اۋەسقويلار اراسىندا شاعىن فۋتبولدان قازاقستان قۇراماسى بىرىككەن اراب امىرلىگىنىڭ راس-ەل-حايم قالاسىندا وتكەن الەم چەمپيوناتىنىڭ فينالىندا رۋمىنيامەن شەبەرلىك بايقاسىپ, كۇمىس مەدالدى قاناعات تۇتتى.
ويىننىڭ نەگىزگى كەزەڭى 2:2 ەسەبىمەن تەڭ اياقتالدى. كەزدەسۋ بارىسىندا جەرلەستەرىمىز باسىم تۇرعان ەدى. ويىن اياقتالار تۇستا رۋمىنيالىق فۋتبولشىلار تارازى باسىن تەڭەستىرىپ كەتتى. ال پەنالتي تەبۋدە ەل قۇراماسى قارسىلاسىنا 11:12 ەسەبىمەن ەسە جىبەردى.
جالپى, ەل قۇراماسى جارىس بارىسىندا ا توبىندا سىنعا ءتۇستى. توپتىق كەزەڭدە گانانى – 7:0, ءۇندىستاندى – 16:0, ءباا قۇراماسىن 2:1 ەسەبىمەن جەڭدى.
1/8 فينالدا – مەكسيكانى (0:0, 2:1 - پەنالتيدەن), شيرەك فينالدا – چەحيانى (3:3, 3:2 – پەنالتيدەن), جارتىلاي فينالدا ازەربايجان قۇراماسىن (3:2) قاپى قالدىردى. ايتا كەتسەك, بۇعان دەيىن قازاقستان فۋتبولشىلارى 2015, 2017 جىلداردا 11-ورىن العان ەدى.