وزبەكستاننىڭ شىرشىق قالاسىندا مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ فيليالى اشىلادى. فيليالدىڭ اشىلۋى مەملەكەت باسشىسى قاسىم-جومارت توقاەۆ پەن وزبەكستان پرەزيدەنتى شاۆكات ميرزيوەۆتىڭ ءوزارا كەلىسسوزدەرىنىڭ قورىتىندىلارى نەگىزىندەگى ۋاعدالاستىق بويىنشا جانە Auezov University-ءنىڭ 80 جىلدىعىنا وراي جۇزەگە اسىرىلىپ وتىر.
مەملەكەت باسشىلارى كەلىسسوزدەرىنىڭ ناتيجەسى بويىنشا ارنايى جول كارتاسى ازىرلەنىپ, ءتيىستى جۇمىستار قولعا الىنعان بولاتىن. سوعان سايكەس قوس مەملەكەتتىڭ ۆەدومستۆولىق مينيسترلىكتەرى دەڭگەيىندە شىرشىق قالاسىندا مۇحتار اۋەزوۆ اتىنداعى ۋنيۆەرسيتەتتىڭ فيليالىن اشۋ تۋراسىندا ۇشجاقتى كەلىسىمگە قول قويىلدى.
Auezov University شەتەلدەگى فيليالدا 18 ءبىلىم بەرۋ باعدارلاماسى بويىنشا ستۋدەنتتەر وقىتپاق. اتاپ ايتقاندا, ەكونوميكا, قۇقىقتانۋ, حالىقارالىق قاتىناستار, بيوتەحنولوگيا, ەكولوگيا, اقپاراتتىق جۇيەلەر, اۆتوماتتاندىرۋ جانە باسقارۋ, ماشينا جاساۋ, كولىك, كولىكتىك تەحنيكا جانە تەحنولوگيالار, ەلەكترەنەرگەتيكا, بيورگانيكالىق زاتتاردىڭ حيميالىق تەحنولوگياسى, ورگانيكالىق زاتتاردىڭ حيميالىق تەحنولوگياسى, مۇناي-گاز ءىسى, مەتاللۋرگيا, تاماق قاۋىپسىزدىگى جانە ينجەنەريا, توقىما ماتەريالدارىنىڭ تەحنولوگياسى مەن جوبالانۋى, قۇرىلىس ماتەريالدارىن, بۇيىمدارىن جانە قۇراستىرىلىمدارىن ءوندىرۋ, قورشاعان ورتانى قورعاۋ جانە ءومىر قاۋىپسىزدىگى ماماندىقتارى بويىنشا ءبىلىم الماق.
– شىرشىق – وزبەكستانداعى ونەركاسىبى وركەندەگەن قالانىڭ ءبىرى. وڭىردە ماشينا جاساۋ, مەتالل وڭدەۋ جانە حيميا ونەركاسىبى سالالارى قارقىندى دامىعان. وسىنداي تەندەنتسيالاردى ەسكەرە وتىرىپ, Auezov University وڭىرگە قاجەتتى ءبىلىم بەرۋ باعدارلامالارى بويىنشا كادرلار دايارلاۋدى قولعا الماق, – دەيدى ۋنيۆەرسيتەت باسشىسى داريا قوجامجاروۆا.
ەسكە سالا كەتەيىك, ۋنيۆەرسيتەت 301 باكالاۆريات, ماگيستراتۋرا جانە دوكتورانتۋرا ءبىلىم باعدارلاماسى بويىنشا مامان دايارلايدى.