استاناداعى قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىندا كورنەكتى جازۋشى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك ەرى اكىم ءتارازيدىڭ 90 جاسقا تولۋىنا ارنالعان «تولعاۋى توقسان تارازي» اتتى سالتاناتتى كەش ءوتتى. جيىنعا پارلامەنت سەناتىنىڭ توراعاسى ماۋلەن اشىمباەۆ, مادەنيەت جانە اقپارات ءمينيسترى ايدا بالاەۆا, استانا قالاسىنىڭ اكىمى جەڭىس قاسىمبەك, مەملەكەت جانە قوعام قايراتكەرلەرى, حالىق قالاۋلىلارى, زيالى قاۋىم وكىلدەرى, وڭىردەن كەلگەن جازۋشىنىڭ جەرلەستەرى, قالامگەر شىعارماسىن قۇمارتىپ وقيتىن وقىرمانى قاتىستى.
اكىم تارازي – ادەبيەتكە 50-جىلداردىڭ سوڭىن الا, 60-جىلداردىڭ باسىندا كەلگەن تەگەۋرىندى تولقىننىڭ وكىلى. ادەبيەتكە ەشكىمگە ۇقسامايتىن قولتاڭباسىمەن كەلگەن قالامگەر سول كەزدەگى جۇيەنىڭ قالىبىنا سىيمايتىن شىعارمالارىمەن, كەيىپكەرلەرىمەن ادەبي ورتا مەن وقىرمانىن بىردەن مويىنداتتى. ساڭلاق سۋرەتكەر ادەبيەتتە عانا ءونىمدى ەڭبەك ەتكەن جوق, ۇلتتىق دراماتۋرگيا مەن كينو ونەرىنىڭ دامۋىنا دا زور ۇلەسىن قوستى. قابىرعالى قالامگەردىڭ وسى سان قىرلى تالانتى ادەبي-سازدى كەش بارىسىندا ايشىقتى كورىنىس تاۋىپ, جينالعان قاۋىمعا جىلى اسەر سىيلادى.
سالتاناتتى كەشتە الدىمەن ءسوز العان پارلامەنت سەناتىنىڭ توراعاسى ماۋلەن اشىمباەۆ كورنەكتى قالامگەردىڭ مەرەيتويى – قازاق ادەبيەتى مەن رۋحانياتىنىڭ ۇلكەن تويى ەكەنىن ايتىپ, جازۋشىعا جانە جينالعان قاۋىمعا مەملەكەت باسشىسى قاسىم-جومارت توقاەۆتىڭ ارنايى قۇتتىقتاۋىن وقىپ بەردى.
«حالقىمىز ءوزىڭىزدى كەمەل ويلى, اسا كورنەكتى قالامگەر, دارىندى دراماتۋرگ, عاجايىپ ەڭبەگىمەن, اسىل قاسيەتتەرىمەن ابىرويعا بولەنگەن قوعام قايراتكەرى رەتىندە جاقسى بىلەدى جانە قۇرمەتتەيدى. ەڭبەك جولىڭىزدا وتاندىق ادەبيەتتىڭ التىن قورىنا قوماقتى ولجا سالىپ, ۇلتتىق مادەنيەت پەن كينو ونەرىنىڭ كەڭ قانات جايۋىنا سۇبەلى ۇلەس قوستىڭىز. كورىكتى ويدان ءنار الىپ, كەستەلى سوزبەن ورىلگەن كلاسسيكالىق ۇلگىدەگى تارتىمدى تۋىندىلارىڭىزدا ۋاقىت ولشەمىمەن شەكسىز كەڭىستىككە جاڭا تۇرعىدا زەر سالاتىن فيلوسوفيالىق وي-تولعامدارىڭىز وتە كوپ. قوعامعا سىني كوزقاراسپەن قاراپ, زامانداستارىڭىزدىڭ كەسكىن-كەلبەتىن شىنايى سۋرەتتەپ, بارشا ادامزاتتى تولعاندىرعان ماسەلەلەرگە جۇرت نازارىن تۋدىرا ءبىلدىڭىز. الداعى ۋاقىتتا دا حالقىڭىزدىڭ قۇرمەتى مەن ىستىق ىقىلاسىنا بولەنىپ, عيبراتتى عۇمىر كەشە بەرۋىڭىزگە تىلەكتەستىگىمدى بىلدىرەمىن. سىزگە زور دەنساۋلىق, وتباسىڭىزعا اماندىق پەن باق-بەرەكە تىلەيمىن!» دەلىنگەن پرەزيدەنت قۇتتىقتاۋىندا.
ودان كەيىن ءسوزىن قايتا جالعاعان ماۋلەن اشىمباەۆ تۇعىرلى تۇلعانىڭ ۇلت ادەبيەتىندەگى ورنى مەن شىعارمالارىنا توقتالىپ, ىزگى لەبىزىن ءبىلدىردى.
جاقىندا «Egemen Qazaqstan» گازەتىنەن نۇرلان ءورازاليننىڭ ءسىز تۋرالى جازعان «داۋىرتەكتى تۇلعا» اتتى ماقالاسىن وقىپ, ءتانتى بولدىم. ماقالانىڭ اتى دا, مازمۇنى دا كوڭىلىمنەن شىقتى. مۇندا جازۋشىنىڭ ەلىمىز تاۋەلسىزدىك العانعا دەيىنگى ۇلت ساناسىن وياتۋعا قوسقان ۇلەسى تۋرالى كەرەمەت ايتىلعان. سول سەبەپتى دە, قابىرعالى قالامگەردىڭ تاۋەلسىزدىگىمىزدىڭ رۋحاني نەگىزىن قالىپتاستىرۋعا قوسقان ۇلەسىن ايرىقشا ايتىپ وتكەن ورىندى. قازىرگى الماعايىپ زاماندا ءارتۇرلى ۇردىستەر بوي الىپ تۇرعان كەزدە ءوزىنىڭ ومىرلىك جولىمەن, ادامي قاسيەتتەرىمەن جاستارعا ۇلگى, ونەگە كورسەتەتىن اقساقالدار اۋاداي قاجەت. سونداي قاريانىڭ ءبىرى عانا ەمەس, بىرەگەيى – اكىم اعامىز», دەي كەلىپ, ماۋلەن اشىمباەۆ قازاقى داستۇرمەن ادەبيەت ابىزىنىڭ يىعىنا شاپان جاۋىپ, سىي-قۇرمەت كورسەتتى.
كورنەكتى جازۋشىنىڭ ءىس-شاراسىنان كەيىن سەنات توراعاسى ماۋلەن اشىمباەۆ Facebook جانە Instagram الەۋمەتتىك جەلىلەرىندەگى پاراعىندا اكىم ءتارازيدىڭ 90 جاسقا تولعان مەرەيتويىنا قاتىستى جازبا جاريالانعانىن اتاپ وتكىمىز كەلەدى.
بۇل جولعى ادەبي-سازدى كەش مۇلدە جاڭاشا سيپاتتا ءوتتى. كەشتى جۇرگىزگەن تانىمال تەاتر جانە كينو اكتەرى ەركەبۇلان دايىروۆ پەن تانىمال اكتريسا سايا توقمانعاليەۆا ءبىر وتباسىندا ءومىر ءسۇرىپ جاتقان قوس قالامگەردىڭ كەيپىنە ەنىپ, ءسوز زەرگەرىنىڭ وتكەن ءومىرى مەن شىعارماشىلىعىنا بارلاۋ جاسادى. ادەبيەتتە «بەس تاپال» اتانعان دوستارى – قاليحان ىسقاقوۆ, سايىن مۇراتبەكوۆ, رامازان توقتاروۆ, بەك توعىسباەۆ تۋرالى ەستەلىك ايتىلدى. قاللەكي تەاترىنىڭ ارتىستەرى دراماتۋرگتىڭ «ماحامبەت» پەن «جولى بولعىش جىگىت» اتتى درامالىق شىعارمالارى مەن «اندرەي» اڭگىمەسىنەن شاعىن قويىلىم قويدى. بەلگىلى رەجيسسەر ساتىبالدى نارىمبەتوۆ تۇسىرگەن, ستسەناريىن اكىم تارازي جازعان «مۇستافا شوقاي» فيلمىنەن ءۇزىندى كورسەتىلدى. ءداستۇرلى ءان ونەرىنىڭ بايراعىن كوتەرىپ جۇرگەن كلارا تولەنباەۆا, وزگەرىس شەرىكباي, جاقسىكەلدى ماياساروۆ, ارداق بالاجانوۆا سەكىلدى انشىلەردىڭ اۋەلەتىپ سالعان اندەرى مەن كۇيشى نۇركەن ءاشىروۆتىڭ كۇمبىرلەتىپ توككەن كۇيى كەشتىڭ اجارىن اشىپ, ءسانىن كىرگىزدى. سونىمەن قاتار جازۋشىنىڭ ءومىر جولىن قامتىعان فوتوكورمە ۇيىمداستىرىلىپ, جۇرتشىلىققا ادەبيەتىمىزدەگى تۇتاس ءبىر ءداۋىردى كوز الدىمىزعا اكەلگەندەي اسەر بەردى.