ساكەن سەيفۋللين مۋزەيىندە داۋىلپاز اقىن, كورنەكتى قوعام قايراتكەرىنىڭ بۇرىنعى اقمولا – قازىرگى استانا قالاسىندا 1920 جىلدارى تۇرعان ءۇيىنىڭ سۋرەتى ساقتالعان.
ساكەن سەيفۋللين ءومىربايانىنا ۇڭىلگەندە, ونىڭ اقمولا قالاسىمەن وتە تىعىز بايلانىستا بولعانىن بىلەمىز. ماسەلەن, ارداقتى تۇلعا 1917 جىلى 9 ناۋرىزدا اقمولاعا كەلىپ, ساياسي قىزمەتكە ارالاسا باستايدى. «جاس قازاق» اتتى ساياسي جانە الەۋمەتتىك مادەني-قوعام قۇرىپ, «تىرشىلىك» گازەتىن شىعارۋعا قاتىسادى. سونداي-اق اقمولاداعى جاڭا ورىس-قازاق مەكتەبىندە ءۇش ايلىق مۇعالىمدەردى وقىتۋ كۋرسىن جۇرگىزەدى. 1918 جىلى ماۋسىم ايىنداعى اقمولاداعى اقتار توڭكەرىسىنەن كەيىن تۇتقىنعا الىنىپ, 1919 جىلى 5 قاڭتاردا پەتروپاۆل تۇرمەسىنە جىبەرىلگەن. 1920 جىلى كوكتەمدە تۇرمەدەن بوساعاننان كەيىن اقمولاعا قايتا ورالىپ, وسىنداعى رەۆوليۋتسيالىق كوميتەتتىڭ اكىمشىلىك ءبولىمى باسشىسىنىڭ كومەكشىسى بولىپ تاعايىندالادى.
اياۋلى اقىن تۇرعان ءۇي قازىرگى امانگەلدى يمانوۆ كوشەسىندە بولعان. سۋرەتىنە قاراپ, ونىڭ سول كەزدەگى توبەسى شيفرمەن جابىلعان ەڭسەلى ۇيلەردىڭ ءبىرى ەكەنىن بايقايمىز. ءۇيدىڭ ءبىر جاق قابىرعاسىندا التى تەرەزە ورنالاسقان. قابىرعامەن جاپسارلاس اعاشتان شارباق جاساپ قويعان. اۋلادا اعاش ءوسىپ تۇر. ماڭدايشاسىنا ەسكەرتكىش تاقتا ىلىنگەن. ءبىر وكىنىشتىسى, بۇل كۇندە ساكەن اتامىز تۇرعان ءۇي ساقتالماعان. 70-جىلدارى قالا ىشىنە زاماناۋي قۇرىلىستار تۇرعىزۋ ماقساتىندا بۇزىلعان. ال ءۇي ماڭدايشاسىنا قويىلعان ەسكەرتكىش تاقتا اقىن مۋزەيىندە تۇر.