ەلوردادا كەيىنگى ءۇش جىلدان بەرى تۇراقتى تۇردە وتكىزىلىپ كەلە جاتقان تەننيستەن «Astana Open ATر 250» ءتۋرنيرى ءوز مارەسىنە جەتتى. بيىلعى جارىس قىتاي استاناسى بەيجىڭدە الاۋى تۇتانعان ATP 500 دوداسىمەن قاتار وتكەنىنە قاراماستان, استاناداعى باسەكەگە الەمدىك رەيتينگتە الدىڭعى قاتاردا تۇرعان ەڭ مىقتى دەگەن تەننيسشىلەر قاتىستى.
اتاپ ايتار بولساق, جۋىردا عانا گەرمانيانىڭ گاللە قالاسىندا وتكەن اتر 500 ساناتىنداعى ءتۋرنيردىڭ جەڭىمپازى, الەمدىك رەيتينگتە 26-ورىندا تۇرعان ەلىمىزدىڭ ەرلەر قۇراماسىنىڭ كوشباسشىسى الەكساندر بۋبليك, «ۇلكەن دۋلىعا» تۋرنيرلەرىنىڭ ءۇش دۇركىن جەڭىمپازى, بەيجىڭ وليمپياداسىنىڭ چەمپيونى, ATP ساناتىنداعى 19 ءتۋرنيردىڭ باس جۇلدەگەرى, دەۆيس كۋبوگىنىڭ يەگەرى جانە الەمنىڭ بۇرىنعى ءۇشىنشى راكەتكاسى شۆەيتساريالىق ستەن ۆاۆرينكا, «ۇلكەن دۋلىعا» جانە ATP ساناتىنداعى 17 ءتۋرنيردىڭ جەڭىمپازى اۋستريالىق دومينيك تيم, الەمنىڭ 32-راكەتكاسى سەباستيان كوردا (اقش), رەيتينگتە 40-ورىندا تۇرعان الەكسەي پوپىرين (اۋستراليا) جانە تاعى باسقا تەننيسشىلەر ەلورداداعى جارىستىڭ كورىگىن قىزدىردى.
سول سپورتشىلاردىڭ ىشىندە دۇنيەجۇزىلىك رەيتينگتە 34-ورىندا تۇرعان فرانتسيالىق ادريان ماننارينونىڭ باعى جاندى. سەگىز كۇنگە جالعاسقان باسەكەدە بارلىق قارسىلاسىنان باسىم تۇسكەن ماننارينو بيىلعى «Astana Open ATر 250» ءتۋرنيرىنىڭ جەڭىمپازى اتاندى. باس جۇلدە ءۇشىن وتكەن باسەكەدە ادريان الەمنىڭ 28-راكەتكاسى امەريكالىق سەباستيان كوردانى 4:6, 6:3, 6:2 ەسەبىمەن تىزە بۇكتىردى. فرانتسيالىق تەننيسشى «Astana Open ATر 250» ءتۋرنيرىنىڭ فينالىنا ەكىنشى مارتە شىعىپ, ءبىرىنشى تيتۋلىنا قول جەتكىزدى. وسىدان ءۇش جىل بۇرىن, ياعني 2020 جىلى ەلوردادا العاش رەت ۇيىمداستىرىلعان باسەكەنىڭ فينالىندا ول اۋستراليالىق دجون ميلمانعا جول بەرگەن ەدى.
ادريان ماننارينونىڭ بيىلعى «Astana Open ATر 250» دوداسىنداعى ءجۇرىپ وتكەن جولىنا ۇڭىلەر بولساق, ول باستاپقى بəسەكەلەردە وتانداسى ارتۋر ريندەركنەح (7:6, 6:2) پەن 21 جاستاعى رەسەيلىك اليبەك كاچمازوۆتى (6:2, 5:7, 6:3) جارىس جولىنان ىعىستىرسا, شيرەك فينالدا اۋستريالىق يۋري روديونوۆتان باسىم ءتۇستى – 6:1, 7:6. ال جارتىلاي فينالدا تاعى ءبىر اۋستريالىق تەننيسشى سەباستيان وفنەردى جەڭىپ (6:4, 6:2), فينالعا جولداما العان-دى.
سونداي-اق ەلورداداعى جارىستىڭ جۇپتىق باسەكەسىندە امەريكالىقتار – ناتانيەل لەممونس پەن دجەكسون ۋيتروۋ توپ جاردى. مۇحيتتىڭ ارعى بەتىنەن كەلگەن تەننيسشىلەر شەشۋشى ماتچتا حورۆاتيالىق ماتە پاۆيچ پەن اۋستريالىق دجون پيرس جۇبىن اسا تارتىستى وتكەن كەزدەسۋدە 7:6 (7:4), 7:6 (9:7) ەسەبىمەن جەڭدى. ناتانيەل لەممونس پەن دجەكسون ۋيتروۋ 2021 جىلى استانادا وتكەن «ATP Challenger 125» سەرياسىنىڭ تۋرنيرىندە دە جەڭىسكە جەتكەن ەدى.
وكىنىشكە قاراي, ءوز ەلىمىزدە وتكەن تۋرنيردە وتانداستارىمىز جەرگىلىكتى جانكۇيەرلەردى جارقىن ويىندارىمەن قۋانتا المادى. الەكساندر بۋبليك ەكىنشى اينالىمدا اۋستريالىق سەباستيان وفنەردەن 6:4, 6:2 ەسەبىمەن جەڭىلسە, ميحايل كۋكۋشكين العاشقى اينالىمدا-اق ءسۇرىندى. ول پورتۋگاليالىق نۋنو بورگەستىڭ وسال تۇسىن تابا المادى – 7:5, 6:7. 4:6. جۇپتىق سىندا باق سىناعان الەكساندر نەدوۆەسوۆ ەكۆادور وكىلى گونسالو ەسكوبارمەن بىرگە شيرەك فينالعا دەيىن جەتسە, ا.بۋبليك پەن ا.گولۋبەۆ العاشقى اينالىمنان ارىگە اسا المادى.
«Astana Open ATر 250» ءتۋرنيرىنىڭ ستاتيستيكاسىنا توقتالار بولساق, ەلورداداعى «Beeline Arena» ۇلتتىق تەننيس ورتالىعىندا وتكەن سەگىز كۇندىك باسەكەنى 16 مىڭنان اسا جانكۇيەر تاماشالاعان ەكەن. سونداي-اق تۋرنير اياسىندا تەننيسشىلەر ءداستۇرلى تۇردە قازاقستان تەننيس فەدەراتسياسى ۇيىمداستىراتىن الەۋمەتتىك ماڭىزدى ءىس-شارالارعا قاتىستى. ستەن ۆاۆرينكا, دومينيك تيم, الەكساندر بۋبليك جانە سەباستيان كوردا «اسىل ميراس» اۋتيزم ورتالىعىنا بارسا, ءتۋرنيردىڭ فيناليستەرى ادريان ماننارينو مەن سەباستيان كوردا قالىپتاسقان ءداستۇر بويىنشا ۇلتتىق تەننيس ورتالىعى جانىنداعى «چەمپيوندار اللەياسىنا» اعاش وتىرعىزدى.