اكىمدەر سايلاۋى قالاي ءوتتى؟

پرەزيدەنت قاسىم-جومارت توقاەۆ بيىلعى جولداۋدا بۇل ناۋقان قاناتقاقتى رەجىمدە باستالاتىنىن مالىمدەگەن بولاتىن. سوعان سايكەس ساياسي باسەكە وتەتىن مەزگىل بەلگىلەنىپ, دايىندىق جۇمىستارى باستالىپ كەتتى.

«ايماقتاعى اتقارۋشى بيلىكتىڭ شەشىم قابىلداۋ ىسىنە ازاماتتاردىڭ تىكە­لەي قاتىسۋ مۇمكىندىگىن بىرتىندەپ ارت­تىرۋ دا ماڭىزدى. اۋىل, كەنت جانە اۋىل­دىق وكرۋگ اكىمدەرىن تۇرعىندار وزدەرى سايلاي باستاعانىنا ەكى جىلدان استى. سودان بەرى اۋىلدىق دەڭگەيدەگى اكىم­دەردىڭ تورتتەن ءۇشى سايلاندى. ەندى اۋدان جانە وبلىستىق دەڭگەيدەگى قالا اكىم­دەرىن سايلاپ كورەمىز», دەدى مەملەكەت باسشىسى.

ورتالىق سايلاۋ كوميسسياسى تارات­قان مالىمەتكە سۇيەنسەك, وبلىستاردىڭ ءماسليحاتتارى وسى سايلاۋدى وتكىزۋ ءۇشىن 42 اۋدان مەن 3 وبلىستىق ماڭىزى بار قالانىڭ تىزبەسىن بەكىتتى. 1 553 سايلاۋ كوميسسياسى: 17 وبلىستىق, 3 قالالىق, 42 اۋداندىق جانە 1 491 ۋچاسكەلىك سايلاۋ كوميسسياسى جۇمىلدىرىلدى.

سايلاۋ بالاما نەگىزدە ءوتتى. سايلاۋ بيۋللەتەندەرىنە 125 كانديدات ەنگىزىلدى. ساياسي باسەكەگە قاتىسىپ, تاڭداۋىن جاساعاندار سانى 62,79 پايىزدى قۇرادى. سايلانعان اكىمدەردىڭ ورتاشا جاسى 46,7 جاستى قۇرايدى.

سايلاۋ ناۋقانى رەسپۋبليكانىڭ سايلاۋ زاڭناماسى نورمالارىنىڭ تالاپتارىنا سايكەس ءوتتى. داۋىس بەرۋ كۇنى بايقاۋدى كانديداتتاردىڭ 8 500-گە جۋىق سەنىم بىلدىرىلگەن ادامى, بايقاۋشى مەن باق وكىلى جۇزەگە اسىردى.

وبلىستىق سايلاۋ كوميسسيالارى ۇسىنعان مالىمەتتەرگە سايكەس, ەلوردا ۋاقىتىمەن ساعات 07.00-دەگى جاعداي بو­يىنشا وڭىرلەردە بارلىق 1491 اۋداندىق جانە قالالىق سايلاۋ ۋچاسكەلەرى داۋىس بەرۋگە كىرىستى.

ەڭ ءىرى 305 سايلاۋ ۋچاسكەسىندە (1 000-نان اسا سايلاۋشى) ءتسدياوم جانە «ازا­ماتتارعا ارنالعان ۇكىمەت» كەاق-مەن بىرلەسىپ, سايلاۋشىلار تىزى­مىنە كىرمە­گەن, بىراق سايلاۋ ۋچاسكەسى­نىڭ اۋماعىندا تۇراتىن مەكەنجاي مالىمەت­تەرىن تەكسەرۋ ءۇشىن سەرۆيس ۇيىمداستىرىلدى.

جامبىل جانە تۇركىستان وبلىستارى­نىڭ 3 سايلاۋ ۋچاسكەسىندە «قازاقستان رەسپۋب­ليكاسىنداعى سايلاۋ تۋرالى» كونس­تيتۋتسيالىق زاڭ شەڭبەرىندە اۋماق­تىق سايلاۋ كوميسسيالارىنىڭ قابىل­دانعان شەشىمدەرىنە سايكەس داۋىس بەرۋ تاڭعى ساعات 06.00-دە باستالدى.

قازاقستان رەسپۋبليكاسىنىڭ اۋماعىن­داعى ۋاقىت بەلدەۋلەرىنىڭ شەكارا­­­لارىنا سايكەس 5 ءوڭىردىڭ: اقتوبە, اتى­راۋ, باتىس قازاقستان, قىزىلوردا جانە ماڭعىستاۋ وبلىستارىنىڭ سايلاۋ ۋچاس­كەلەرى استانا ۋاقىتى بويىنشا ساعات 08.00-دە اشىلدى. سايلاۋشىلار تىزى­مىنە 1 062 327 ازامات ەنگىزىلدى.