اتىراۋ وبلىسىندا باعانالاردى قۇلاتىپ, جوعارى كەرنەۋلى ەلەكتر كابەلىن قولدى قىلعان قىلمىستىق توپ ۇستالدى, دەپ حابارلايدى Egemen.kz وبلىستىق پوليتسيا دەپارتامەنتىنىڭ ءباسپاسوز قىمەتىنە سىلتەمە جاساپ.
وبلىستىق پوليتسيا دەپارتامەنتىنە قاراستى كريمينالدىق پوليتسيا باسقارماسىنىڭ قىزمەتكەرلەرى جەدەل-ىزدەستىرۋ شارالارىن جۇرگىزىپ, جىلىوي اۋدانىندا ەلەكتر باعانالارىن قۇلاتىپ, كابەلدەردى ۇرلاپ ساتۋمەن اينالىسقان بىرنەشە ازاماتتى انىقتادى. كۇدىكتىلەر ەلەكتر كابەلدەرىن اقتوبە قالاسىنداعى مەتالل قابىلداۋ ورتالىعىنا وتكىزىپ وتىرعان.
«ولارعا قاتىستى 16 ەپيزودتى قىلمىستىق ءىس باستالىپ, كۇزەتپەن ۇستاۋ تۇرىندەگى بۇلتارتپاۋ شاراسى قولدانىلعان. اتالعان دەرەك بويىنشا قر قك-ءنىڭ 188-بابى 3-بولىگىمەن (ۇرلىق) سوتقا دەيىنگى تەرگەپ-تەكسەرۋ باستالدى. وزگە اقپارات قپك-ءنىڭ 201-بابىنا سايكەس جاريالانۋعا جاتپايدى», دەدى پوليتسيا دەپارتامەنتىنىڭ قىزمەتكەرلەرى.
اتىراۋ وبلىستىق كريمينالدىق پوليتسيا باسقارماسىنىڭ باستىعى يسا بەكقاليەۆ قىلمىستىق توپ مۇشەلەرى 100 ميلليون تەڭگەدەن استام شىعىن كەلتىرگەنىن جەتكىزدى.