بەيسەنبى ەل سپورتشىلارى ءۇشىن ءساتتى كۇندەردىڭ ءبىرى بولدى. وسىعان دەيىن حانچجوۋداعى سايىستاردا جەرلەستەرىمىز ءبىر كۇندە 3 التىن جەڭىپ كورمەگەن ەدى. ال كەشە ءانۇرانىمىز 3 مارتە قىتاي تورىندە شىرقالدى. التىن مەدال بۇدان دا كوپ بولار ما ەدى, ەگەر دە چەمپيونداردان بولەك فينالعا شىققان كاراتەشىلەر مەن بوكسشىلارىمىز جەڭىسكە جەتكەندە. جالپى, كەشە قازاقستان قورجىنىنا 3 التىن, 4 كۇمىس جانە 3 قولا مەدال ءتۇستى.
الدىمەن وتاندىق ۆەلوشاباندوز ەۆگەني فەدوروۆ ۆەلوسپورتتان توپتىق جارىستا مارە سىزىعىن ءبىرىنشى بولىپ كەسىپ, ازيا ويىندارىنىڭ التىن جۇلدەگەرى اتاندى. 207,7 شاقىرىمعا سوزىلعان توپتىق سايىستا ەكىنشى بولىپ مارە سىزىعىن تاعى ءبىر وتانداسىمىز الەكسەي لۋتسەنكو كەسىپ ءوتتى. ايتا كەتەيىك, بۇعان دەيىن ازيا ويىندارىنىڭ 4 دۇركىن چەمپيونى بولعان الەكسەي لۋتسەنكو مارەگە جاقىن قالعاندا ءوزىنىڭ ارىپتەسى ەۆگەني فەدوروۆكە جولىن بەرىپ, مارتتىك تانىتتى. ە.فەدوروۆ 2018 جىلى جاسوسپىرىمدەر اراسىندا وليمپيادا چەمپيونى, 2019 جىلى عانا ەرەسەكتەر دۋىنا ءوتتى. ول 23 جاسقا دەيىنگىلەر اراسىندا الەم چەمپيونى, 4 دۇركىن ازيا جەڭىمپازى.
دجيۋ-دجيتسۋدان ەل نامىسىن قورعاعان نۇرجان باتىربەكوۆ فينالدىق سايىستا ەكى دۇركىن ازيا چەمپيونىن جەڭىپ, جانكۇيەرلەردى ءبىر قۋانتىپ تاستادى. الەم چەمپيوناتىنىڭ قولا جۇلدەگەرى ن.باتىربەكوۆ (69 كگ) جارىس بارىسىندا وساما كانديلدى – 9:0, رامشەد ابدۋللاەۆتى – 7:0, سەونگحۋەون ءجۋدى 5:2 ەسەبىمەن جەڭدى. فينالدىق ايقاستا موحامەد السۋۆايديدەن 4:2 ەسەبىمەن ايلاسىن اسىردى.
كاراتەشى نۇرقانات اجىقانوۆتى توكيو وليمپياداسىنان بەرى تانيمىز. جاپون جەرىندە جولى بولمادى دەمەسەڭىز, جەرلەسىمىز ازيا, الەم چەمپيوناتتارىندا جۇلدە الىپ ءجۇر. سوندىقتان نۇرقاناتتىڭ الدىندا ازيا ويىندارىندا توپ جارۋ ماقساتى تۇردى جانە جەرلەسىمىز ءۇمىتتى اقتادى. كاراتەشىمىز ازيا ويىندارىنىڭ العاشقى اينالىمىندا ماحاممەد شەكحۋ الامدى (نەپال) 5:0 ەسەبىمەن ۇتسا, شيرەك فينالدا قىرعىز سپورتشىسى نازىم نۇرلانوۆتان 3:1 ەسەبىمەن باسىم ءتۇستى. ال جارتىلاي فينالدا نۇرقانات مالايزيا وكىلى راگونازان شارمەندراندى 4:3 ەسەبىمەن جەڭدى. ال فينالدا يوردانيالىق حاسان ماسارشەيحتى 8:0 ەسەبىمەن ويسىراتا ۇتتى.
سونداي-اق كەشە لاۋرا الىقۇل (كاراتە), الەكسەي لۋتسەنكو (ۆەلوسپورت), قامشىبەك قوڭقاباەۆ (بوكس), كارينا يبراگيموۆا (بوكس) كۇمىس مەدالدى جەڭىپ الدى. ال ءالىمحان سىزدىقوۆ (گرەك-ريم), مانسۇر حابيبوللا مەن الديار سەرىك (دجيۋ-دجيتسۋ) قولا جۇلدەنى قاناعات تۇتتى.
بەيرەسمي جالپىكوماندالىق ەسەپتە قازاقستان قۇراماسى 8 التىن, 15 كۇمىس جانە 38 قولا مەدالمەن 11-ورىندا كەلەدى. بۇگىن جارىس جولىنا شىعاتىنداردىڭ قاتارىندا يسلام ويىندارىنىڭ چەمپيونى قايسار الپىسباي مەن اسەل قاناي باستاعان كاراتەشىلەر, اشىق سۋدا 10 شاقىرىم قاشىقتىقتاعى ازيا چەمپيوناتىنىڭ جۇلدەگەرى ماريا فەدوتوۆا مەن ديانا تاسجانوۆا, راحات قالجان باستاعان ەركىن كۇرەس شەبەرلەرى, ايەلدەر كۇرەسى, كوركەم گيمناستيكا, دجيۋ-دجيتسۋ قىز-جىگىتتەرى بيىك تۇعىردان كورىنۋگە تالاسادى.