ءىىم ەسىرتكى قىلمىسىنا قارسى ءىس-قيمىل دەپارتامەنتى باتىس قازاقستان وبلىسىنىڭ پوليتسياسى كولىكتەگى پوليتسيامەن جانە پروكۋراتۋرانىڭ ۇيلەستىرۋىمەن ارنايى وپەراتسيا جۇرگىزدى. ناتيجەسىندە قۇرامىندا كوكنار سابانى مەن اپيىننىڭ قوسپالارى بار تاعامدى شەتەلدەن جەتكىزۋشىلەردىڭ جولىن كەستى. بۇل تۋرالى ىشكى ىستەر مينيسترلىگىنىڭ ءباسپاسوز قىزمەتى مالىمدەدى.
«ارنايى ماقساتتاعى بولىمشەلەردىڭ قولداۋىمەن قۇرىلعان جەدەل-تەرگەۋ توپتارى ورال, اقتوبە, شىمكەنت جانە الماتى قالالارىنىڭ اۋماعىندا الماتىدا اپيىن كوكنارىن ساتىپ الىپ, ونى ەلىمىزدىڭ باتىسىندا ساتقان سەگىز ادامدى ۇستادى. ەسىرتكى ترافيگىن شىمكەنت قالاسىنىڭ 50 جاستاعى تۇرعىنى ۇيىمداستىرعان. ول اقتوبە مەن ورالداعى ءتورت دۇكەننىڭ يەسى بولىپ شىقتى. سول ارقىلى كۇدىكتى ەسىرتكى جاساۋعا ارنالعان كوكنار سابانى مەن ونەركاسىپتىك ەرىتكىشتى ساتقان. پوليتسيا ءبىر مەزگىلدە استانا, الماتى, ورال, شىمكەنت, اقتوبە, قوستاناي, كوكشەتاۋ, رۋدنىي قالالارىندا 35 ءتىنتۋ ءىس-شاراسىن جۇرگىزىپ, كۇدىكتىلەردى ۇستادى», دەپ ءمالىم ەتتى ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى سارقىتباي قۇسايىنوۆ.
سونىمەن قاتار «ورال قالاسىندا جۇرگىزىلگەن ءتىنتۋ كەزىندە ەكى دۇكەننەن 13 قاپ كەپتىرىلگەن كوكنار سابانى, ەرىتكىشى بار قوراپتار, تارازىلار, ەسىرتكى ساۋداسىنان الىنعان اقشا اعىندارى تىركەلگەن كاسسالىق جۋرنالدار تاركىلەندى. اقتوبەدە تاعى 68 قاپ كوكنار سابانى, ەرىتكىشى بار قاپتامالار, كاسسالىق جۋرنال جانە قىلمىسكەرلەر ەسىرتكى تاسىمالدايتىن Toyota Highlander جول تالعامايتىن كولىگى تاركىلەندى. شىمكەنتتە قىلمىستىق بيزنەستى ۇيىمداستىرۋشى ۇستالدى. ونىڭ ۇيىنەن ەسىرتكى ساۋداسىنىڭ قارجى اعىندارى تىركەلگەن التى كاسسالىق جۋرنال, بەس قاپ كەپتىرىلگەن كوكنار سابانى, «Toyota Land Cruiser Prado 150» جول تالعامايتىن اۆتوكولىك, سونداي-اق DAF اۋىر جۇك كولىگى تابىلدى. الماتىدا قىلمىستىق توپ مۇشەلەرىنىڭ ءبىرى جالعا العان قويما ءۇي-جايلارىنا ءتىنتۋ جۇرگىزىلدى. 22 توننادان استام كوكنار سابانى, سونداي-اق BMW X5 اۆتوكولىگى تابىلىپ, تاركىلەندى. ءبىر مەزگىلدە كولىك پوليتسياسى استانا, الماتى, قوستاناي جانە رۋدنىي قالالارىندا اپيىن كوكنارىن ساتۋ بويىنشا ورتاق وتباسىلىق قىلمىستىق بيزنەستى جولعا قويعان جەتى فيگۋرانتتى ۇستادى. جۇرگىزىلگەن ارنايى وپەراتسيالار ناتيجەسىندە قىلمىستىق توپتىڭ 15 مۇشەسى ۇستالدى. ولار 15 جىلدان 25 جىلعا دەيىن باس بوستاندىعىنان ايىرىلادى. 104 توننادان استام كوكنار سابانى, 600-دەن استام «تروپيكاميد» جانە «ميدەكس» دارىلىك پرەپاراتتارىنىڭ بوتەلكەلەرى, شامامەن 5 ملن تەڭگە, 4 اۆتوكولىك جانە DAF اۋىر جۇك كولىگى تاركىلەنگەنى» جازىلعان اقپاراتتا. ەسىرتكى قىلمىسىنا قارسى كۇرەس دەپارتامەنتىنىڭ وكىلدەرى قىراعى قيمىلداۋدىڭ ناتيجەسىندە اينالىمعا ەنۋگە شاق قالعان اپيىننىڭ ءبىر رەتتىك قولداناتىن 1 ميلليوننان اسا دوزاسى جويىلدى. ەسىرتكى ءونىمىنىڭ جالپى قۇنى - 4 ميلليارد تەڭگە.