استانادا №6 مامانداندىرىلعان ءورت ءسوندىرۋ ءبولىمىنىڭ اۋماعىندا ەرلىكپەن قازا تاپقان ءورت ءسوندىرۋشى اسقار زابيكۋليننىڭ قۇرمەتىنە ەسكەرتكىش اشىلدى, دەپ حابارلايدى Egemen.kz قالالىق تجد ءباسپاسوز قىزمەتىنە سىلتەمە جاساپ.
ەسكەرتكىشتىڭ اشىلۋ سالتاناتىنا جانە № 6 مامانداندىرىلعان ءورت ءسوندىرۋ بولىمىنە اسقار زابيكۋليننىڭ ەسىمىن بەرۋ راسىمىنە قازاقستان رەسپۋبليكاسىنىڭ توتەنشە جاعدايلار ءمينيسترى سىرىم ءشارىپحانوۆ, ەلوردا اكىمى جەڭىس قاسىمبەك, گارنيزون باسشىلىعى مەن جەكە قۇرامى, ازاماتتىق قورعاۋ ورگاندارىنىڭ ارداگەرلەرى, اسقاردىڭ تۋىستارى مەن جاقىندارى قاتىستى.
ء«اربىر ادامنىڭ ءومىرى باعا جەتپەس قۇندى, مەملەكەتتىڭ ستراتەگياسى ەڭ الدىمەن ازاماتتاردى قورعاۋعا, توتەنشە جاعدايلاردىڭ الدىن الۋعا جانە جويۋعا باعىتتالعان. سول سەبەپتى قۇتقارۋشىلار مەن ءورت سوندىرۋشىلەردىڭ ەڭبەگى اسا ماڭىزدى سانالادى. بۇل ەسكەرتكىش – اسقاردىڭ وجەتتىگىن, جانقيارلىعى مەن ادالدىعىن بىلدىرەدى. ونىڭ ەرلىگى بىزگە كۇش پەن قۋات بەرەتىن ۇلگى بولسىن. اسقار زابيكۋلين ءبىزدىڭ ارىپتەسىمىز عانا ەمەس, سۇيىكتى ۇل, جار جانە اكە بولدى, ونىڭ ومىردەن ءوتۋى ءبىزدىڭ جۇرەگىمىزگە جازىلماس جارا سالدى. ءبىز ونى ارقاشان ەڭبەكقور, اقىلدى جانە سۇيىسپەنشىلىككە تولى ادام رەتىندە ەستە ساقتايمىز», دەپ اتاپ ءوتتى سىرىم ءشارىپحانوۆ ءوز سوزىندە.
ءىس-شاراعا جينالعاندار مەموريالعا گۇل شوقتارىن قويىپ, اسقاردى ءبىر مينۋت ۇنسىزدىكپەن ەسكە الدى.
بيىكتىگى ءۇش مەتر بولاتىن ەسكەرتكىشتە اسقاردىڭ ءبيۋستى قولادان, ال تومەنگى بولىگى ءمارماردان جاسالعان.
ەلوردالىق ءورت ءسوندىرۋشى اسقار زابيكۋلين 2022 جىلعى 20 قاراشادا تۇرعىن ءۇي كەشەنىندەگى ءورتتى ءسوندىرۋ بارىسىندا قىزمەتتىك بورىشىن وتەۋ كەزىندە قازا تاپتى, ول ءوز ءومىرىن قاتەرگە تىگىپ, ءۇش ادامنىڭ ءومىرىن ساقتاپ قالدى. پرەزيدەنتتىڭ جارلىعىمەن اسقار قايتىس بولعاننان كەيىن ءى دارەجەلى «ايبىن» مەملەكەتتىك ناگراداسىمەن ماراپاتتالدى.