وبلىس اكىمدىگىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ مىندەتىن اتقارۋشى ۆلاديسلاۆ لۋكيننىڭ ايتۋىنا قاراعاندا, بۇگىنگى تاڭدا كومىردىڭ باعاسى تۇراقتى ەمەس. تۇرلەرى مەن ساپاسىنا قاراي ونىڭ ءبىر تونناسىنىڭ باعاسى 12 500 تەڭگەدەن 20 مىڭ تەڭگەگە دەيىن قۇبىلىپ تۇر.
ماسەلەن, قازىر «ەكىباستۇز كومىرىنىڭ» باعاسى 12 500 تەڭگەدەن 14 000 مىڭ تەڭگەگە دەيىن وزگەرىپ تۇر. «شۇباركول كومىرىنىڭ» باعاسى 16 600 تەڭگەدەن 19 000 تەڭگەگە دەيىن قۇبىلادى. ەڭ قىمباتى – «قاراجىرا كومىرى», ونىڭ باعاسى 20 مىڭ تەڭگەگە دەيىن بارادى. ال «مايكوبە كومىرى» 15 مىڭ تەڭگەدەن 18 مىڭ تەڭگەگە دەيىن وزگەرۋدە. ۆ.لۋكيننىڭ ايتۋىنا قاراعاندا, كومىردىڭ باعاسى شەكتەن شىعىپ كەتسە, اكىمدىك باسەكەلەستىكتى قورعاۋ جانە دامىتۋ جونىندەگى قۇزىرەتتى ورگانعا تاپسىرما بەرىپ, قىمباتتاتۋدىڭ نەگىزدىلىگىن تەكسەرتەدى.
وبلىستىڭ اۋىلدىق ەلدى مەكەندەرىندەگى جەكەمەنشىك ۇيلەردە تۇراتىن تۇرعىندارعا 419 مىڭ توننا كومىر قاجەت بولسا, وكىنىشكە قاراي, سونىڭ 200 مىڭ تونناسى عانا جەتكىزىلگەن. بۇل ماسەلە الاڭداۋشىلىق تۋدىرادى. وبلىس اكىمدىگى مەن «جۇك تاسىمالداۋ» اق كومىر تاسۋشى ۆاگونداردىڭ كەلۋىنە مونيتورينگ جاساپ وتىر. كەلگەن كومىردىڭ وبلىس ايماقتارىنا تاراتىلۋى ءۇشىن تاسىمالداۋشىلارمەن 228 مىڭ توننانى تاسۋعا كەلىسىمشارت جاسالعان.
وبلىس اۋماعىندا كومىر قابىلدايتىن 32 تىرەك بار, قازىر ولاردا قوردالانعان كومىردىڭ كولەمى – 51 مىڭ توننا. اۋىل تۇرعىندارىنا كومىر تاراتۋ جەلتوقسان ايىنا دەيىن جۇرگىزىلەدى.
«وبلىس ورتالىعىن جىلۋمەن قامتاماسىز ەتەتىن «سەۆكازەنەرگو» اق قارايتىن جەو-2 قويمالارىندا قازىر 215 مىڭ توننا كومىر, 600 مىڭ توننادان اسا مازۋت جيناقتالعان, بۇل جىلۋ-ەلەكتر ستانساسىنىڭ ءبىر ايعا جاقىن جۇمىس ىستەۋىنە جەتەدى. قالعان كومىر كەستەگە سايكەس كەلىپ تۇسەدى», دەيدى ۆ.لۋكين.