مۇنايلى استانانىڭ جاستارى مەن بيۋدجەتتىك سالا قىزمەتكەرلەرى وتباسى كۇنىنە وراي جاڭا پاتەرلەرىنىڭ كىلتتەرىن الدى. باسىبايلى باسپاناعا جەتكەندەر – وتباسى بانك سالىمشىلارى. ولار «اتىراۋ جاستارى» جانە «2-10-20» باعدارلامالارى بويىنشا پاتەرلى بولىپ وتىر.
تۇرعىن ءۇي كىلتتەرىن تابىستاۋ سالتاناتى اتىراۋ قالاسىنداعى سۇلتان بەيبارىس اتىنداعى ورتالىق الاڭدا كەڭ كولەمدە اتالىپ ءوتتى. الدىمەن جينالعاندارعا بيىل 20 جىلدىعىن اتاپ ءوتىپ جاتقان وتباسى بانكتىڭ قۇرىلۋ تاريحى مەن قازىرگى قىزمەتىنە قاتىستى سۇراقتار قويىلىپ, ويىندار ۇيىمداستىرىلدى. جەڭىمپازدارعا ەستەلىك سىيلىقتار مەن جاڭا جيھاز الۋعا سەرتيفيكاتتار بەرىلدى.
شارانىڭ باستى قوناعى, بەلگىلى «وردا» توبىنىڭ ءانشىسى داستان ورازبەكوۆ قىركۇيەك ايىنىڭ ەكىنشى جەكسەنبىسىندە اتالىپ وتەتىن وتباسى كۇنى قارساڭىندا تۇرعىندارعا كوتەرىڭكى كوڭىل-كۇي سىيلاپ, ءۇيلى بولعان ازاماتتاردى ساحنادان شىن جۇرەكتەن قۇتتىقتادى.
«وتباسى بانك» اق باسقارما ءتورايىمىنىڭ ورىنباسارى نۇرلان اقشانوۆ باسپانا باقىتى بۇيىرعان جاندارعا كوپتەن كۇتكەن پاتەر كىلتتەرىن تابىستادى.
«مۇنداي كوللابوراتسيا العاش رەت اتىراۋدا ىسكە اسىپ وتىر. سەرىك جامبىل ۇلى باستاعان جەرگىلىكتى اكىمدىكتىڭ قولداۋ بىلدىرگەنىنە ريزامىن. الداعى ۋاقىتتا دەنساۋلىق ساقتاۋ سالاسىنىڭ قىزمەتكەرلەرىن دە ۇيمەن قامتۋعا بىرلەسە جاڭا جوبالاردى قولعا الاتىن بولامىز. ءار وتباسى ءۇيلى بولسىن!», دەدى نۇرلان ساعىندىق ۇلى.
وتباسى بانك پەن اتىراۋ وبلىستىق اكىمدىگىنىڭ قولداۋىمەن باستاۋ العان ايماقتىق «اتىراۋ جاستارى» باعدارلاماسى اياسىندا الپىسقا جۋىق وتباسى باسپانالى بولدى. قۋانىش يەلەرى ساحنا تورىنە شىعىپ, ارمانداعان پاتەر كىلتىن قولدارىنا الىپ, كوز جاستارىنا ەرىك بەردى. ولاردىڭ اراسىندا مۇعالىم, دارىگەر, ءتىپتى, سالىق قىزمەتكەرلەرى دە بار.
«مەن بۇل كۇندى تاعاتسىزدانا كۇتتىم. سەبەبى, باسپانالى بولۋ – باستى ارمانىم ەدى. ء«ۇيى جوقتىڭ, كۇيى جوق» دەپ بەكەر ايتىلماعان عوي. بۇگىن ارمانىم ورىندالىپ, باقىتتان بالبۇل جايناپ ءجۇرمىن. وسى جاقسىلىقتىڭ بارىنە سەبەپشى بولىپ جاتقان «وتباسى بانكىنە» العىسىم شەكسىز. ەل ءۇشىن ەڭبەك ەتىپ جۇرگەن بانك قىزمەتكەرلەرىنە مول تابىس, زور جەتىستىكتەر تىلەيمىن», دەيدى باسپانالى بولعانداردىڭ ءبىرى مارجان اقتاجيەۆا.