كانادانىڭ لاۆال قالاسىندا شورت-ترەكتەن ءتورت قۇرلىق چەمپيوناتى اياقتالدى. ۇلتتىق قۇراما اتالعان تۋرنيردەگى العاشقى جۇلدەسىن جەڭىپ الدى, دەپ حابارلايدى Egemen.kz تۋريزم جانە سپورت مينيسترلىگىنە قاراستى سپورتتى دامىتۋ ديرەكتسياسىنىڭ ءباسپاسوز قىزمەتىنە سىلتەمە جاساپ.
شەشۋشى جارىس كۇنى 3000 مەتر بويىنشا مارەگە ءۇشىنشى بولىپ جەتكەن ەلىمىزدىڭ قىزدار قۇراماسى 4:16.200 سەكۋند كورسەتكىشىمەن قولا جۇلدەگە قول جەتكىزدى. كوماندا ساپىندا الينا اجىعاليەۆا, يانا حان, ماليكا ەرمەك, مادينا جانبۋسينوۆا, ولگا تيحونوۆا بار.
ەۋروپادان باسقا قۇرلىقتاعى سپورتشىلار اراسىندا جارىس وتكىزۋ ماقساتىندا حالىقارالىق كونكي تەبۋشىلەر وداعى (ISU) 2019 جىلى ءتورت قۇرلىق چەمپيوناتىنىڭ نەگىزىن قالاعان. اتالعان چەمپيونات العاش رەت 2020 جىلى مونرەال (كانادا) قالاسىندا وتسە, ودان كەيىنگى سەرياسى 2022 جىلى سولت-لەيك-سيتي (اقش) قالاسىندا ءوتتى.
وسى جارىستا مەدال جەڭىپ العاندار قاتارىندا 6 مەملەكەت تۇر: وڭتۇستىك كورەيا, كانادا, اقش, قىتاي, جاپونيا, قازاقستان. ۇلتتىق قۇراما اتالعان قاتارعا 6 قاراشادا قوسىلدى.