سىرتقى ىستەر مينيسترلىگىندە وتكەن ءباسپاسوز جيىنىندا پرەمەر-ءمينيستردىڭ ورىنباسارى – سىرتقى ىستەر ءمينيسترىنىڭ نيۋ-يورككە ساپارىنىڭ قورىتىندىسى ايتىلىپ, الداعى جۇمىس جوسپارى جاريالاندى.
ۆەدومستۆونىڭ ارنايى وكىلى ايبەك سمادياروۆ بيىل 17-22 قىركۇيەكتە پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ بۇۇ باس اسسامبلەياسىنىڭ نيۋ-يورك قالاسىندا وتكەن 78-سەسسياسىنىڭ جوعارى دەڭگەيدەگى سەگمەنتىنە قاتىسقانىن ايتتى. «بۇۇ باس اسسامبلەياسىنىڭ الاڭىندا ءسىم باسشىسى بىرقاتار ءىس-شاراعا قاتىسىپ, سىرتقى ىستەر مينيسترلەرىمەن جانە حالىقارالىق ۇيىمداردىڭ باسشىلارىمەن كەلىسسوزدەر جۇرگىزدى», دەدى ول.
ارنايى وكىلدىڭ ايتۋىنشا, قازاقستاننىڭ توراعالىعىمەن شانحاي ىنتىماقتاستىق ۇيىمىنا قاتىسۋشى ەلدەر سىرتقى ىستەر مينيسترلەرىنىڭ كەڭەسى وتىرىسى وتكەن. سونىمەن قاتار ۇجىمدىق قاۋىپسىزدىك تۋرالى شارت ۇيىمى, ازياداعى ءوزارا سەنىم شارالارى كەڭەسى, تۇركى مەملەكەتتەرى ۇيىمى مۇشەلەرىنىڭ سىرتقى ۆەدومستۆو باسشىلارى باس قوسقان. بۇدان بولەك, يسلام ىنتىماقتاستىعى ۇيىمىنىڭ مينيسترلىك دەڭگەيدەگى كەزەكتى وتىرىسى ۇيىمداستىرىلدى.
وسى اپتادا ۆەتنام پارلامەنتتىك دەلەگاتسياسى قازاقستانعا كەلىپ, سەنات جانە ءماجىلىس توراعالارىمەن كەزدەسەدى. الىستان كەلگەن قوناقتار قاتارىندا ۆەتنام كوممۋنيستىك پارتياسى ورتالىق كوميتەتىنىڭ مۇشەسى جانە ۆسر ۇلتتىق جينالىسى توراعاسىنىڭ ءبىرىنشى ورىنباسارى نگۋەن كحاك دين بار. ساپار بارىسىندا ۆەتنام وكىلدەرى سەنات توراعاسى ماۋلەن اشىمباەۆ, ءماجىلىس توراعاسى ەرلان قوشانوۆ, پرەمەر-ءمينيستردىڭ ورىنباسارى سەرىك جۇمانعارين, الماتى قالاسى اكىمىنىڭ ورىنباسارى ارمان قىرىقباەۆ پەن سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعاليمەن ەكىجاقتى كەزدەسۋلەر جوسپارلانعان.
«ساپار ەكى ەل اراسىنداعى پارلامەنتارالىق ءوزارا ءىس-قيمىلدى ودان ءارى جانداندىرۋعا باعىتتالعان. ساپار بارىسىندا پارلامەنت ماجىلىسىندە, سىرتقى ىستەر مينيسترلىگىندە, قازاقستاننىڭ ستراتەگيالىق زەرتتەۋلەر ينستيتۋتىندا جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە كەزدەسۋلەر ۇيىمداستىرىلادى», دەدى ا.سمادياروۆ.
جۋرناليستەردىڭ سۇراعىنا جاۋاپ بەرگەن رەسمي وكىل جاقىندا سەيشەل ارالدارىنا ۆيزاسىز بارۋ رەجىمى كۇشىنە ەنۋى مۇمكىن ەكەنىن حابارلادى. «جاقىندا قازاقستان مەن سەيشەل ارالدارى ۆيزاسىز رەجىم تۋرالى كەلىسىمگە قول قويدى. وسى كەلىسىم اياسىندا مەملەكەت ىشىندەگى راسىمدەر اياقتالعاننان كەيىن ۆيزاسىز ءتارتىپ كۇشىنە ەنەدى. ەكى ەلدىڭ ازاماتتارى ءبىر-بىرىنە 30 كۇنگە دەيىن ۆيزاسىز بارا الادى», دەدى ا.سمادياروۆ.
سونداي-اق قازاقستان مەن ارمەنيا ۇقشۇ-دان شىعۋ باعىتىندا كولىسسوز جۇرگىزىپ جاتىر دەگەن قاۋەسەتكە قاتىستى مالىمەت بەردى. ونىڭ ايتۋىنشا, بۇل شىندىققا جاناسپايدى. ء«بىر اقپارات اگەنتتىگىندە وسىنداي مالىمەت شىعىپتى. بۇل اقپارات شىندىققا جاناسپايدى. ەگەر ارمەنيا ءوز تالاپتارىن قويىپ جاتسا, بۇل ولاردىڭ ىشكى ماسەلەسى. وسى جايىندا ءبىز ەشتەڭە ايتا المايمىز. قازاقستان ۇقشۇ اياسىندا جۇمىسىن جالعاستىرىپ جاتىر», دەدى ا.سمادياروۆ.