استاناداعى كولىك كەپتەلىسى ماسەلەسى قالاي شەشىلەتىنى ايتىلدى

«دوستار! ماعان جول-كولىك جەلىسىن دامىتۋ بويىنشا سۇراقتار ءتۇسىپ جاتىر. وسىعان بايلانىستى اتقارىپ جاتقان جۇمىسىمىزعا قىسقاشا توقتالىپ وتەيىن. قالادا 430 مىڭعا جۋىق اۆتوموبيل بار. كۇن سايىن وبلىستان قالاعا قوسىمشا 90 مىڭعا جۋىق كولىك كىرىپ-شىعادى. جول-كولىك جەلىسىن جۇيەلى دامىتۋ ءۇشىن كوپىرلەر, كولىك قيىلىستارى, جاڭا كوشەلەر سالۋ, جول جوندەۋ جۇمىسى قارقىندى تۇردە جۇرگىزىلىپ جاتىر. 

قاربالاس ۋاقىتتا كولىك كوپ جۇرەتىن ۋچاسكەلەردىڭ ءبىرى – ماڭگىلىك ەل, قابانباي باتىر, تۇران داڭعىلدارى, سارايشىق, قوناەۆ كوشەلەرى جانە ت.ب.

وسى جىلدىڭ سوڭىنا دەيىن تاۋەلسىزدىك داڭعىلىنىڭ بويىنداعى جاڭا كوپىردە كولىك قوزعالىسىن اشۋ بۇل ماسەلەنىڭ ءىشىنارا شەشىمى بولماق. بۇل كوپىر جولدارداعى كەپتەلىستى ەداۋىر جەڭىلدەتۋگە مۇمكىندىك بەرەدى: سول جاعالاۋدى تاۋەلسىزدىك داڭعىلىمەن, جاڭا تەمىرجول ۆوكزالىمەن, قوشقارباەۆ داڭعىلىمەن, ناجىمەدەنوۆ كوشەسىمەن, ازىرەت سۇلتان مەشىتىمەن, بايتۇرسىنوۆ, قورداي, ايناكول كوشەلەرىمەن, مومىش ۇلى داڭعىلىمەن جانە ت.ب. قوسىمشا بايلانىستى قامتاماسىز ەتەدى», دەپ جازدى ەلوردا اكىمى. 

سونداي-اق كەلەسى جىلى تاۋەلسىزدىك داڭعىلىنىڭ قابانباي باتىر داڭعىلىنا دەيىنگى جالعاسىن سالۋدى باستاۋ جوسپارلانىپ وتىرعانىن ايتتى.

«بۇل قالانىڭ جاڭا بولىگىندەگى ماڭگىلىك ەل, قابانباي باتىر داڭعىلدارىندا, تۇركىستان, كەرەي¬-جانىبەك حاندار جانە ايتماتوۆ كوشەلەرىندە كولىك اعىنىن سەيىلتەدى. سول سياقتى كەلەر جىلى كەنەسارى كوشەسىنىڭ بويىندا (قازگيۋ ۋنيۆەرسيتەتى اۋدانىندا) ەسىل وزەنى ارقىلى وتەتىن تاعى ءبىر كوپىردىڭ قۇرىلىسىن باستاۋ جوسپاردا بار. وتكەن جىلى ۇلى دالا داڭعىلىنىڭ بويىنداعى جاڭا كوپىر مەن ا62 كوشەسىنىڭ بويىندا (ا91 كوشەسىنەن استانا-قاراعاندى تاس جولىنا دەيىنگى ۋچاسكەدە) كولىك قوزعالىسى اشىلعان بولاتىن. بۇل دا بىرنەشە كوشەدەگى كولىك قوزعالىسىن جەڭىلدەتتى.

سونىمەن قاتار بيىل قالاعا 400-گە جۋىق اۆتوبۋس ەنگىزەمىز. ولاردىڭ ءبىر بولىگى قازىردىڭ وزىندە جەلىگە شىعارىلدى. جوعارىدا ايتىلعان شارالار, ونىڭ ىشىندە كوشەلەر سالۋ جانە جوندەۋ, اقىلدى باعدارشامدار ورناتۋ جانە اۆتوبۋس جەلىلەرىن ەنگىزۋ قالانىڭ كولىك جەلىسىن ايتارلىقتاي جاقسارتادى», دەپ جازدى جەڭىس قاسىمبەك.