باكۋدە ازەربايجاندىق مۇعالىمدەردىڭ ۇلكەن توبىنا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنا قاراستى پەداگوگيكالىق شەبەرلىك ورتالىعىنىڭ سەرتيفيكاتى تابىس ەتىلدى.
ازەربايجان رەسپۋبليكاسىنىڭ عىلىم جانە ءبىلىم مينيسترلىگى مەن «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى اراسىنداعى كەڭ اۋقىمدى ىنتىماقتاستىق شەتەلدىك مۇعالىمدەردىڭ بىلىكتىلىگىن ارتتىرىپ, وتاندىق زياتكەرلىك تەحنولوگيالاردى الەمدىك بىلىمگە ءساتتى ترانسلياتسيالاۋداعى جۇيەلى جۇمىستى جالعاستىرۋعا مۇمكىندىك بەرىپ وتىر. سوعان وراي پەداگوگيكالىق شەبەرلىك ورتالىعىنىڭ كاسىبي دامۋ بويىنشا «زاماناۋي مۇعالىم: وقىتۋدان – زەرتتەۋگە» اتتى باعدارلاماسى ازىرلەنىپ, بيىلعى تامىزدا ەلوردادا ازەربايجاندىق مۇعالىمدەردىڭ وقۋى باستالدى.
«نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما توراعاسى ءانۋار جانعوزيننىڭ ايتۋىنشا, اتالعان كۋرس زاماناۋي ءبىلىم بەرۋدىڭ سۇرانىسقا يە باسىمدىقتارىنا, سونىڭ ىشىندە الەمدىك پەداگوگيكانىڭ جاھاندىق ترەندتەرى مەن وقىتۋشىنىڭ ناقتى قۇرالدارىنا ارنالعان. باۋىرلاس ەلدىڭ مۇعالىمدەرىنە ارنالعان وقۋ باعدارلاماسى جاھاندىق ءبىلىم بەرۋ جونىندەگى كوميسسيانىڭ ازيا حابى بويىنشا كوميسسارى كۇلاش ءشامشيدينوۆانىڭ اشىق دارىسىمەن باستادى.
– «زاماناۋي مۇعالىم» اۋقىمدى باعدارلاماسى زەرتتەۋ تاجىريبەسى ارقىلى رەفلەكسيالىق وقىتۋدى دامىتۋعا, ساباقتى جوسپارلاۋ مەن باعالاۋدا كاسىبي قۇزىرەتتىلىكتەردى ارتتىرۋعا, قازىرگى پەداگوگيكالىق قۇرالداردى كوبەيتۋگە, Lesson study جانە Action Research نەگىزگى كورسەتكىشتەرىن تۇسىنۋگە باعىتتالعان. ازەربايجان رەسپۋبليكاسىنىڭ ۇلتتىق كۋرريكۋلۋمىن ەسكەرە وتىرىپ, حالىقارالىق سەرتيفيكاتتاۋدان وتكەن ءبىزدىڭ ورتالىقتىڭ ء«تيىمدى وقىتۋ» جانە «مۇعالىم تاجىريبەسىندەگى زەرتتەۋلەر» باعدارلامالارى نەگىزىندە قۇراستىرىلعان. كەمبريدج ۋنيۆەرسيتەتىنىڭ كەڭەسىنەن حالىقارالىق سەرتيفيكاتتاۋدان وتكەن پەداگوگيكالىق شەبەرلىك ورتالىعىنىڭ تابىستى ترەنەرلەرى راۋشان ابىشەۆا مەن گۇلجان زەينولدينا ازەربايجاندىق ارىپتەستەرىمەن جۇمىس ىستەدى, – دەدى پەداگوگيكالىق شەبەرلىك ورتالىعىنىڭ ديرەكتورى جانبوتا قابدىكارىموۆا.
استانا مەن باكۋدە وتكەن وقىتۋدىڭ ەكى كەزەڭىندە تۇجىرىمدامالىق جوسپارلاۋ, مەكتەپ مادەنيەتى جانە بالاعا قولايلى ورتا, موتيۆاتسيالىق ءارى اففەكتيۆتى تەوريالار, سىني تۇرعىدان ويلاۋ, ينتەراكتيۆتى جانە ينكليۋزيۆتى وقىتۋ, فۋنكتسيونالدىق ساۋاتتىلىق سەكىلدى نەگىزگى تاقىرىپتار قامتىلدى.
پەداگوگيكالىق شەبەرلىك ورتالىعىنىڭ كاسىبي جەتىستىكتەرى, ماسەلەن بەدەلدى ەۋروپالىق ACQUIN ينستيتۋتىندا باعدارلاما اككرەديتاتسيالارىنىڭ تۇتاس سەرياسى, وتاندىق بىلىمگە Lesson study جانە Action Research ەنگىزۋدەگى تابىستى جۇمىسى جانە كەلەسى جىلى تمد-دا العاش رەت وتەتىن دۇنيەجۇزىلىك ساباقتى زەرتتەۋ قاۋىمداستىعىنىڭ WALS ءداستۇرلى كونفەرەنتسياسى ازەربايجاندىق مۇعالىمدەردىڭ ايرىقشا قىزىعۋشىلىعىن تۋعىزدى.
– ءبىز كۇن سايىن استانا مەن باكۋدە قازاقستانداعى ارىپتەستەرىمىزدىڭ نەمەن تاڭعالدىراتىنىن اسىعا كۇتىپ جۇردىك. شەبەرلىك ورتالىعىنىڭ زاماناۋي مۇعالىمنىڭ جەتىستىگى وزىنە دەگەن سەنىمدىلىكتەن باستالادى دەگەنى سەنىمىمدى ارتتىرادى, – دەدى ازەربايجاننىڭ ەڭبەك سىڭىرگەن مۇعالىمى فلورا اليەۆا.