«قازاقستان حالقىنا» قوعامدىق قورىنىڭ توراعاسى بولات جامىشەۆ سولتۇستىك قازاقستان وبلىسىندا بولىپ, قوردىڭ قامقورلىعىن كورىپ وتىرعان بىرنەشە ۇيىمنىڭ جۇمىسىمەن تانىستى. سونىڭ ىشىندە قۇلاعى ەستىمەيتىن بالالاردىڭ ارناۋلى مەكتەپ-ينتەرناتىنا دا ات باسىن بۇردى.
قازىر ەلىمىزدىڭ اتىن الەمگە تانىتىپ جۇرگەن قۇلاعى كەم ونەرپازداردان تۇراتىن Sensitive بي ءانسامبلى شىققان بۇل ۇجىمنىڭ اتى ەلگە تانىس. مەكتەپ-ينتەرناتتىڭ ديرەكتورى جەڭىس ءابىلماجىنوۆ مارتەبەلى قوناققا قوردىڭ قامقورلىعى ءۇشىن العىسىن جەتكىزىپ, قازىر فورتە-كلاستاعى ارناۋلى جابدىقپەن قۇلاعى ەستىمەيتىن بالالار ەستۋ قابىلەتىن ارتتىراتىنىن ايتتى.
«وسىنداي بالالارعا ارنالعان اعاش شەبەرى مەن سلەسارلىققا باۋليتىن شەبەرحانانىڭ دا پايداسى زور بولىپ تۇر. بۇرىن الىنعان شەبەرحانامىز ابدەن توزعان جانە جابدىقتارى ەسكىرگەن ەدى», دەدى ج.ءابىلماجىنوۆ.
ب.جامىشەۆ قوردىڭ كومەگى ناق وسىنداي مۇقتاجدارعا جەتىپ جاتقانىن ايتتى.
«جالپى, ەلىمىز بويىنشا وسىنداي 98 ۇجىمعا كومەك كورسەتىپ جاتىرمىز. سونىڭ 30-ىنا كومەك بىلتىر جەتكىزىلدى. قالعاندارى وسى جىلدىڭ اياعىنا دەيىن ارناۋلى جابدىقتارمەن قامتاماسىز ەتىلەدى», دەدى ول.
سول كۇنى ب.جامىشەۆ وبلىستىڭ قوعامدىق بەلسەندىلەرىمەن, جەرگىلىكتى بيلىك جانە باق وكىلدەرىمەن كەڭ زالدا كەزدەسۋ وتكىزىپ, قوردىڭ اتقارىپ جاتقان جۇمىستارىن باياندادى. ءوزىنىڭ سوزىندە قور توراعاسى بارلىق الەۋمەتتىك سالاعا, سونىڭ ىشىندە, اسىرەسە ءبىلىم مەن حالىقتىڭ دەنساۋلىعىن ساقتاۋ سالاسىنا ۇلكەن كومەك كورسەتىلىپ جاتقانىن جەتكىزدى. ەل ىشىندە ەم جاساۋعا مۇمكىندىك بولماعان 20 بالانىڭ شەتەلدە اۋىر وپەراتسيالارعا بارعانىن, از قامتىلعان وتباسىلاردىڭ 128 بالاسىنا ەلىمىزدە قىمبات پرەپارات قولدانۋدى قاجەت ەتكەن ەمدەر جاسالعانىن ايتتى.
ونىڭ سوزىنەن قوردان 25 ملرد تەڭگە قاراجات ءبولىنىپ, 324 ادامعا وتە قىمبات شەتەلدىك ءدارى-دارمەكتەر الىنعانى دا بەلگىلى بولدى. سونىمەن بىرگە ول اۋىر ناۋقاس بىزدە ەمدەلگىسى كەلمەي, بىردەن شەتەلدىك اۋرۋحانالارعا جاتقىسى كەلەتىن بولسا, وندايلارعا قاراجات بولىنبەيتىنىن ايتتى.
ب.جامىشەۆ ازاماتتاردىڭ قوردان تەك كومەك سۇراۋعا قايىرىلماي, حالقىمىزدىڭ ءال-اۋقاتىن, دەنساۋلىعىن, ءبىلىم الۋىن جاقسارتۋ, سپورتتا جەتىستىككە جەتۋ باعىتىندا ناقتى جوسپارلار ۇسىنعانىن قالايتىنىن دا ايتتى.
«سوندىقتان ءبىز ەلىمىزدىڭ تۇكپىر-تۇكپىرىنەن وسىنداي يدەياسى بار ارىپتەستەر ىزدەيمىز. ونداي ازاماتتاردىڭ پايدالى جوبالارىن قولداۋعا ءازىرمىز. ءبىز بىلتىر دا پەتروپاۆل قالاسىندا بولىپ, دوڭگەلەك ۇستەل» وتكىزگەن ەدىك. سونداي-اق باسقا وڭىرلەردە دە 1 200 ادام قاتىسقان 20 كەزدەسۋ وتكىزدىك. وسى كەزدەسۋلەردىڭ ناتيجەسىندە بىزگە 592 ۇسىنىس ءتۇستى. ءبىز قازىر ولاردىڭ ءبىرازىن قولدادىق, قالعانىنىڭ تيىمدىلىگىن قازىر زەرتتەپ جاتىرمىز. وسى ۇسىنىستار مەن پىكىرلەردى ساراپتاۋ بويىنشا ءوزىمىزدىڭ باعدارلامالىق قۇجاتتارىمىزدى قابىلدادىق», دەدى.
كەزدەسۋدى جۇرگىزگەن سولتۇستىك قازاقستان وبلىسى اكىمىنىڭ ورىنباسارى رۇستەم قۇرمانوۆ «قازاقستان حالقىنا» قورىنىڭ وبلىستىڭ دەنساۋلىق ساقتاۋ, الەۋمەتتىك قولداۋ, ءبىلىم بەرۋ, سپورت, توتەنشە جاعداي سالالارىنداعى كومەگى كوپ بولعانىن اتاپ ءوتتى.
ء«بىزدىڭ ءوڭىر دوتاتسياداعى وبلىس ەكەنى بەلگىلى. ءوزىمىزدىڭ تابىسىمىز بيۋدجەتتىڭ 20 پايىزىن عانا جابادى. 2022 جىلدان بەرى قور ءبىزدىڭ وبلىسقا 1 ملرد تەڭگەنىڭ كولەمىندە كومەك بەردى. بۇل قاراجاتقا نەگىزىنەن ءدارى-دارمەكتەر مەن ءتۇرلى جابدىق ساتىپ الىندى. بولاشاقتا قورمەن اراداعى ىنتىماقتاستىعىمىز ارتا تۇسەدى. ءبىز جاڭا جوبالارعا 4,5 ملرد تەڭگە سۇراپ وتىرمىز», دەدى ول.
سولتۇستىك قازاقستان وبلىسى