دانيا ءوز الاڭىندا دەس بەرمەدى

وسى جىلدىڭ ناۋرىز ايىندا ءوز ەلىمىزدە وتكەن ويىندا جەرلەستەرىمىز بۇكىل الەمدى تاڭعالدىرىپ, ازۋلى «دات ءديناميتىن» 3:2 ەسەبىمەن تىزە بۇكتىرىپ, تاماشا كامبەك جاساعان ەدى. بۇل ويىندا وتاندىق فۋتبول جانكۇيەرلەرى مەن ساراپشىلار جەرلەستەرىمىزدەن جەڭىس كۇتپەسە دە, ءبىر عاجايىپتىڭ بولارىنا ءۇمىت ارتىپ, كەم دەگەندە سىرت الاڭدا تەڭ ناتيجەگە قول جەتكىزەتىنىنە سەنىم بىلدىرگەن ەدى. وكىنىشكە قاراي, ءبارى ءبىز ويلاعانداي بولمادى. ءوز جانكۇيەرلەرىنىڭ الدىندا ويناعان دانيالىق فۋتبولشىلار بۇل جولى وسالدىق تانىتقان جوق. ارينە, بۇل جەڭىلىسكە قازاقستان قۇراماسىنىڭ باپكەرلەر قۇرامىن دا, فۋتبولشىلارىن دا ەش ايىپتاي المايمىز. ولار جەڭىس ءۇشىن بارىن سالدى, بىراق قارسىلاستىڭ دانيا ەكەنىن ۇمىتپاۋعا ءتيىسپىز. الەم فۋتبولىندا ەندى-ەندى ەڭسە تىكتەپ كەلە جاتقان قازاقستان قۇراماسىنان دانيالىقتار ەكىنشى رەت, ونىڭ ۇستىنە ءوز الاڭىندا جەڭىلەتىن بولسا, بۇل كۇن دات فۋتبولىنىڭ تاريح جىلناماسىنا قارا تاڭبا بو­لىپ باسىلىپ, جانكۇيەرلەرى بۇل جە­ڭىلىستى ءومىر باقي ۇمىتپايتىن ەدى. نامىسقا تىرىسقان كاسپەر يۋلمانن شاكىرتتەرى بار-جوعى ەكى دوپ ايىرماسىمەن عانا جەڭىسكە جەتتى.

كوپەنگاگەندەگى ماتچقا دەيىن فۋت­بول ماماندارىنىڭ كوبى دانيا قا­زاقستان قۇراماسىن بۇل جولى قال­پاقپەن ۇرىپ الادى, استاناداعى جەڭىلىستىڭ كەزدەيسوق ەكەنىن دالەلدەۋى ءۇشىن بۇل باسەكەدە ءىرى ەسەپپەن جەڭەدى, ءتىپتى قازاق فۋتبولشىلارىنا ءوز الاڭىنداعى جەڭىسى ءۇشىن پۇشايمان جەگىزەدى دەگەندەي باتىل پىكىر بىل­دىر­گەن ەدى. بىراق ءبىزدىڭ فۋتبولشىلار سول فۋتبول ساراپشىلارىنىڭ بول­جام-جوسپارىنىڭ كۇل-تالقانىن شى­عاردى. جەرلەستەرىمىز ەكىنشى تايم­دا ەسەپ ايىرماسىن قىسقارتىپ, شمەيحەل قورعاعان قاقپاعا ءجيى شابۋىل جاساپ كەتكەندە دانيالىق جانكۇيەرلەر­دىڭ دەمىن ىشكە تارتىپ, «اپىراي-اي, قازاقتار ءبىرىنشى گولىن سوقتى, ەندى تاعى دا كامبەك جاساپ كەتپەي مە ەكەن؟» دەگەن ويمەن ماتچتى سوڭىنا قاراي مازاسىز كۇيدە تاماشالاعانى جۇزدەرىنەن انىق بايقالىپ تۇردى.

ماتچتان ءبىر ساعات بۇرىن الاڭعا شىعاتىن فۋتبولشىلاردىڭ ءتىزىمى جاريالانعاندا اديەۆ بار نازارىن دانياعا ەمەس, بۇل ماتچتان بىرەر كۇن­نەن كەيىن وتەتىن فيندەرگە قار­سى ويىنعا اۋدارعانىن دەرەۋ تۇسىنە قويدىق. ويتكەنى قۇراما كاپيتانى اسحات تاعىبەرگەن, قاپتالداعى قور­­عاۋشى يان ۆوروگوۆسكي, اسلان داراباەۆ سەكىلدى نەگىزگى قۇرامنىڭ ويىن­­شىلارىنا دەمالىس بەرىپ, دوس­ما­عانبەتوۆ, قايىروۆ سەكىلدى قوسال­قى قۇرام ويىنشىلارىن ءبىرىنشى مينۋتتان باستاپ ويىنعا ارالاستىر­دى. سونداي-اق موگامەد اديەۆ بۇل ويىن­دا ۇلت­تىق قۇراما تىزگىنىن ۇستاعالى بەرى ءبىرىنشى رەت ءۇش شابۋىلشىمەن وينادى. تاكتيكالىق تۇرعىدا ءجيى قاتە­لەسە بەرمەيتىن باس باپكەردىڭ بۇل جول­عى ءجۇرىسى دە ءوز جەمىسىن بەرگەن سياق­تى. قارسىلاستاردىڭ العاش­قى مينۋت­تاردان باستاپ شابۋىلعا دەن قو­يىپ, قورعانىسقا باسا ءمان بەرمەيتى­نىن بولجاپ, قارسى شابۋىل­دا دا ءبىر ناتي­جە شىعارۋدى ويلاس­تىرعان ەدى.

كەزدەسۋدىڭ العاشقى جارتى ساعا­تىن جەرلەستەرىمىز جوسپارداعىداي وتكىزدى دەپ ايتۋعا بولادى. ءبىرىنشى گول سوعىلعانعا دەيىن قورعانىستاعى دا, شابۋىلداعى دا جىگىتتەر ءوز مىندەتىن ابىرويمەن اتقارىپ جاتتى. تەك ويىن­نىڭ 36-مينۋتىندا الاڭ يەلەرى ستاندارت جاعدايدان گول سوعىپ كەتكەننەن كەيىن جەرلەستەرىمىز ويىندى ۋىسىنان شىعارىپ العانداي بولدى. كريستيان ەريكسەننىڭ اسىرعان پاسىنا يواحيم اندەرسەن ءبىرىنشى جەتىپ, الاڭنان شىعىپ بارا جاتقان دوپتى ارىپتەسى يوناس ۆيننگە ءدال جەت­كىزدى. «ۆولفسبۋرگ» كلۋبىنىڭ جاس شابۋىلشىسى تەپكەن دوپ ەكى قور­عاۋشىمىزدىڭ ورتاسىنان ءوتىپ, قاقپا تورىنان تابىلدى. ال ءبىرىنشى تايمعا قوسىلعان قوسىمشا مينۋتتا روبەرت سكوۆ الاڭ يەلەرىنىڭ باسىمدىعىن ارتتىرىپ, كومانداسىن ۇزىلىسكە 2:0 ەسەبىمەن شىعاردى.

ەكىنشى تايمدا موگامەد اديەۆ الاڭعا ابات ايىمبەتوۆتىڭ ورنىنا اسحات تاعىبەرگەندى, قورعاۋشى تيمۋر دوسماعامبەتوۆتىڭ ورنىنا يان ۆورو­گوۆسكيدى شىعاردى. بۇل, ءبىر جاعىنان, فيندەرگە قارسى ويىن الدىندا ايىم­بەتوۆكە دەمالىس بەرۋ جانە تاعى­بەرگەن مەن ۆوروگوۆسكي بابىندا بولۋ ءۇشىن بەرىلگەن مۇمكىندىك ەدى. سونداي الاڭنىڭ ورتالىعىندا دوپ ۇستاپ, قاپتال ارقىلى شابۋىلعا جاڭا لەپ بەرۋ بولدى. كەزدەسۋدىڭ ەكىنشى بولىگى باس باپكەردىڭ جوسپارى بو­يىنشا ءوتتى. دەگەنمەن ەكىنشى تايم باستالعان بەتتە روبەرت سكوۆ ەكىنشى مارتە كوزگە ءتۇسىپ, ەسەپتى ۇلعايتا ءتۇس­تى. ارادا ون مينۋت وتكەندە يان ۆورو­گوۆسكي وڭ قاپتالدان باعدات قايى­روۆتىڭ اسىرعان دوبىنان كەيىن ەسەپ ايىرماسىن قىسقارتا الدى. بىراق ءارى قاراي ءبىزدىڭ جىگىتتەردە گول سوعاتىن مۇمكىندىك بولعانىمەن, ماتچ سوڭىنا دەيىن ويىن ەسەبى وزگەرىسسىز قالدى. وسىلايشا, قازاقستان قۇراماسى سىرت الاڭدا دانيا قۇراماسىنا 3:1 ەسەبىمەن جول بەردى.

سونداي-اق ءبىزدىڭ توپتاعى وزگە ويىن­دارعا توقتالار بولساق, سلوۆە­نيا ءوز الاڭىندا كەلەسى قارسىلاسى­مىز – فينليانديانى 3:0 ەسەبىمەن تىزە بۇكتىرسە, سولتۇستىك يرلانديا سان-ما­ري­نونى دا ءدال سونداي ەسەپپەن جەڭدى. جەتىنشى تۋردان سوڭ ن توبىندا سلوۆەنيا مەن دانيا قۇرامالارى كەزەكتى جەڭىسىنەن كەيىن 16 ۇپاي­مەن كوش باستاپ, قازاقستان مەن فين­ليان­ديادان (12 ۇپاي) ءتورت ۇپايعا العا ۇزاپ كەتتى. سولتۇستىك يرلانديا التى ۇپايمەن بەسىنشى ساتىعا جايعاسسا, التىنشى ورىنداعى سان-مارينودا سوقىر ۇپاي دا جوق.

17 قازانعا جوسپارلانعان سەگىزىن­شى تۋردا جەرلەستەرىمىز سىرت الاڭدا فينليانديامەن كەزدەسسە, دانيا سان-مارينوعا, سولتۇستىك يرلانديا سلو­ۆەنياعا قوناققا بارادى.