استاناداعى ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ حالىق ءان ءبولىمى تىڭدارمانعا «دالا ءداستۇرى» اتتى اۋەزدى ءان اۋەلەپ, كۇي كۇمبىرلەگەن كەرەمەت ونەر كەشىن ۇسىندى.
ءان – حالىقتىڭ قازىناسى. قازاقتىڭ ءداستۇرلى ونەرى كەشەگى مەن بۇگىندى جالعاعان التىن كوپىر سەكىلدى. حالقىمىزدىڭ بولمىسىن, جەرىمىزدىڭ كەڭدىگىن, دالانىڭ دارحاندىعىن كورگىڭىز كەلسە – ءداستۇرلى ءان تىڭداپ, كۇمبىرلەگەن كۇيگە قۇلاق ءتۇرىڭىز.
اتالعان كونتسەرتكە ءداستۇرلى ءان مەكتەپتەرىنىڭ بارلىق وكىلى قاتىستى. ارقا مەن جەتىسۋدىڭ, سىر مەن باتىستىڭ, التاي مەن تارباعاتايدىڭ بىرەسە كەڭ قۇلاشتى, بىرەسە سىرلى, نازدى اندەرى مەن دومبىرانىڭ شاناعىندا كۇمبىرلەگەن كۇيلەرى سالتانات قۇردى. حاكىم اباي اتامىزدىڭ «سەگىزاياق» ءانى كوككە شارىقتادى.
اسىرەسە قازاقستاننىڭ ەڭبەك سىڭىرگەن قايراتكەرلەرى, بەلگىلى ءداستۇرلى انشىلەر ايگۇل قوسانوۆا, گۇلميرا سارينا, گۇلزيرا بوكەيحان, ونەر مايتالماندارى سەكەن سىزدىقوۆ, نۇراي تاناباەۆ, بەرىك وماروۆ, تەلمان نۇركەنوۆ, دانيار مۇقان, ايگەرىم نارتۇيە, ارافات ىسقاقوۆ, بەيبىت مۇساەۆ, حالىقارالىق جانە رەسپۋبليكالىق بايقاۋلاردىڭ جەڭىمپازدارى ساۋلەجان تاعزيا, وزگەرىس شەرىكباي, اينۇر قونىسباەۆا, جاقسىكەلدى ماياساروۆ, جاندوس يمانباي, زينات قاسىموۆا, نۇرجان مەيىرحان, راحات بەكاسىلوۆ, الۋا قالىمبەكوۆا, ايدوس وڭعارباي سالعان اندەر مەن ورىنداعان كۇيلەر تىڭدارمان قۇلاعىنىڭ قۇرىشىن قاندىردى. سونداي-اق «سارىارقا» حالىق مۋزىكالىق ءانسامبلى مەن «شالقىما» حالىق بي ءانسامبلى دە ونەر كورسەتىپ, جۇرتشىلىق ىقىلاسىنا بولەندى.