فۋتبولدان 2024 جىلعى ەۋروپا چەمپيوناتىنا ىرىكتەۋ اياسىندا قازاقستان قۇراما كومانداسى فينليانديا كومانداسىمەن كەزدەسىپ, 0:1 ەسەبىمەن جەڭىلىس تاپتى.
اقساقالدىڭ ارمانى
كەشەگى «استانا ارەناعا» جينالعان 30 مىڭنان اسا جانكۇيەردىڭ تىلەگى بىرەۋ عانا بولدى. ول – قازاقستاننىڭ جەڭىسى. فيفا رەيتينگىندە 55-ورىندا تۇرعان فيندەردى قولداۋعا كەلگەن ازىن-اۋلاق جانكۇيەردى ايتپاعاندا, 30 مىڭ جانكۇيەر سياتىن «استانا ارەنادا» ينە شانشار جەر بولعان جوق.
ستاديونعا ەڭبەكتەگەن بالادان ەڭكەيگەن قارتقا دەيىن اعىلىپ كەلدى. جاستار «قازاقستان, العا!», دەپ ۇرانداسا, جەتپىستىڭ ۇستىندەگى اقساقال سايلاۋ ماقسۇت ۇلى بۇرىن مۇنداي جەتىستىك بولماعانىن, قارتايعان شاعىندا ەل قۇراماسىن ەۋرو-2024 دوداسىندا كورگىسى كەلەتىنىن نەمەرەسىنە ايتىپ كەلە جاتىر ەكەن. دەرەۋ اقساقالدى سوزگە تارتتىق.
– بۇرىن الماتىدا تۇرعانىمدا كسرو چەمپيوناتىندا سىنعا تۇسكەن «قايراتقا» جانكۇيەر بولاتىن ەدىك. قازىر ەل چەمپيوناتىن سيرەك كورەمىن. ال قۇراماعا ۇنەمى جانكۇيەرلىك تانىتامىز. شۇكىر, ەل قۇراماسى بۇگىندە ءتاۋىر ناتيجە كورسەتىپ ءجۇر. مۇنداي جەتىستىكتى ءبىز بۇرىن كورمەگەنبىز. بۇرىن ازيادا جۇرگەندە دە مىقتى دەگەن قارسىلاستارىمىزعا جول بەرەتىن ەدىك. ەگەردە فينليانديا مەن سولتۇستىك يرلانديانى فۋتبولشىلارىمىز جەڭسە, وندا ناتيجەمىز ءبىرشاما جاقسارىپ, ەۋروعا شىعۋعا مۇمكىندىك تۋار ەدى. مەنىڭ ارمانىم وسى, – دەيدى اقساقال.
ستاديوننىڭ ىشىندەگى اتموسفەرانى ايتىپ جەتكىزۋ مۇمكىن ەمەس. 30 مىڭ جانكۇيەردىڭ قولىنداعى جەلبىرەگەن قازاقتىڭ كوك تۋى «استانا ارەنانىڭ» ءسانىن كەلتىردى. ال 30-مينۋتتا بارلىق جانكۇيەر «اتامەكەن» ءانىن بىردەي شىرقادى. ءبىر قىزىعى, ەكى كوماندا اراسىندا ماتچ اياقتالسا دا, ستاديونعا جينالعان جانكۇيەرلەر «قازاقستان», «قازاقستان» دەپ فۋتبولشىلارعا قولداۋ كورسەتتى.
1-تايم
ويىندى ەكى قۇراما وتە ساق باستادى. العاشقى 5 مينۋت قوس قۇراما ءبىر-ءبىرىن بارلاۋمەن بولدى. اسىرەسە دوپتى فيندەر كوبىرەك باقىلاۋدا ۇستادى. تەك ويىننىڭ 6-مينۋتىنان باستاپ ءبىزدىڭ جىگىتتەر بەلسەندىلىك تانىتا باستادى. 7-مينۋتتا ابات ايىمبەتوۆتەن ادەمى پاس العان باحتيەر زاينۋتدينوۆ شامامەن 25 مەتردەي جەردەن قارسىلاس كوماندانىڭ قاقپاسىن كوزدەگەن بولاتىن. وكىنىشكە قاراي, باحتيەردىڭ باعىتتاعان دوبى قاقپادان بيىك كەتتى. ال ويىننىڭ 9-مينۋتىندا يسلامبەك قۋاتتا ەسەپتى اشاتىن تاماشا مۇمكىندىك بولعان ەدى. الايدا يسلامبەك دوپقا جەتپەي قالدى. 14-مينۋتتا ءنۇرالى ءالىپتىڭ اۋەلەتە اسىرعان دوبى باحتيەر زاينۋتدينوۆكە جەتپەدى. ال 28-مينۋتتا ەكى بىردەي قورعاۋشىنى الداپ وتكەن ابات ايىمبەتوۆتە گول سوعاتىن زور مۇمكىندىك بولدى. ابات تەپكەن دوپ قاقپاشىنىڭ قولىنان تابىلدى. ارتىنشا يان ۆوروگوۆسكي (29-مينۋتتا) الىستان كەرەمەت سوققى جاساپ كورىپ ەدى, قاقپاشى دوپتى توبەسىنەن اسىرىپ جىبەردى.
سەن سوقپاساڭ, ساعان سوعادى! 34-مينۋتتا ءۇش ويىنشىمىزدى الداپ وتكەن تەەمۋ پۋككي ءوزىنىڭ كوماندالاس ارىپتەسى وليۆەر انتمانعا كەرەمەت پاس بەرگەنى سول ەدى, انتمان كوپ ويلانباي ەسەپ اشتى. ابىروي بولعاندا سوعىلعان گول ەسەپكە الىنبادى. VAR نۇسقاۋىنا سۇيەنگەن تورەشى رادۋ پەترەسكۋ شابۋىل كەزىندە دوپ الاڭنان شىعىپ كەتكەنىن بايقادى.
ويىننىڭ 41-مينۋتىندا الاڭنىڭ ورتا تۇسىنان وزىنە ىڭعايلاپ العان دوپتى اسلان داراباەۆ قاقپاعا جاقىنداپ شىرەنە تەۋىپ ەدى, قاقپاشى لۋكاس گرادەتسكي ورنىنان تابىلدى.
2-تايم
ەكىنشى كەزەڭدە ءبىزدىڭ فۋتبولشىلار شارشاڭقىراپ شىققانداي كورىندى, بىزگە. سەبەبى فيندەر اينالدىرعان بىرنەشە مينۋت ىشىندە 3-4 شابۋىل جاساپ ۇلگەردى. اسىرەسە 62-مينۋتتا قوناقتاردىڭ №11 ويىنشىسى راسمۋس شۋللەر وزىنە ىڭعايلى كەلگەن دوپتى قاقپاعا باعىتتاپ كوردى. ابىروي بولعاندا, قاقپاشىمىز يگور شاتسكي قاۋىپتىڭ بەتىن قايتارا ءبىلدى. الايدا جەڭىسكە دەگەن قۇلشىنىسى جوعارى بولعان فيندىكتەر 78-مينۋتتا دەگەندەرىنە جەتتى. سول قاپتال ارقىلى سۋىرىلىپ شىققان راسمۋس شۋللەر ەسەپ اشىپ, كومانداسىن العا شىعاردى. شۋللەر ەۋرو-2024 ىرىكتەۋ اياسىندا ءۇشىنشى مارتە قاقپانىڭ ساڭىلاۋىن تاۋىپ وتىر. وسى گولدان كەيىن ەكىنشى تايمدا الاڭعا شىققان سامورودوۆ, تاپالوۆ, ورازوۆ, چەسنوكوۆ جانە دوسماعامبەتوۆ بەلسەندى بولعانىمەن ەسەپ وزگەرىسسىز قالدى – 0:1, فينليانديا قۇراماسى ماڭىزدى 3 ۇپايىنا يەلىك ەتتى.
ويىننان كەيىنگى ءباسپاسوز ءماسليحاتىندا قازاقستان قۇراماسىنىڭ باس جاتتىقتىرۋشىسى ماگومەد اديەۆ ويىننىڭ قيىن بولعانىن, ويىنشىلار كەرەك ەمەس قاتەلىك جىبەرگەنىن ايتتى. سونداي-اق ول از ۋاقىت ىشىندە سولتۇستىك يرلاندياعا قارسى جىگىتتەردى دايىندايتىنىن جەتكىزدى.
– بۇگىن ءبىزدىڭ جولىمىز بولمادى. ويىننان كەيىن جىگىتتەرگە وتكەندى ۇمىتىپ, كەلەسى ويىنعا دايىندالۋ كەرەك ەكەنىن ايتتىم. ەكى قۇراماعا دا ۇپاي اۋاداي قاجەت ەدى. بۇل كەشتە فيندەردىڭ مەرەيى ۇستەم بولدى. ءيا, جىگىتتەر قاتەلىكتەر جىبەردى. بۇل – فۋتبول, ويىن قاتەلىكسىز بولمايدى. ەكىنشى تايمدا ءبىزدىڭ مۇمكىندىكتەرىمىز ءبىرىنشى تايمعا قاراعاندا كوپتەۋ بولدى. ويىندى ەرتەڭ قايتا قاراپ, تالداپ, قاتەلىكتەرمەن جۇمىس ىستەيمىز. 10 قىركۇيەكتە سولتۇستىك يرلانديامەن بولاتىن ويىنعا تىڭعىلىقتى دايىندالامىز, – دەدى باس جاتتىقتىرۋشى م.اديەۆ.
ستاتيستيكا نە دەيدى؟
فينليانديا قۇراماسى تۋرالى نە ايتۋعا بولادى؟ وسى ويىنعا دەيىن فينليانديا قازاقستان قۇراماسى سەكىلدى 4 ويىننان كەيىن 9 ۇپاي جيناپ, توپتا ءبىرىنشى ورىندى ءبولىسىپ تۇرعان ەدى. ەكى قۇراما سوڭعى ءۇش ويىندا جەڭىسكە جەتكەن ەدى. قازاقستان مەن فينليانديا ءبىر-بىرىمەن 4 مارتە كەزدەسىپ, بارلىق ويىندا دا فيندەر جەڭىس تويىن تويلاعان. قازاقستان سوڭعى رەت فيندەردىڭ قاقپاسىنا 2007 جىلى گول سوققان.