مۇعالىمدەر كۇنى – ءبىلىم بەرۋ قىزمەتكەرلەرىنىڭ كاسىبي مەرەكەسى. بيىل ەلىمىزدىڭ ۇستازدارى مەن تاربيەشىلەرى ءتول مەرەكەسىن 5 قازاندا اتاپ وتەدى, دەپ حابارلايدى Egemen.kz.
بۇعان دەيىن مەملەكەتتىك مەرەكەلەر تىزبەسى بويىنشا رەسپۋبليكادا مۇعالىمدەر كۇنى قازان ايىنىڭ ءبىرىنشى جەكسەنبىسىندە اتالىپ وتىلەتىن. قازىر بۇل داتانى تويلاۋ 5 قازاندا الەمنىڭ 100-دەن استام ەلىندە اتاپ وتىلەتىن دۇنيەجۇزىلىك مۇعالىمدەر كۇنىمەن سايكەس كەلەدى.
حالىقارالىق مەرەكەنى تويلاۋ كۇنى سوناۋ 1966 جىلى پاريجدە وتكەن مۇعالىمدەردىڭ مارتەبەسى تۋرالى ارنايى ۇكىمەتارالىق كونفەرەنتسيادا بەكىتىلگەن. شارا ناتيجەسىندە يۋنەسكو مەن حالىقارالىق ۇيىم وكىلدەرى «مۇعالىم مارتەبەسىنە قاتىستى ۇسىنىستارعا» قول قويدى.
كاسىبي مەرەكەدە ۇستازدار مەن تاربيەشىلەرگە قۇرمەت گراموتالارى تابىس ەتىلىپ, مەكتەپتەردە بايقاۋلار, كونتسەرتتەر, باسقا دا ءتۇرلى مەرەكەلىك شارالار ۇيىمداستىرىلادى. بۇكىل الەمدە جانە قازاقستاندا مۇعالىمدەردى ەلىمىزدىڭ جوعارى لاۋازىمدى تۇلعالارى, مەملەكەتتىك جانە جەرگىلىكتى اتقارۋشى ورگانداردىڭ باسشىلارى قۇتتىقتايدى.
«احمەت بايتۇرسىن ۇلى اتىنداعى «تالداۋ» ءبىلىم بەرۋدى زەرتتەۋ جانە باعالاۋ ۇلتتىق ورتالىعى» اق مالىمەتتەرى بويىنشا بۇگىندە قازاقستان مەكتەپتەرىندە 340 958 مۇعالىم جۇمىس ىستەيدى. ونىڭ 66 648-ءى ەرلەر, 274 310-ى ايەلدەر.
2023 جىلدىڭ 1 قىركۇيەگىنەن باستاپ مەكتەپكە دەيىنگى تاربيە مەن وقىتۋ پەداگوگتەرىنىڭ جالاقىسى تاعى 30 پايىزعا ءوستى. 220 مىڭنان استام قازاقستاندىق پەداگوگ اتتەستاتسيا ناتيجەلەرى بويىنشا تاعايىندالعان بىلىكتىلىك ساناتى ءۇشىن جالاقىسىنا ۇستەمەاقى الادى. مىسالى, شەبەر مۇعالىم 50%, مۇعالىم-زەرتتەۋشى 40%, ساراپشى مۇعالىم 35%, وقىتۋشى-مودەراتور 30% الادى. جالپى رەسپۋبليكا بويىنشا پەداگوگ-مودەراتورلار سانى – 73 820, ساراپشىلار – 81 168, عىلىمي قىزمەتكەرلەر – 71 141, ماگيسترلەر – 3482.
10 جىلدان بەرى قازاقستاندا جىل سايىن ارنايى «ۇزدىك مۇعالىم» بايقاۋى ۇيىمداستىرىلىپ كەلەدى. وعان مەنشىك نىسانىنا جانە ۆەدومستۆولىق باعىنىستىلىعىنا قاراماستان مەكتەپكە دەيىنگى, ورتا, تەحنيكالىق جانە كاسىپتىك ءبىلىم بەرۋ ۇيىمدارىنىڭ شتاتتىق پەداگوگيكالىق ۇجىمى قاتىسادى. بايقاۋ ءۇش كەزەڭدە وتەدى: ءى — اۋداندىق/قالالىق دەڭگەي, ءىى — وبلىستىق دەڭگەي; III – رەسپۋبليكالىق دەڭگەي. جىل سايىن كاسىپقويلار «ۇزدىك پەداگوگ» اتاعىنىڭ يەگەرى اتانىپ, وسىعان وراي سالتاناتتى تۇردە «ۇزدىك پەداگوگ» توسبەلگىسىن, سونداي-اق 3 ميلليون تەڭگە كولەمىندە اقشالاي سىياقى الادى.