پارلامەنت ءماجىلىسىنىڭ توراعاسى ەرلان قوشانوۆ بانكتەردەن شەكتەۋسىز كرەديت الىپ, قارىزعا بەلشەسىنەن باتىپ وتىرعان ازاماتتار تۋرالى ايتتى, دەپ حابارلايدى Egemen.kz.
«جاسىراتىنى جوق, قازىر بانكتەردەن شەكتەۋسىز كرەديت الىپ, قارىزعا بەلشەسىنەن باتىپ وتىرعان ازاماتتارىمىز كوپ. «حالىق نەسيە قامىتىن كيىپ وتىر» دەسە دە بولادى. ادامداردىڭ نەسيەگە تاۋەلدىلىگى مەن قارجىلىق ساۋاتىنىڭ تومەندىگى ۇلكەن الەۋمەتتىك پروبلەماعا اينالدى. مەملەكەت باسشىسى جولداۋىندا نەسيە ماسەلەسىنە كەڭىنەن توقتالىپ, ونى شەشۋ جولدارىن قاراستىرۋ تۋرالى تاپسىرما بەرگەن بولاتىن. دەپۋتاتتار دا بۇل تۇيتكىلمەن جاقسى تانىس. ويتكەنى, ءبىز ايماقتارعا ءجيى شىعامىز. مەنىڭ ءوزىم دە تالاي وڭىردە بولىپ, حالىقپەن جۇزدەستىم. كوبىنىڭ ايتاتىنى ءبىر نارسە, ول – نەسيەگە تاۋەلدىلىك. بۇل, وكىنىشكە قاراي, جالپىحالىقتىق سيپات العان قۇبىلىسقا اينالىپ تۇر», دەدى ەرلان قوشانوۆ.
ونىڭ ايتۋىنشا, قازىر حالىقتىڭ 84 پايىزىندا, ياعني 8,4 ميلليوننان استام ادامنىڭ قارىزى بار. سوڭعى ءبىر جارىم جىل ىشىندە بۇل كورسەتكىش 27 پايىزعا وسكەن. 90 كۇننەن كەشىكتىرىلگەن قارىز كولەمى – شامامەن 1,4 ترلن تەڭگە. ياعني, 1,7 ميلليون ادام قارىزىن ۋاقتىلى تولەي الماي وتىر دەگەن ءسوز. وسىنىڭ ءبارى نەسيە پروبلەماسىنىڭ قانشالىقتى اسقىنىپ كەتكەنىن كورسەتىپ وتىر.