ازيا ويىندارىنىڭ ەكىنشى كۇنىندە قازاقستان قورجىنىنا تاعى ءۇش قولا مەدال ءتۇستى. بۇل كۇنى حانچجوۋ تورىنە كوتەرىلەتىن سپورتشىلاردىڭ اراسىندا التىنعا لايىقتى باستى فاۆوريتتەر بولماعانىمەن, مەدال الادى-اۋ دەگەن سپورتشىلارىمىزعا جانكۇيەر بولدىق.
العاشقى كۇننىڭ ناتيجەسى
الدىمەن بۇرناعى كۇنى وتكەن جارىستىڭ كەشكى سەسسياسىنداعى سپورتشىلارىمىزدىڭ ناتيجەسىنە توقتالايىق. بۇرناعى كۇنى دزيۋدوشىلارىمىز ابيبا ابۋجاقىنوۆا (48 كيلو) – كۇمىس, ماعجان شامشادين (60 كيلو) قولا مەدال جەڭىپ العانىن جازعان ەدىك. سونداي-اق قازىرگى بەسسايىسشىلار ەلەنا پوتاپەنكو مەن گەورگي بورودا-دۋدوچكين جەكەلەي جارىس قورىتىندىسى بويىنشا وليمپيادالىق ليتسەنزيا يەلەندى.
قالعان سپورتشىلاردىڭ ناتيجەلەرى دە جامان ەمەس. مىسالى, سپورتتىق گيمناستيكادان ناريمان قۇربانوۆ «ات ۇستىندە جاتتىعۋ» بويىنشا فينالعا شىقتى. ال بوكستان 63,5 كيلوعا دەيىنگى سالماق دارەجەسىندە ەرتۋعان زەينوللينوۆ جارىستىڭ 1/16 فينالىنا ءوتتى.
شاحماتتان جانسايا ابدىمالىك قارسىلاسىنان باسىم تۇسسە, ءبيبىسارا اساۋباەۆا تەڭ تارقاستى. ەرلەر اراسىندا قازىبەك نوگەربەكتىڭ ەسەبىندە ەكى جەڭىس, رينات جۇماباەۆتىڭ ەنشىسىندە ءبىر جەڭىس بار.
گاندبولدان ايەلدەر قۇراماسى توپتىق كەزەڭدە تايلاند قۇراماسىن 44:20 ەسەبىمەن ۇتتى. تەننيستەن بەيبىت جۇقاەۆ جەكەلەي سايىستىڭ ەكىنشى راۋندىندا تاجىكستان سپورتشىسى فيرۋز مۋحيدينوۆتى جەڭدى. 6:0, 6:0. جاعاجاي ۆولەيبولىنان سىنعا ءتۇسىپ جاتقان ن.الداش /ك.گۋرين جانە س.بوگاتۋ/د.ياكوۆلەۆ جۇپتارى ەرلەر اراسىندا شيرەك فينالعا ءوتتى.
جۇبانىش بەلدەۋىندە جەڭىلىس تاپتى
جارىستىڭ ەكىنشى كۇنىندە التىن مەدالدان ءۇمىتسىز ەمەس ەدىك. سەبەبى بۇل كۇنى التىن الۋعا لايىقتى دزيۋدوشىلارىمىز عۇسمان قىرعىزباەۆ (66 كگ), دانيار شامشاەۆ (73 كگ), ابىلايحان جۇبانازار (81 كگ) سەكىلدى ازيا چەمپيونى مەن ۇلكەن دۋلىعا جارىسىندا جۇلدە الىپ جۇرگەندەر تاتاميگە شىعاتىن ەدى. سودان بولار حانچجوۋعا كەلگەن وتاندىق جۋرناليستەردىڭ تەڭ جارتىسى دزيۋدو وتەتىن سپورت ارەناسىنا ات باسىن بۇردى. الايدا بۇل كۇنى سپورتشىلاردىڭ ناتيجەسى جانكۇيەرلەر كۇتكەندەي بولمادى.
73 كيلو سالماقتا سىنعا تۇسكەن دزيۋدوشىمىز دانيار شامشاەۆ ءبىرىنشى اينالىمدا گونكونگتىك بالۋاننان باسىم ءتۇسىپ, جارىستى سەنىمدى باستادى. بىراق ەكىنشى اينالىمدا ويدا-جوقتا تاجىكستاندىق بەرۋزي حوجازوداعا ەسە جىبەردى. ال جۇبانىش بەلدەسۋىندە قىرعىزستاندىق بالۋاندى ۇتقانىمەن قولا جۇلدە ءۇشىن كۇرەستە موڭعول بالۋانىنا شاماسى جەتپەدى.
ال ابىلايحان جۇبانازار (81 كگ) ءبىرىنشى اينالىمدا گونكونگتىك بالۋاندى, 1/4 فينالدا باحرەيندىك قارسىلاسىن تىزە بۇكتىرىپ, جارتىلاي فينالعا جولداما العاندا «التىن الادى-اۋ» دەپ ۇمىتتەندىك. سەبەبى ابىلايحان بيىلعى گراند-سلامنىڭ ەكى بىردەي جارىسىندا جۇلدەگەرلەر قاتارىنان كورىنگەن ەدى. بىراق جارتىلاي فينالدا ءبىزدىڭ جىگىتكە قارسىلاس اتانعان تاجىك سومون ماحمادبەكوۆ تە اككى بالۋان ەكەن. ەكەۋارا مىقتىنى انىقتاردا قارسىلاستىڭ مەرەيى ۇستەم بولدى. فينالعا جولداما العان تاجىك دزيۋدوشىسى التىن مەدال السا, قولا جۇلدە ءۇشىن كۇرەسكەن ا.جۇبانازار وزبەك دزيۋدوشىسى مۋسا سوبيروۆقا ەش مۇمكىندىك بەرمەي «يپپون» ادىسىمەن جەڭىسكە جەتتى.
بۇل كەشتە تاعى ءبىر تاجىريبەلى دزيۋدوشىمىز عۇسمان قىرعىزباەۆ تاتيمەگە شىقتى. الايدا ازيا ويىندارىندا جۇلدەگە ىلىككەن جوق. ءبىرىنشى بەلدەسۋىندە جەڭىسكە جەتكەن ول شيرەك فينالدا جەڭىلدى. ارتىنشا جۇبانىش بەلدەسۋىندە دە جەڭىلىس تاپتى. دزيۋدودان قازاقستان قۇراماسىنىڭ باس باپكەرى نۇربول سۇلەيمەنوۆتىڭ ايتۋىنشا, عۇسمان ويلانباي ءادىس جاسايتىن بالۋان ەمەس. بىراق مۇنى تورەشىلەر تۇسىنە بەرمەيدى.
– عۇسمان ەشقاشان ويلانباي ءادىس جاسامايدى. ەشقاشان ارامدىققا بارمايدى. بىراق قىرعىزباەۆتىڭ بۇل ارەكەتىن باسقالارى جاتتاپ العان. ءسويتىپ, ولار ادىسكە كىرىپ كەتەدى. تورەشىلەر دە سىلبىر كۇرەستى دەپ ەسەپتەيدى. جالپى العاندا, عۇسمان قايتا-قايتا ەسكەرتۋ الاتىنداي لاس كۇرەسەتىن بالۋان ەمەس, – دەدى باپكەر.
قازاق-وزبەك تەكەتىرەسى – 2:0
ميرودجان يۋلداشەۆتىڭ جەڭىسىنەن كەيىن قازاق-وزبەك قىزدارى تاتاميگە بەتتەدى. قولا مەدال ءۇشىن بولسا دا ەكى ەل اراسىنداعى تەكەتىرەس بۇل جولى دا جالعاسىن تاپتى. ونىڭ ۇستىنە قوس ەلدىڭ جانكۇيەرلەرى ارەنادا ءبىر جەرگە ورنالاسقان ەكەن. باۋىرلاس ەلدەردىڭ جانكۇيەرلەرى ءبىر جەردەن كيقۋلاپ ءوز سپورتشىسىنا قولداۋ ءبىلدىرىپ جاتتى. باق وكىلدەرى ورنالاسقان جەردە دە قازاق-وزبەك جۋرناليستەرى «قالاي بولادى ەكەن؟» دەگەندەي دەمدەرىن ىشتەرىنە تارتىپ وتىردى.
ايەلدەر اراسىندا ەسميگۇل قۇيىلوۆا (63 كگ) ءبىرىنشى اينالىمدا موڭعوليالىق بالۋاننىڭ جاۋىرىنىن جەر يىسكەتىپ, كەلەسى كەزەڭگە شىققانىمەن, ەكىنشى كەزدەسۋدە كورەيالىق بالۋانعا ەسە جىبەردى. ال جۇبانىش بەلدەسۋىندە فيليپپيندىك دزيۋدوشىدان باسىم بولدى. قولا جۇلدە ءۇشىن كۇرەستە ەسميگۇلگە جەڭىس اۋاداي قاجەت ەدى. سەبەبى ونىڭ قارسىلاسى وزبەكستاندىق سەۆەنيش يسوكوۆا-تۇعىن. ال ەسميگۇل – وزبەكستاننان كەلگەن قانداسىمىز. وزىنەن بەس جاس ۇلكەن قارسىلاسىن «يپپون» ادىسىمەن جەڭگەن ەسميگۇل ازيا ويىندارىنىڭ قولا جۇلدەگەرى اتاندى. بۇل – جەرلەسىمىزدىڭ ازىرگە ەڭ ءىرى جەڭىسى.
جارىستان كەيىن ەسميگۇل قۇيىلوۆا ەكسكليۋزيۆتى سۇحبات بەرىپ, وسى جەتىسىككە جەتەلەگەن سپورتتاعى اپكەسى ابيبا ابۋجاقىنوۆاعا العىسىن ايتتى.
– مەن 21 جاستامىن. ءبىر جىلدان بەرى قازاقستاننىڭ ايەلدەر قۇراماسىندا كۇرەسىپ ءجۇرمىن. بۇگىنگى قۋانىشىمدى سوزبەن جەتكىزە المايمىن. قاتتى قۋانىپ تۇرمىن. وسى جۇلدەمدى اتا-اناما جانە بارشا قازاق ەلىنە ارنايمىن. سودان سوڭ مەنىڭ دزيۋدوداعى باستى جاناشىرىم ابيبا ابۋجاقىنوۆاعا راحمەت ايتامىن. ول اقىل-كەڭەسىن اياعان ەمەس. «جەڭەسىڭ, كەم دەگەندە ءۇشىنشى ورىن الاسىڭ!», دەپ ۇنەمى جىگەرلەندىرىپ وتىرادى. ءوزىم دە وسى كەزدەسۋگە «ولىسپەي بەرىسپەيمىن», دەپ شىقتىم. «قالايدا جەڭەمىن!», دەگەن وي بولدى. العاشىندا ءوزىمنىڭ قاتەلىگىمنەن قارسىلاسقا ۇپاي بەرىپ قويدىم. «يپپون» بەرەتىن شىعار دەپ قوبالجىپ تۇرعانمىن. تورەشى تەك «ۆاززاري» دەپ ەسەپتەدى. سول كەزدە دە مۇنىڭ ماعان بەرىلگەن مۇمكىندىك ەكەنىن ءتۇسىندىم دە, بارىمدى سالدىم. ايتارلىقتاي جەڭىستەرىم جوق. ەلىمدى الدا تالاي جەڭىسپەن قۋانتارىم ءسوزسىز. ماعان باعىت-باعدار بەرگەن, ماعان سەنىم ارتقان باپكەرلەرگە مىڭ العىس. وسى مەدال ءىرى جەڭىستەرگە جول اشادى دەپ سەنەمىن, – دەيدى ەسميگۇل.
ءدال وسىنداي مۇمكىندىك سەۆارا نىشانباەۆادا (57 كگ) بولعان ەدى. ول ءبىرىنشى اينالىمدا تاجىكستاندىق بالۋاندى جەڭدى. ال ەكىنشى اينالىمدا تايپەيلىك ارىپتەسىنە ەسە جىبەردى. جۇبانىش بەلدەسۋىندە ءباا بالۋانىنا شاماسى كەلمەدى.
وزبەكستاننىڭ ەلەۋلى جەتىستىگى
انشەيىندە بوكس بولسىن, كۇرەس بولسىن, فۋتبول بولسىن ناتيجەمىزدى وزبەكتەرمەن سالىستىراتىنىمىز بار ەدى عوي. وسى جولى دا ازيا ويىندارىندا ءوزارا جارىسىپ جاتىرمىز. الاشاپاندى اعايىنداردىڭ «وزبەكستان 24» تەلەكانالىنىڭ ءجۋرناليسى نوربەك نيازوۆتى سوزگە تارتقانىمىزدا, ازيا ويىندارىنا باس-اياعى 350 سپورتشى, سپورتشىلاردىڭ جەتىستىگىن ناسيحاتتاۋ ءۇشىن 35 جۋرناليست كەلگەنىن ماقتانىشپەن ايتتى.
حوش, 73 كيلو سالماقتا تاتاميگە شىققان وزبەك ميرودجان يۋلداشەۆ قارسىلاستارىنىڭ بارلىعىن قوعاداي جاپىرىپ فينالعا سۇرىنبەي شىققانىن ءوز كوزىمىزبەن كوردىك. ال فينالدا دزيۋدونىڭ وتانى جاپونيانىڭ وكىلى سوۋشي حاشيموتونى ابدەن ابىگەرگە ءتۇسىردى. ءتورت مينۋت بويى جاپون سپورتشىسىنان باسىم بولعان ميرودجان ازيا ويىندارىنىڭ التىن مەدالىن موينىنا تاقتى. جۋرناليستەرگە بەرگەن سۇحباتىندا ءوزىنىڭ مىقتى ەكەنىن, ءالى تالاي جارىستا چەمپيون بولاتىنىن ايتقان وزبەك بالۋانى شىنىندا دا تەڭدەسسىز ەكەنىن سارى قۇرلىققا تاعى ءبىر مارتە دالەلدەدى. قازاق قۇراماسى التىن مەدال اڭساپ جۇرگەندە, ميرودجان يۋلداشەۆ وزبەكستان قۇراماسىنا ءتورتىنشى التىن مەدالدى الىپ بەردى. ايتپاقشى, 2022 جىلى ازيا چەمپيوناتىنىڭ فينالىندا ءدال وسى ميرودجان ءبىزدىڭ جۇلدەسىز قالعان دانيار شامشاەۆتان جەڭىلگەن ەدى.
جۇگىرگەن جەتپەس, بۇيىرعان كەتپەس
جارىستىڭ ەكىنشى كۇنىندە نيكيتا چيريۋكين قولا مەدال جەڭىپ العانى قىزىق بولدى. ول تاپانشامەن 10 مەترگە نىسانا كوزدەۋدەن ۇزدىكتەر قاتارىنا ەندى. الدىمەن, نيكيتا 10 مەترگە پنەۆماتيكالىق تاپانشامەن نىسانا كوزدەۋدەن فينالدا سىنعا ءتۇستى. ول ىرىكتەۋ كەزەڭىندە جەتىنشى ورىن الىپ, فينالدان سىرت قالعان ەدى. الايدا اقتىق سىنعا وتكەن قىتايلىق سپورتشىلاردىڭ ءبىرىن ەرەجەنى بۇزعانى ءۇشىن جارىستان شەتتەتىپ, بوس قالعان ورىنعا نيكيتاعا جول اشىلدى. ناتيجەسىندە, فينالدا چيريۋكين جالپى ەسەپتە 26 ۇپاي جيناپ, قولا جۇلدە جەڭىپ الدى.
– از عانا كۇش جەتپەدى. جۇيكە دە كەرەك. مۇنىمەن توقتاماي, ءارى قاراي دامۋ قاجەت. فيزيكالىق الەۋەتىمدى دە, پسيحولوگيانى دە جەتىلدىرۋ كەرەك. سودان سوڭ بۇدان دا جوعارى ناتيجە بولادى دەپ ۇمىتتەنەمىن, – دەدى ن.چيريۋكين.
نىسانا كوزدەۋدەن ەرلەر اراسىندا يسلام ساتپاەۆ – 6, اسسادبەك نازيركۋلەۆ – 9, باحتيار يبراەۆ 11-ورىننان كورىندى.
الا-قۇلا ويىن
بۇل كۇنى بوكسشى قىزىمىز ناتاليا بوگدانوۆا (66 كگ) ساۋديالىق قارسىلاسىن مەرزىمىنەن بۇرىن جەڭدى. جاعاجاي ۆولەيبولىنىڭ شيرەك فينالىندا قازاقستان 1 (بوگاتۋ/ياكوۆلەۆ) كومانداسى قازاقستان 2 (الداش&گۋرين) كومانداسىنان 2:1 ەسەبىمەن باسىم ءتۇستى.
ال ەرلەر اراسىندا ماۋنتينبايك ۆەلوجارىسىندا دەنيس سەرگيەنكو مەن ەگور كاراسەۆ بەسىنشى جانە التىنشى ورىننان كورىندى.
ەرلەر اراسىندا تاەكۆوندودان 58 كيلو سالماقتا سىنعا تۇسكەن ەلدوس ىسقاقتىڭ تىم بولماعاندا قولا مەدال الۋعا مۇمكىندىگى بار ەدى. ول 1/16 فينالدا شىعىس تيمور, 1/8 فينالدا ليۆان سپورتشىلارىنان باسىم تۇسكەنىمەن, 1/4 فينالدا ويلاماعان جەردەن اۋعانستاندىق موحسەن رەزاەيگە 0:2 ەسەبىمەن جول بەرىپ قويدى. وسىلايشا, م.رەزاەي اۋعانستانعا ازىرگە جالعىز قولا مەدالدى الىپ بەردى.
ال بوتاگوز قاپانوۆانىڭ (49 كگ) شاماسى 1/4 فينالعا دەيىن عانا جەتتى. ول موبينا نەماتزادەحتەن (يران) 0:2 ەسەبىمەن ۇتىلدى.
اكادەميالىق ەسكەك ەسۋدەن ۆلاديسلاۆ ياكوۆلەۆ تە, ايەلدەر قۇراماسى دا 5-ورىن الدى.
تەننيستەن جۇپتاسىپ ونەر كورسەتۋدە بەيبىت جۇقاەۆ/دەنيس ەۆسەەۆ – حازاۆا شيندجي/ۋەسۋگي كاتوعا (جاپونيا) 0:2 ەسەبىمەن جەڭىلىپ قالسا, جىبەك قۇلامباەۆا/گوزال اينيتدينوۆا قاتار تەننيسشىلەرىنەن 2:0 ەسەبىمەن باسىم ءتۇستى.
جەكەلەي سىندا دەنيس ەۆسەەۆ شىعىستيمورلىق تەننيسشىگە ەش مۇمكىندىك بەرمەسە (2:0), گريگوري لوماكين/دميتري پوپكو جۇبى وڭتۇستىككورەيالىق تەننيسشىلەرگە 1:2 ەسەبىمەن ەسە جىبەردى. جارىستىڭ ەكىنشى اينالىمىنا شىققان ارۋجان ساعىندىقوۆا ۇندىستاندىق ارىپتەسىنە شاماسى كەلمەدى (0:2).
سۋ دوبىنان قازاقستان ايەلدەر قۇراماسى العاشقى ويىندا سينگاپۋردەن 9:5 ەسەبىمەن باسىم ءتۇستى.
رەگبيدەن قازاقستان ايەلدەر قۇراماسى ءۇندىستان قۇراماسىن 24:7 ەسەبىمەن ويسىراتا جەڭدى.
ال كوگالداعى حوككەيدەن قازاقستان قۇراماسى (ايەلدەر) تايلاندتان 0:4 ەسەبىمەن جەڭىلدى.
شاحماتتان 4-راۋندتىڭ ويىندارى اياقتالدى. جەكەلەي سىندا ءبيبىسارا اساۋباەۆا يندونەزيالىق مەدينا ۆاردا اۋليادان باسىم تۇسسە, جانسايا ابدىمالىك تاعى ءبىر يندونەزيادان كەلگەن يرينە حاريسما سۋكانداردى جەڭدى.
ازىرشە ءبيبىسارا اساۋباەۆا 3 جەڭىس, 1 تەڭ ناتيجەمەن 3-ورىندا, جانسايا ابدىمالىك 3 جەڭىسپەن 5-ورىندا تۇر. ال ەرلەر باسەكەسىندە رينات جۇماباەۆ فيليپپين شاحماتشىسى پاۋلو بەرساميناعا, ال قازىبەك نوگەربەك الاڭ يەسى يۋ ۆەيگە ەسە جىبەردى. قازىبەك نوگەربەك 2,5 ۇپايمەن 8-ورىنعا جايعاسسا, رينات جۇماباەۆ 2 ۇپايمەن ازىرگە 18-ورىنعا تۇراقتادى.
سەمسەرلەسۋدەن نازارباي ساتتارحان ىرىكتەۋدەن وتە الماسا, ارتەم ساركيسيان شيرەك فينالدا كۋۆەيتتىك سپورتشىعا 10:15 ەسەبىمەن جەڭىلدى.
كەشكى جارىس سەسسياسى بوكسشىمىز ساكەن بيبوسىنوۆتىڭ جەڭىسىمەن اياقتالدى. ول موڭعوليالىق ارىپتەسىنەن 5:0 ەسەبىمەن باسىم ءتۇستى.