مۇلدە ويلاماعان جەردەن ۇلكەن قۋانىشقا كەنەلىپ جاتساڭىز, تاڭعالماڭىز. اۋە كەمەسىنە ءمىنىپ, ورال – الماتى باعىتىندا ۇشىپ كەلگەن قايرات ماناباەۆتى ويعا كىرىپ-شىقپاعان توسىن ساتتىلىك كۇتىپ الدى.
بيىل حالىقارالىق الماتى اۋەجايى ءۇشىن جولاۋشىلار اعىنىنىڭ رەكوردتىق كورسەتكىشى تىركەلدى. جىل اياقتالا قويماسا دا, بيىلدىققا 8 ميلليون ازامات اۋەجاي قىزمەتىن پايدالانعان. قايراتتىڭ ەنشىسىنە ءداپ سول سەگىز ميلليونىنشى ءساتتى بيلەت بۇيىرىپتى. جولى بولعان جولاۋشىنى اۋەجاي باسشىلىعى قۋانىشپەن قارسى الىپ, ەكى كىسىگە ارنالعان دەمالىس سەرتيفيكاتىن تابىستادى. وسىلايشا, قايرات جاقىن جاندارىنىڭ بىرىمەن گرۋزيا ەلىنە ساياحاتقا اتتانباق.
«بۇل – اۋەجاي ءۇشىن دە, الماتى قالاسى ءۇشىن دە تاريحي وقيعا. نەگە دەسەڭىز, الماتى اۋەجايىنىڭ بۇكىل تاريحىندا العاش رەت جولاۋشىلار اعىنى 8 ملن ادامعا جەتىپ وتىر. بىلتىر ءبىز ارقىلى 7,2 ملن جولاۋشى اۋە كەمەسىمەن قاتىناعان. ۇجىم اتىنان تۋريستىك ساپارعا جولداما ۇتىپ العان ازاماتتى قۇتتىقتايمىز», دەيدى الماتى حالىقارالىق اۋەجايىنىڭ پرەزيدەنتى الىپ ەر تۋنگا ەرسوي.
ايتپاقشى, ەلىمىزدىڭ اۋە قاقپاسى سانالاتىن الماتى ايلاعىنىڭ وتكىزۋ قابىلەتىن ارتتىرۋ ماقساتىندا جاڭا حالىقارالىق جولاۋشىلار تەرمينالىنىڭ قۇرىلىسى ءجۇرىپ جاتىر. كەشەن كەلەر جىلدىڭ جاز ايىندا اياقتالماق. سۋ جاڭا عيمارات بورت كولەمىنە بايلانىستى ءبىر ۋاقىتتا جەتى ۇشاققا دەيىن قابىلداۋعا قاۋقارلى. ال اۋەجايدىڭ جالپى وتكىزۋ قابىلەتى جىلىنا 14 ملن جولاۋشىعا دەيىن ارتپاق.
جوباعا سايكەس قۇرىلىم قولدانىستاعى تەرمينال عيماراتىنا جەرۇستى وتكەلى ارقىلى قوسىلادى. جاڭا ۇلگى جولاۋشىلارعا عيماراتتىڭ سىرتىنا شىقپاي-اق, ىشكى جانە حالىقارالىق رەيستەردەن اۋىسۋعا وڭاي قول جەتكىزۋدى قامتاماسىز ەتپەك. وسىلايشا, جاڭا تەرمينال تەك حالىقارالىق رەيستەرگە, ال قولدانىستاعى تەرمينال ىشكى رەيستەرگە قىزمەت كورسەتەدى.
الماتى