پارلامەنت سەناتىندا «مۇگەدەكتىگى بار ادامداردىڭ وزەكتى ماسەلەلەرى جانە ولاردى شەشۋ جولدارى» اتتى دوڭگەلەك ۇستەل ءوتتى. ءىس-شاراعا سەنات, ءماسليحات دەپۋتاتتارى, مينيسترلىكتەردىڭ, وبلىس اكىمدىكتەرىنىڭ, حالىقارالىق ۇيىمداردىڭ, ساراپشىلار قاۋىمداستىعىنىڭ جانە قوعامدىق ۇيىمداردىڭ باسشىلىعى مەن وكىلدەرى قاتىستى.
پالاتا سپيكەرى ماۋلەن اشىمباەۆ ءوز سوزىندە مۇگەدەكتىگى بار ازاماتتارعا جان-جاقتى قولداۋ كورسەتۋدىڭ ماڭىزدى ەكەنىن ايتتى. سونداي-اق ول ادىلەتتى قازاقستان دەگەنىمىز – ءبىرىنشى كەزەكتە, ينكليۋزيۆتى قوعام ەكەنىنە نازار اۋداردى. وسىعان وراي سەناتتا ينكليۋزيا جونىندەگى كەڭەس قۇرىلماق. كەڭەس مۇشەلەرى اتالعان باعىتتا ءتيىستى ۇسىنىستار ازىرلەپ, ولاردى ىسكە اسىرۋ جولدارىن تالقىلايدى.
«سەنات جانىنان ينكليۋزيا جونىندەگى كەڭەس قۇرۋ قازاقستاندا تولىققاندى ينكليۋزيۆتى ورتا قالىپتاستىرۋعا ىقپال ەتۋدى كوزدەيدى. كەڭەس اياسىندا ساپالى جانە ءتيىمدى زاڭنامالىق ۇسىنىستار ازىرلەنەدى دەپ سەنەمىز. جالپى, مۇمكىندىگى شەكتەۋلى جاندار ءۇشىن كەدەرگىسىز ورتا قالىپتاستىرۋ جانە ولاردى الەۋمەتتىك قورعاۋ مەملەكەتتىڭ نەگىزگى مىندەتتەرىنىڭ ءبىرى. وسى ورايدا مەملەكەت باسشىسىنىڭ تاپسىرماسىمەن ەلىمىزدە الەۋمەتتىك كودەكس قابىلداندى. «مۇگەدەكتەردىڭ قۇقىقتارى تۋرالى كونۆەنتسياعا» فاكۋلتاتيۆتىك حاتتاما راتيفيكاتسيالاندى. سونداي-اق مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە تۇرمىس ساپاسىن جاقسارتۋ جونىندەگى 2025 جىلعا دەيىنگى ۇلتتىق جوسپار ىسكە اسىرىلىپ جاتىر. مۇگەدەكتىككە قاتىستى ماسەلەلەردى شەشۋ كەزىندە مەديتسينالىق جانە قايىرىمدىلىق تاسىلدەر پاراديگماسىنان باس تارتۋ قاجەت. مۇمكىندىگى شەكتەۋلى جانداردىڭ قۇقىقتارىن قورعاۋدىڭ, ولاردى قوعامعا بەيىمدەۋدىڭ, جۇمىسقا ورنالاستىرۋدىڭ جانە ءوز الەۋەتىن ىسكە اسىرۋدىڭ ءتيىمدى جۇيەسىن قۇرۋ كەرەك. وسىنداي ناقتى ىستەر مۇگەدەكتىگى بار ازاماتتاردىڭ ءومىر ءسۇرۋ ساپاسىن جاقسارتا تۇسەتىنى ءسوزسىز», دەدى م.اشىمباەۆ.
سەنات توراعاسى بالالار اراسىنداعى مۇگەدەكتىك ماسەلەسىنە جەكە توقتالىپ, ەلىمىزدە مەديتسينالىق قىزمەتتەردىڭ ساپاسىن ارتتىرۋعا جانە ەكولوگيالىق جاعدايدى جاقسارتۋعا قاتىستى نەگىزگى مىندەتتەردى اتاپ ءوتتى. سونداي-اق ماۋلەن اشىمباەۆ مۇمكىندىگى شەكتەۋلى ازاماتتاردىڭ ورتاعا تولىق بەيىمدەلۋىنە, ەڭبەككە جارامدىلاردى جۇمىسپەن قامتۋعا, ەرەكشە قاجەتتىلىگى بار بالالاردىڭ الەۋەتىن تولىق اشۋعا جاعداي جاساۋ ماڭىزدى باعىتتاردىڭ قاتارىندا ەكەنىن تىلگە تيەك ەتتى.
كەزدەسۋ بارىسىندا ايتىلعان ۇسىنىستار مەن باستامالار «مۇگەدەكتىگى بار ادامداردىڭ قۇقىقتارى تۋرالى» زاڭ جوباسىن ازىرلەۋگە تىڭ سەرپىن بەرۋگە ءتيىس. جيىندا مەملەكەتتىك ورگانداردىڭ جۇمىسىن ۇيلەستىرەتىن جانە مۇگەدەكتىگى بار ادامداردىڭ قۇقىقتارىن ىسكە اسىرۋعا باعىتتالعان ساياساتتى جۇرگىزەتىن جەكە ورگان قۇرۋ ماسەلەسى دە ءسوز بولدى. الداعى ۋاقىتتا ساراپشىلار بۇل باستامانى زەردەلەيدى. دوڭگەلەك ۇستەلدە بارلىق دەڭگەيدەگى اكىمدەردىڭ رەيتينگىنە مۇگەدەكتىگى بار ادامداردىڭ قۇقىقتارىنا بايلانىستى شارالاردى ىسكە اسىرۋ ءۇشىن جاۋاپكەرشىلىكتى ەنگىزۋ جانە مۇگەدەكتىگى بار ادامداردىڭ قۇقىقتارىن ىسكە اسىرۋ بويىنشا تاۋەلسىز مونيتورينگتىك تەتىك قۇرۋ سياقتى ۇسىنىستار دا ايتىلدى.