قوستانايدا كوركەمسوز وقۋ شەبەرلەرىنىڭ «ىبىراي وقۋلارى» وبلىستىق بايقاۋى مارەگە جەتتى. ۇلى اعارتۋشىنىڭ شىعارمالارىنداعى ەلشىلدىك, ادامگەرشىلىك, ادالدىق, ەڭبەكسۇيگىشتىك, ءبىلىم-عىلىمعا قۇشتارلىق سەكىلدى ونەگەلى قاسيەتتەردى ناسيحاتتاپ, دانەگىن وسكەلەڭ ۇرپاقتىڭ بويىنا ءسىڭىرۋ ماقساتىندا وتكەن ءبىلىم جارىسىنا ءوڭىر مەكتەپتەرىنەن 70-كە جۋىق وقۋشى قاتىستى.
ءداستۇرلى ءىس-شارانى «قوستاناي دارىنى» وڭىرلىك عىلىمي وقۋ-ادىستەمەلىك ورتالىعى مەن ى.التىنسارين اتىنداعى مامانداندىرىلعان مەكتەپ-گيمنازيا-ينتەرناتىنىڭ ۇستازدارى بىرلەسىپ ۇيىمداستىرعانىن ايتا كەتكەن ءجون.
بەكىتىلگەن ەرەجەگە سايكەس, 6-7 سىنىپ وقۋشىلارى ىبىراي ولەڭدەرىن مانەرلەپ وقۋ شەبەرلىگىنەن سىنعا تۇسسە, ولاردان ءبىر-ەكى جاس ەرەسەكتەۋ 8-9 سىنىپ وقۋشىلارى ۇلى اعارتۋشىنىڭ عيبراتتى اڭگىمەلەرىن جاتقا ايتۋدان جارىستى. ءىس-شارا بارىسىندا اۋداندىق كەزەڭنەن ىرىكتەلىپ شىققان كىلەڭ ۇزدىكتەردىڭ قوستاناي تورىندەگى كوركەمسوز سايىسىنا ۇلكەن ۇمىتپەن, ىجداعاتتى دايىندىقپەن كەلگەنى بايقالىپ تۇردى. ىبىراي شىعارمالارىن مانەرلەپ, ناتىنە كەلتىرە وقىپ, تىڭداۋشىسىن شىن ۇيىتا بىلگەن وقۋشىلارمەن قاتار, ۇلى ۇستازدىڭ قىسقا اڭگىمەلەرىن ساحنالىق كورىنىس ارقىلى اشىپ جەتكىزە بىلگەن ۇمىتكەرلەر دە كوپ.
قازىلار القاسىنىڭ ۇيعارۋىمەن, بايقاۋدىڭ باس جۇلدەسىن ىبىراي ولەڭدەرىن تۇگەلگە دەرلىك جاتتاپ الىپ, مانەرىنە كەلتىرىپ وقىپ بەرگەن ارقالىقتاعى كەيكى باتىر مەكتەبىنىڭ 7-سىنىپ وقۋشىسى مەيىرلان قاپەز ۇتىپ الدى. ءبىرىنشى ورىنعا جانگەلدين اۋدانىنداعى التىنسارين مەكتەبىنىڭ 6-سىنىپ وقۋشىسى جاينا الپىسقىزى لايىق دەپ تانىلدى.
ىبىراي اڭگىمەلەرىن مانەرلەپ وقۋ بويىنشا كوپتەن ەرەك كوركەم ونەر كورسەتكەن ارقالىقتاعى ى.التىنسارين اتىنداعى گيمنازيانىڭ 8-سىنىپ شاكىرتى جانايىم سىرعابايقىزى باس جۇلدەنى ۇتىپ الدى.
جالپى, بايقاۋعا قاتىسقان وقۋشىلار مەن ۇستازداردىڭ ەشقايسىسى دا قۇر قول قايتقان جوق. جەڭىمپازدار مەن جۇلدەگەرلەر ارنايى ديپلومدار مەن ەسكەرتكىش سىيلىقتارعا يە بولسا, قالعان وقۋشىلارعا ۇلى اعارتۋشىنىڭ شىعارمالارىن ناسيحاتتاۋشى ۇلگىلى شاكىرت دەگەن مازمۇنداعى العىسحاتتار تاپسىرىلدى.
قوستاناي وبلىسى