ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ورتالىق كوممۋنيكاتسيالار قىزمەتىندە وتكەن بريفينگ بارىسىندا ەڭ تومەنگى جالاقى مولشەرى تۋرالى ايتتى, دەپ حابارلايدى Egemen.kz.
سۆەتلانا جاقىپوۆا ءماجىلىس دەپۋتاتى رينات زايىتوۆتىڭ قازاقستاندا ەڭ تومەنگى جالاقى مولشەرىن 300 مىڭ تەڭگەگە دەيىن كوتەرۋ تۋرالى ۇسىنىسىنا تۇسىنىكتەمە بەردى,
ءمينيستردىڭ ايتۋىنشا, ەڭ تومەنگى جالاقىنىڭ بۇلايشا ءوسۋى شاعىن جانە ورتا بيزنەس وكىلدەرىنە كەرى اسەرىن تيگىزەدى.
«ەڭ تومەنگى مولشەردى 300 مىڭ تەڭگە قىلىپ قويساق, ونى ورتا جانە شاعىن بيزنەس كوتەرە المايدى. ولار جالاقى تولەۋى كەرەك, زەينەتاقى قورى بار دەگەندەي. بۇل - قاۋىپتى. ءيا, پوپۋليستىك تۇرعىدا بۇل شەشىمگە بارا الامىز. بارىنە جار سالىپ وسىنشا كوتەردىك دەپ ايتۋعا بولادى, الايدا شىن مانىندە, ەشكىم دۇرىس جۇمىس ىستەي الماي قالادى», دەدى مينيستر.
سونداي-اق مينيستر ەڭ تومەنگى جالاقى مولشەرى 2018 جىلدان باستاپ ءوسىپ كەلە جاتقانىن قوسا ايتتى.«ەڭ تومەنگى جالاقىنىڭ مولشەرى 45 مىڭ تەڭگەدەن باستالىپ, 85 مىڭعا جەتىپ وتىر. جۇمىس بەرۋشى بۇل تولەمنەن تومەن تولەمەۋى كەرەك. مىسالى 21 كۇن جۇمىس ىستەپ 80 مىڭ تەڭگە تولەسە, جۇمىسشى سوتقا ارىزدانىپ, قۇقىعىن قورعاي الادى», دەدى ۆەدومستۆو باسشىسى.
ايتا كەتەيىك, 1 قىركۇيەكتە پرەزيدەنت قاسىم-جومارت توقاەۆ 2024 جىلدىڭ 1 قاڭتارىنان باستاپ ەڭ تومەنگى جالاقىنى 85 مىڭ تەڭگەگە دەيىن كوتەرۋدى تاپسىرعان ەدى.