سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ دەپۋتاتتارى شاعىن جانە ورتا كاسىپكەرلىكتى دامىتۋ ماسەلەلەرى بويىنشا «اتامەكەن» ۇكپ جانە بيزنەس قاۋىمداستىعىنىڭ وكىلدەرىمەن كەزدەسۋ وتكىزدى.
ءىس-شاراعا توراعالىق ەتكەن سەناتور ءلاززات رىسبەكوۆا ءوز سوزىندە مەملەكەت باسشىسى وتاندىق بيزنەس وكىلدەرىمەن كەزدەسۋدە كاسىپكەرلىكتى ودان ءارى دامىتۋ جونىندە ناقتى مىندەتتەر قويعانىن اتاپ ءوتتى.
«شاعىن جانە ورتا كاسىپكەرلىكتى دامىتۋدىڭ بۇگىنگى كەزەڭىندە ناقتى شارالاردى, ونىڭ ىشىندە زاڭنامالىق شارالاردى ازىرلەۋ ماڭىزدى ەكەنى داۋسىز. ءبىز مۇددەلى مەملەكەتتىك ورگاندارمەن جانە بيزنەس وكىلدەرىمەن بىرنەشە رەت كەزدەسۋ وتكىزدىك. وسى ماسەلەنىڭ ەرەكشە ماڭىزىن ەسكەرە وتىرىپ, پارلامەنت سەناتى وسى جىلدىڭ 3 قاراشاسىندا قازاقستان رەسپۋبليكاسىنداعى شاعىن جانە ورتا كاسىپكەرلىكتى دامىتۋ تاقىرىبى بويىنشا ۇكىمەت ساعاتىن وتكىزۋدى جوسپارلاپ وتىر», دەدى سەناتور.
كەزدەسۋ بارىسىندا «قازاقستان ماشينا جاساۋشىلار وداعى» زتب باسقارما توراعاسىنىڭ ورىنباسارى ەرقانات ماقانوۆ بايانداما جاسادى. ول جاڭا سالىق كودەكسى اياسىندا مەتالل ونىمدەرىن يمپورتتايتىن وندىرۋشىلەردى ققس تولەۋدەن بوساتۋ تەتىگىن ەنگىزۋدى ۇسىندى. ال «قازاقستان رەسپۋبليكاسىنىڭ حيميكتەر وداعى» زتب ۆيتسە-پرەزيدەنتى تاحمينا ناعىمانوۆا وڭدەۋ ونەركاسىبىندە ورتا بيزنەستى دامىتۋ ماسەلەسىن كوتەردى. ول سالىق زاڭناماسىنا وڭدەۋشى ونەركاسىپ سۋبەكتىلەرىنە بولشەك ساۋدا سالىعىنا ۇقساس ارنايى سالىق ءتارتىبىن قاراستىرۋدى ۇسىندى.
جيىندا ەلىمىزدەگى شاعىن جانە ورتا بيزنەستىڭ ءتيىمدى دامۋىن تەجەيتىن جۇيەلى ماسەلەلەر مەن كەدەرگىلەر تۋرالى, سونداي-اق ولاردى شەشۋ جونىندەگى ناقتى شارالار جونىندە ايتىلدى. ولاردىڭ ىشىندە سالىق سالۋ, شاعىن جانە ورتا بيزنەس سۋبەكتىلەرىنە قارجىنىڭ قولجەتىمدىلىگىن ۇلعايتۋ, ونىڭ ىشىندە ەكىنشى دەڭگەيدەگى بانكتەر ارقىلى نەسيە بەرۋ, مەملەكەتتىك قولداۋدىڭ تيىمدىلىگىن قامتاماسىز ەتۋ جانە باسقا دا مۇمكىندىكتەر تۋرالى ءسوز بولدى.
دەپۋتاتتار كەزدەسۋدە ايتىلعان ۇسىنىستار ۇكىمەتكە جانە مۇددەلى مەملەكەتتىك ورگاندارعا جىبەرىلەتىن ۇسىنىمداردا كورىنىس تاباتىنىن اتاپ ءوتتى.