سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتىپ, دەپۋتاتتار سەنات جانىنان ينكليۋزيا جونىندەگى كەڭەس قۇرۋ ماسەلەسىن قاراپ, ونىڭ قۇرامىن بەكىتتى. سونداي-اق ولار 26 قازان كۇنى وتەتىن پالاتا وتىرىسىنىڭ كۇن ءتارتىبىن بەكىتتى.
الداعى سەنات وتىرىسىندا پالاتا دەپۋتاتتارى «قازاقستان رەسپۋبليكاسى مەن كيپر رەسپۋبليكاسى اراسىنداعى ۇستاپ بەرۋ تۋرالى شارتتى راتيفيكاتسيالاۋ تۋرالى» جانە «قازاقستان رەسپۋبليكاسى مەن كيپر رەسپۋبليكاسى اراسىنداعى قىلمىستىق ىستەر بويىنشا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭداردى قارايدى.
اتالعان زاڭداردىڭ نورمالارىنا سايكەس مەملەكەتتەر قىلمىستىق قۇقىق بۇزۋشىلىق سالاسىندا ءوزارا قۇقىقتىق كومەك كورسەتەدى. ناقتى ايتقاندا, شارتتاردا ەكى ەلدىڭ قۇزىرەتتى ورگاندارىنىڭ ادامداردى ۇستاپ بەرۋ, كەيىنگە قالدىرۋ نەمەسە ۋاقىتشا ۇستاپ بەرۋ بويىنشا ءوزارا ءىس-قيمىل ماسەلەلەرى, ۇستاپ بەرۋدەن باس تارتۋ ءۇشىن مىندەتتى جانە فاكۋلتاتيۆتىك نەگىزدەر ەگجەي-تەگجەي رەگلامەنتتەلگەن.
وتىرىس بارىسىندا دەپۋتاتتار سەنات جانىنان ينكليۋزيا جونىندەگى كەڭەس قۇرۋ تۋرالى ماسەلەنى قاراپ, ونىڭ قۇرامىن بەكىتتى.
«كەدەرگىسىز ورتا قالىپتاستىرۋ جانە مۇگەدەكتىگى بار ازاماتتاردى الەۋمەتتىك قورعاۋ – مەملەكەتتىڭ الدىندا تۇرعان باسىم مىندەتتەردىڭ ءبىرى. ينكليۋزيا جونىندەگى كەڭەستىڭ قىزمەتى ەلىمىزدە تولىققاندى ينكليۋزيۆتى ورتا قۇرۋعا ىقپال ەتۋدى كوزدەيدى. بۇل الاڭنىڭ جۇمىسىنا ساراپشىلار مەن قوعام بەلسەندىلەرىن دە جۇمىلدىرامىز. الداعى ۋاقىتتا كەڭەس ەرەكشە قاجەتتىلىگى بار ازاماتتاردىڭ ءومىر ءسۇرۋ ساپاسىن جاقسارتۋعا تىڭ سەرپىن بەرەدى دەپ سەنەمىز. سەنات وسى باعىتتا بارلىق مۇددەلى تاراپپەن بەلسەندى جۇمىسىن جالعاستىرا بەرەدى», دەدى ماۋلەن اشىمباەۆ.
كەڭەستىڭ قۇرامىنا سەنات دەپۋتاتتارىنان بولەك, ساراپشىلار قاۋىمداستىعىنىڭ, قوعامدىق ۇيىمداردىڭ, سونداي-اق, مۇددەلى مەملەكەتتىك ورگانداردىڭ وكىلدەرى ەندى. سەنات جانىنان ينكليۋزيا جونىندەگى كەڭەس قۇرۋ تۋرالى باستاما العاش رەت بيىل قىركۇيەك ايىندا پالاتادا كوتەرىلگەن بولاتىن.
سونىمەن قاتار بيۋرو وتىرىسىندا «پرەزيدەنتتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ىسكە اسىرۋ شەڭبەرىندە سالىق ساياساتىنىڭ جانە سالىقتىق اكىمشىلەندىرۋدى جاڭعىرتۋدىڭ نەگىزگى تاسىلدەرى مەن تۇجىرىمدامالىق ماسەلەلەرى» تاقىرىبىنا ارنالعان الداعى ۇكىمەت ساعاتىنا دايىندىق بارىسى تالقىلاندى.
سەنات توراعاسى اتاپ وتكەندەي, مەملەكەت باسشىسى بيىلعى جولداۋدا سالىق ساياساتىنا جەكە توقتالىپ, ءتيىستى ورگاندارعا ناقتى تاپسىرمالار بەردى. وسىعان وراي, جاڭا سالىق كودەكسىن ازىرلەۋ پارلامەنتتىڭ الدىندا تۇرعان ماڭىزدى مىندەتتەردىڭ ءبىرى ەكەنىن اتاپ وتكەن ءجون. سونداي-اق وتىرىس كەزىندە ماجىلىستەن كەلىپ تۇسكەن زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.