اوسشك حاتشىلىعى استانادا ۇيىمنىڭ قۇرىلعانىنا 31 جىل تولۋىنا وراي ءداستۇرلى قابىلداۋ جيىنىن وتكىزدى. 1992 جىلى 5 قازاندا بۇۇ باس اسسامبلەياسىنىڭ سەسسياسى كەزىندە ەلىمىز ازياداعى ءوزارا ىقپالداستىق جانە سەنىم شارالارى جونىندەگى كەڭەس قۇرۋ تۋرالى باستاما كوتەرگەن بولاتىن.
ءىس-شاراعا پارلامەنت دەپۋتاتتارى مەن پرەزيدەنت اكىمشىلىگى مەن ۇكىمەتتىڭ جاۋاپتى قىزمەتكەرلەرى, سىرتقى ىستەر مينيسترلىگىنىڭ باسشىلىعى, شەتەلدىك ەلشىلەر مەن ديپلوماتيالىق كورپۋس وكىلدەرى, سونداي-اق اكادەميالىق توپ مۇشەلەرى مەن بيزنەس-قاۋىمداستىق وكىلدەرى قاتىستى.
اوسشك باس حاتشىسى قايرات سارىباي جينالعانداردى قۇتتىقتاپ, وتكەن جىلداعى نەگىزگى جەتىستىكتەرگە توقتالدى. ونىڭ ايتۋىنشا, اوسشك ەلدەرىنىڭ سىرتقى ىستەر مينيسترلەرى قاتىسقان اۋقىمدى تالقىلاۋلاردان كەيىن ۇيىم ترانسفورماتسياسىنىڭ جول كارتاسى ازىرلەنگەن. بۇل ىنتىماقتاستىق الاڭىن جاڭا دەڭگەيگە شىعارۋدى كوزدەيتىن سەگىز باعىتتى قامتىعان. ول سونداي-اق مۇشە مەملەكەتتەردىڭ اوسشك ۇدەرىسىنە, اسىرەسە ەكونوميكالىق, ەكولوگيالىق ولشەمدەرگە جانە جاڭا سىن-قاتەرلەر مەن قاۋىپ-قاتەرلەرگە بەلسەندى ارالاسىپ, شەشىمىن تابۋعا ۇمتىلىسىن جوعارى باعالادى. باس حاتشى قىتاي مەن تاجىكستان ەلشىلىكتەرىنە وسى ءىس-شاراعا قوسقان جومارت ۇلەسى ءۇشىن العىسىن ءبىلدىردى.
بۇدان كەيىن ءسوز العان سىرتقى ىستەر ءمينيسترىنىڭ ورىنباسارى الىبەك باقاەۆ قازاقستاننىڭ توراعالىعى اتىنان اوسشك مۇشەلەرىن قۇتتىقتادى. «اوسشك مۇشەلەرى باسەكەلەستىكتەن گورى ىنتىماقتاستىقتى تاڭدايدى. ءححى عاسىردى ازيا عاسىرىنا اينالدىرۋعا ساياسي ەرىك-جىگەرىن باعىتتاۋعا كومەكتەسەتىنىنە سەنىمدىمىن», دەدى ءا.باقاەۆ.
سونىمەن قاتار ۆەدومستۆو باسشىسىنىڭ ورىنباسارى سالتاناتتى ءساتتى پايدالانىپ, اوسشك باس حاتشىسىنىڭ ورىنباسارى, قىتايلىق ديپلومات چي فان حانىمدى «شاپاعات» مەدالىمەن ماراپاتتادى. بۇل مەملەكەتتىك ناگرادا قازاقستان پرەزيدەنتىنىڭ جارلىعىمەن چي فان حانىمنىڭ وسى قىزمەتتەگى ءۇش جىلدىق قىزمەتى جانە اوسشك ۇدەرىسىن دامىتۋعا قوسقان جەكە ۇلەسى ءۇشىن سىڭىرگەن ەڭبەگى ءۇشىن بەرىلدى.
ديپلوماتيالىق كورپۋستىڭ دەكانى, پالەستينا ەلشىسى دوكتور مونتاسەر ابۋ زەيد اوسشك حاتشىلىعىن وتكەن جىلعى تابىسىنا ريزاشىلىعىن ءبىلدىردى. استاناداعى ديپلوماتيالىق وكىلدىكتەر اتىنان العىس رەتىندە چي فان حانىمعا اوسشك باس حاتشىسىنىڭ ورىنباسارى رەتىندەگى تاماشا قىزمەتى ءۇشىن العىس ايتىپ, سىيلىق تابىس ەتتى.
باس حاتشىنىڭ ورىنباسارى چي فان ماراپات الىپ تۇرعان كەزىندەگى سوزىندە قازاقستان پرەزيدەنتى قاسىم-جومارت توقاەۆ مىرزاعا, اوسشك توراعالىعىنا, قىتاي حالىق رەسپۋبليكاسىنا جانە اوسشك باس حاتشىسىنا العىسىن ءبىلدىردى. سونداي-اق الماتى ماڭىندا ورنالاسقان, تەڭىز دەڭگەيىنەن 4317 مەتر بيىكتەگى ساتباەۆ شىڭىنا اوسشك جاساعان ساپاردىڭ ارتىقشىلىعىن اتاپ ءوتتى.
ۇيىمنىڭ 31 جىلدىعىنا ارنالعان ءىس-شارا اوسشك-گە مۇشە مەملەكەتتەردىڭ, بايقاۋشىلاردىڭ, سەرىكتەس ۇيىمداردىڭ جانە ديپلوماتيالىق كورپۋستىڭ تۇراقتى ۇستانىمدارىن راستايتىن وزگەرىستىڭ باستالۋى رەتىندە قاراستىرىلاتىنى دا ايتىلدى. سونىمەن قاتار ءىس-شارا قاتىسۋشىلاردىڭ اوسشك-ءنىڭ بەس باعىتى بويىنشا ازياداعى وڭىرلىك ىنتىماقتاستىقتى دامىتۋدى جانە ۇيىمنىڭ ينستيتۋتسيونالدىق تۇرعىدا نىعايۋىن قولدايتىنىن اتاپ ءوتتى.