– ەرمەك بورانباي ۇلى, 2018 جىلى جاكارتادا وتكەن ازيا ويىندارىندا قازاقستان قۇراماسى بەيرەسمي جالپىكوماندالىق ەسەپتە نەبارى 9-ورىننان كورىندى. الداعى ازيا ويىندارىندا قانداي ماقسات قويىپ وتىرسىزدار؟
– الدىمەن بۇگىنگى ءىس-شارا وتكەن وليمپيادا دايارلاۋ ورتالىعى تۋرالى ايتا كەتسەم. 40 گەكتار جەرگە ورنالاسقان ورتالىقتا توعىز سپورتتىق نىسان بار. سونىڭ التاۋى پايدالانۋعا بەرىلىپ وتىر. قالعانى رەسپۋبليكا كۇنىنە وراي اشىلادى دەگەن جوسپار بار. اتالعان ورتالىقتا ءبىر مەزەتتە 2300 سپورتشى جاتتىعۋ وتكىزە الادى. ەندى سپورتشىلارىمىز ۇلكەن دودا الدىندا تەڭدەسى جوق ورتالىقتا الاڭسىز جاتتىعا الادى.
– سۇراققا ناقتى جاۋاپ بەرسەڭىز؟
– سۇراعىڭىزعا كەلسەك, ارينە سپورتشىلارىمىز ازيا ويىندارىندا ءانۇرانىمىزدى كوبىرەك شىرقاتسا دەيمىز. 2018 جىلى 75 مەدال, سونىڭ ىشىندە 15 التىن جەڭىپ, ۇزدىك وندىقتىڭ قاتارىندا بولعانبىز. ارينە, بۇل ناتيجەگە كوڭىلىمىز تولمايدى. ەندى ناتيجەنى جاقسارتىپ, جاكارتاداعى كورسەتكىشتەن تومەن بولماۋىمىز كەرەك. بىراق سپورتتاعى ناتيجەنى الدىن الا بولجاۋ قيىن. ونىڭ ۇستىنە سەگىز سپورت تۇرىنەن وليمپيادا ليتسەنزياسى ۇلەستىرىلەدى. سوندىقتان بارلىق سپورتشى مۇنداي مۇمكىندىكتى جىبەرگىسى كەلمەيدى. ءبىزدىڭ دە سپورتشىلار ايانىپ قالمايدى.
– مينيستر رەتىندە ەمەس, قاراپايىم جانكۇيەر رەتىندە قاي سپورتشىنىڭ تىلەۋىن تىلەيسىز؟
– ناقتى ءبىر سپورتشىعا جانكۇيەر بولعانىم دۇرىس ەمەس شىعار. بىراق مەنىڭ بوكستان الەم چەمپيونى كارينا يبراگيموۆانىڭ باپكەرى ەكەنىمدى بىلەسىزدەر. بوكستان ەرلەر قۇراماسىنان دا, قىزدار قۇراماسىنان دا ءبىر-ءبىر التىننان كۇتەمىز.
ءامين تۇياقوۆ, كسرو-نىڭ ەڭبەك سىڭىرگەن سپورت شەبەرى:
– بالالارعا باتامدى بەردىم. سپورتشىلاردىڭ جانارى جالىن شاشىپ تۇر. ازيا ويىندارى – جاۋاپتى دودانىڭ ءبىرى. بۇل جولى ءبىزدى قۋانتاتىندار كوپ بولادى-اۋ دەپ ويلايمىن. جولعا شىققالى تۇرعان سپورتشىلاردىڭ باعى جانىپ, بيىك تۇعىردان كورىنە بەرسىن. قۇراما ساپىندا قاراكوزدەرىمىز كوبەيىپتى, تاۋبە! جولدارى وڭ بولىپ, امان-ەسەن بارىپ كەلسىن.
ەرماحان ىبىرايىموۆ, سيدنەي وليمپياداسىنىڭ جەڭىمپازى:
– سوڭعى ازيا جانە الەم چەمپيوناتتارىنىڭ ناتيجەلەرىنە كوز جۇگىرتسەك, ەلىمىزدىڭ سپورتشىلارى قىتاي جەرىندە اتوي سالۋى كەرەك. بەيرەسمي جالپىكوماندالىق ەسەپتە ءتورتىنشى نە بەسىنشى ورىننان كورىنۋگە تولىق مۇمكىندىگىمىز بار. وزىمە جاقىن بوكستى الاتىن بولساق, جىگىتتەردىڭ بارلىعى سايدىڭ تاسىنداي. اسلانبەك شىمبەرگەنوۆ, ماحمۇت سابىرحان, ساكەن بيبوسىنوۆتىڭ التىن الۋعا مۇمكىندىكتەرى جوعارى.
يسلام بايرامۋكوۆ, سيدنەي وليمپياداسىنىڭ كۇمىس جۇلدەگەرى:
– كۇرەس تۇرلەرىنەن سەربيادا ءوتىپ جاتقان الەم چەمپيوناتىندا توپ جارعان ريزابەك ايتمۇحاندى ەل گازەتى ارقىلى قۇتتىقتاعىم كەلەدى. وسىنداي تاريحي جەڭىستىڭ ازيا ويىندارى الدىندا ورىن العانى تىپتەن كەرەمەت بولدى. سەبەبى بۇل جەڭىس ارقىلى قازاقتىڭ بالالارى وسال ەمەستىگىن دالەلدەدى. قىتايعا اتتانعان بالۋانداردىڭ بويىندا دا سەنىمدىلىك پايدا بولادى. بالۋاندارعا تەك ساتتىلىك تىلەيمىن.