ءماجىلىستىڭ جالپى وتىرىسىندا نۇرلان اۋەسباەۆ پرەمەر-ءمينيستردىڭ ورىنباسارى تامارا دۇيسەنوۆاعا ساۋال جولداپ, جۇمىسپەن قامتۋداعى جۇيەسىزدىك جايىن قوزعادى. جىل سايىن ناتيجەلى جۇمىسپەن قامتۋدى دامىتۋ ءۇشىن قىرۋار قاراجات جۇمسالعانىن, الداعى ۋاقىتتا دا قوماقتى سوما بولىنەتىنىن ايتتى.
«2024-2026 جىلدارعا 6 ميلليارد تەڭگە كوزدەلسە, ءار جىلعا شاققاندا 2,9 ميلليارد تەڭگەدەن بولىپ وتىر. باعدارلاما شەڭبەرىندە قوعامدىق, الەۋمەتتىك جۇمىس ورىندارىن اشۋ قولعا الىنعان. بۇل جۇمىس ورىندارى تەك قىسقا مەرزىمدىك قانا. ال ۇزاق ۋاقىتقا جۇمىسپەن قامتاماسىز ەتۋدە احۋالدى جاسقارتپايتىنى ءمالىم. سوندىقتان قىسقا مەرزىمدىك جۇمىس ورنى ءۇشىن دەپ بيۋدجەتتەن وسىنداي قاراجات ءبولۋ قانشالىقتى ءتيىمدى؟», دەدى ن.اۋەسباەۆ.
دەپۋتاتتىڭ ساۋالىنا جاۋاپ قاتقان پرەمەر-ءمينيستردىڭ ورىنباسارى بيىل ەلىمىزدە 20 وڭىرلىك جۇمىسپەن قامتۋ كارتاسى ىسكە اسىرىلعانىن جەتكىزدى. سونىڭ نەگىزىندە جەرگىلىكتى جەرلەردە جاڭا جۇمىس ورىندارىنا, بوس جۇمىس ورىندارى جانە مەملەكەتتەن سۋبسيديا بولىنەتىن جۇمىس ورىندارىنا ازاماتتاردى تارتۋ قولعا الىنعانىن اتاپ ءوتتى. جۇمىسپەن قامتۋعا قاتىستى بيۋدجەتتەن بولىنەتىن قاراجات ەسەبىنەن مەملەكەت الەۋمەتتىك وسال توپتار مەن جاستاردى جۇمىسقا ورنالاستىرۋ باعىتىنا عانا سۋبسيديا بەرمەك.
«جاستاردى جۇمىسپەن قامتۋدا جۇمىس ورىندارىنا سۋبسيديا بولۋدەگى ماقسات – ولاردىڭ تاجىريبە جيناپ, شىڭدالىپ, ءوز ماماندىعى بويىنشا بىلىكتىلىگىن ارتتىرۋىنا كۇش سالۋ. سونىڭ ناتيجەسىندە ولاردىڭ تۇراقتى جۇمىسقا ورنالاسۋىنا مۇمكىندىگى ارتادى», دەدى ت.دۇيسەنوۆا.
ۇكىمەت باسشىسىنىڭ ورىنباسارى ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنە سۇيەنىپ, ەلدە جاستاردى جۇمىسپەن قامتۋدى سۋبسيديالاۋ ارقىلى 189 مىڭ جۇمىس ورنى اشىلعانىن اتاپ ءوتتى. ونىڭ ىشىندە 139 مىڭ ورىن جاستارعا تيەسىلى ەكەن. سوندىقتان دا ۋاقىتشا جۇمىس ورنىن اشۋ ءۇشىن بولىنەتىن قىرۋار قاراجات جەلگە ۇشپايدى. سەبەبى مىڭداعان جاستى تۇراقتى جۇمىسپەن قامتۋدىڭ باسپالداعى وسى بولماق كورىنەدى.