1916 جىلعى تورعايداعى ۇلت-ازاتتىق كوتەرىلىسىنىڭ قاھارمانى امانگەلدى يمانوۆتىڭ 150 جىلدىق مەرەيتويىنا وراي بەلگىلى كۇيشى, مادەنيەت قايراتكەرى ايتباي مۇزداحانوۆتىڭ «امانگەلدى ءدۇبىرى» اتتى كۇيىنە بەينەبايان ءتۇسىرىلدى. كەشە وسى بەينەباياننىڭ «حابار» ارناسىنىڭ «ويان!» تاڭعى ويىن-ساۋىق باعدارلاماسىندا تۇساۋكەسەرى ءوتتى.
كۇيشى ايتباي اعامىز حالىق باتىرىنا ارناپ جازعان تۋىندىسىن وتكەن عاسىرداعى 60-جىلداردىڭ باسىندا شىعارسا كەرەك. سول كەزدە امانگەلدى يمانوۆتىڭ 90 جىلدىعى اتالىپ ءوتىپتى.
مىنە, سودان بەرى دە الپىس جىل ۋاقىت ءوتتى. تىڭدارمانعا جول تارتقان بەينەباياندا «امانگەلدى ءدۇبىرىن» دارىندى كۇيشى, قازاقستاننىڭ ەڭبەك سىڭىرگەن قايراتكەرى انار مۇزداحانوۆا استانا قالاسى اكىمدىگى ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ قازاق وركەسترىمەن بىرگە ورىندايدى. وركەستر ديريجەرى, مادەنيەت قايراتكەرى نۇرلان بەكەنوۆ.
– ايتباي اعانىڭ كوزى تىرىسىندە وسى شىعارماعا بەينەبايان ءتۇسىرۋدى كوپتەن بەرى ويلاپ ءجۇردىم. سونىڭ ءساتى باتىر بابامىزدىڭ 150 جىلدىق مەرەيتويى قارساڭىندا ىسكە اسقانىنا قۋانىشتىمىن. بەينەبايان قورعالجىن اۋدانىندا ءتۇسىرىلدى. سونداي-اق ءبىز «باس ساردار» اتتى دەرەكتى فيلم جاسادىق. سونداعى كەيبىر سيۋجەتتەردى وسىعان پايدالاندىق. بەينەباياننىڭ ءبىر ەرەكشەلىگى, مۇندا كۇي جەلىسىمەن وقيعا ءوربىپ, اكتەرلەر ويىنى كورسەتىلەدى. بەينەباياندا باتىردىڭ اناسى قالامپىر قاقۋقىزى, ابدىعاپار جانبوسىن ۇلى, مىرجاقىپ دۋلات ۇلىنىڭ بەينەلەرى بار, – دەدى وسى يگى ءىس-شارانى جۇزەگە اسىرۋعا قولداۋ كورسەتكەن «امانگەلدى يمان» قورىنىڭ باسشىسى, باتىردىڭ ۇرپاعى تولقىن سۇلتان.