بيىل استانانىڭ ورتالىقتاندىرىلعان كىتاپحانالار جۇيەسىنە قاراستى 4 قالالىق كىتاپحانا جاڭعىرتىلىپ, ولاردىڭ 2-ءۋى رەسپۋبليكا كۇنى مەن كىتاپحاناشىلاردىڭ كاسىبي مەرەكەسىندە ەسىگىن وقىرماندارعا قايتا ايقارا اشتى.
بۇگىندە ەلورداداعى ورتالىقتاندىرىلعان كىتاپحانالار جۇيەسىنە قاراستى 18 قالالىق كىتاپحانا بار, وندا 92 مامان قىزمەت ىستەيدى. «كىتاپحانا قىزمەتىن جاڭعىرتۋ جانە جەتىلدىرۋ» اتتى قاناتقاقتى جوباسى اياسىندا №4 بالالار كىتاپحاناسى مەن زاعيپتار مەن ناشار كورەتىن ازاماتتارعا ارنالعان مامانداندىرىلعان كىتاپحانانىڭ ماتەريالدىق-تەحنيكالىق بازاسى تولىقتاي جاڭارتىلىپ, زاماناۋي ەرگونوميكالىق جيھاز, ديزاينەرلىك جۇمىس جۇرگىزىلدى. كىتاپحانانىڭ قاسبەتتەرى وزگەردى.
سونداي-اق زاعيپتار مەن ناشار كورەتىن ازاماتتارعا ارنالعان مامانداندىرىلعان كىتاپحاناعا «وقۋ ماشيناسى» دەپ اتالعان سويلەۋ سينتەزى بار كومپيۋتەرلىك تيفلوكەشەن ورناتىلدى. ونىڭ كومەگىمەن كوزى ناشار كورەتىن وقىرماندار كىتاپ وقىپ, ماتەريالداردى وڭدەپ, باسىپ شىعارا الادى.
قايتا جاڭعىرتۋدان وتكەن كىتاپحانانىڭ اشىلۋىنا استانا قالاسى اكىمىنىڭ ورىنباسارى ەسەت بايكەن قاتىسىپ, جاڭاشا تۇرگە بولەنگەن وقۋ زالىن ارالاپ كوردى.
– قازىرگى ۋاقىتتا حالىقتىڭ مادەني دەڭگەيىن ارتتىرىپ, وقۋ بەلسەندىلىگىن دامىتۋعا, جاستاردى رۋحاني-ادامگەرشىلىككە تاربيەلەۋگە كوڭىل ءبولۋ وتە ماڭىزدى. بۇل جولدا كىتاپتىڭ اتقاراتىن ءرولى زور. زاڭعار جازۋشى ءابىش كەكىلباي ۇلى «ادامدى ادام ەتكەن – كىتاپ, ادامزات ەتكەن – كىتاپحانا» دەپ بەكەر ايتپاعان. ەرتەڭگى ەل تىزگىنىن ۇستايتىن جاس ۇرپاق پەن كوپشىلىك وقىرمانعا كىتاپتى ناسيحاتتاۋ جولىندا جاساپ جۇرگەن ەڭبەكتەرىڭىز وراسان, – دەپ كىتاپحاناشىلارعا ىزگى لەبىزىن ءبىلدىردى ول.