن ورتالىقتاردىڭ باسشىلارى, سونداي-اق جەتەكشى ارحەولوگتار مەن ساراپشىلار قاتىستى.
كەزدەسۋ بارىسىندا تۇركى الەمىنىڭ ارحەولوگيا سالاسىنداعى عىلىمي-زەرتتەۋ ينستيتۋتتارى مەن ورتالىقتارىنىڭ باسشىلارى ىنتىماقتاستىق پەن قارىم-قاتىناستى تەرەڭدەتۋدىڭ ىقتيمال باعىتتارىن تالقىلادى.
تۇركى اكادەمياسىنىڭ باسشىسى ش.مۇستافاەۆ ءوزىنىڭ كىرىسپە سوزىندە تۇركى الەمى ارحەولوگيالىق عىلىمي-زەرتتەۋ ينستيتۋتتارى مەن ورتالىقتارىنىڭ قاۋىمداستىعىن (ARICA) قۇرۋدى ماقسات ەتكەن ءبىرىنشى جۇمىس وتىرىسىنىڭ ماقساتى مەن مىندەتتەرىنە توقتالدى. ول تۇركى ينتەگراتسياسىن جان-جاقتى دامىتۋ اياسىندا ارحەولوگيالىق زەرتتەۋلەردى ۇيلەستىرۋ, سونداي-اق بار ماسەلەلەردى بىرلەسىپ شەشۋ ءۇشىن تۇركى الەمىنىڭ ارحەولوگيالىق ينستيتۋتتارى مەن ورتالىقتارىن بىرىكتىرەتىن قۇرىلىم قۇرۋ قاجەتتىگىن باسا ايتتى.
ءىس-شاراعا قاتىسۋشىلار ارحەولوگيالىق عىلىمي-زەرتتەۋ ينستيتۋتتارى مەن ورتالىقتارى ونلاين رەجىمدە ءوزارا ارەكەتتەسە الاتىن, تاجىريبە الماسىپ, زەرتتەۋلەر مەن ءىس-شارالاردى بىرلەسىپ جۇرگىزەتىن پلاتفورما قۇرۋدىڭ ماڭىزدى ەكەندىگىن ماقۇلدادى.
قاتىسۋشىلار ARICA بەلسەندى ءوزارا ءىس-قيمىل, اقپارات جانە تاجىريبە الماسۋ, سونداي-اق بىرلەسكەن عىلىمي زەرتتەۋلەر مەن باسقا دا ءىس-شارالار الاڭىنا اينالۋى ءتيىس ەكەنىن, سول ارقىلى تۇركى الەمىنىڭ ارحەولوگيالىق زەرتتەۋ ينستيتۋتتارىن, ورتالىقتارىن جانە بەلسەندى ساراپشىلارىن بىرىكتىرۋ كەرەكتىگىن اتاپ ءوتتى.
وتىرىس ناتيجەسىندە عىلىمي ۇيىمداردىڭ باسشىلارى مەن ساراپشىلار «تۇركى الەمىنىڭ ارحەولوگيالىق عىلىمي-زەرتتەۋ ينستيتۋتتارى مەن ورتالىقتارىنىڭ قاۋىمداستىعىن (ARICA) قۇرۋ تۋرالى حاتتاما قابىلدادى.
حاتتاماعا كەلەسى عىلىمي مەكەمەلەر قول قويدى: ازەربايجان ۇلتتىق عىلىم اكادەمياسىنىڭ ارحەولوگيا, ەتنوگرافيا جانە انتروپولوگيا ينستيتۋتى, ءا.مارعۇلان اتىنداعى ارحەولوگيا ينستيتۋتى, قىرعىز رەسپۋبليكاسى ۇلتتىق عىلىم اكادەمياسىنىڭ تاريح, ارحەولوگيا جانە ەتنولوگيا ينستيتۋتى, يا. گۋلياموۆ اتىنداعى سامارقاند ارحەولوگيا ينستيتۋتى, وزبەكستان رەسپۋبليكاسى عىلىم اكادەمياسىنىڭ ۇلتتىق ارحەولوگيا ورتالىعى, وزبەكستان رەسپۋبليكاسى عىلىم اكادەمياسى ونەرتانۋ ينستيتۋتى, قاراقالپاق گۋمانيتارلىق عىلىمدار عىلىمي-زەرتتەۋ ينستيتۋتى (وزبەكستان), تاتارستان عىلىم اكادەمياسى ا.ح. حاليكوۆ اتىنداعى ارحەولوگيا ينستيتۋتى (رف).
سونداي-اق اتالعان جيىن اياسىندا تاتارستان رەسپۋبليكاسى عىلىم اكادەمياسى دايىنداعان «ارحەولوگيا: ەدىل-ورال ءوڭىرى» جەتى تومدىق باسىلىمىنىڭ تۇساۋكەسەرى ءوتتى.