استاناداعى ۇلتتىق مۋزەيدە كورەي سۋرەتشىسى – يلليۋستراتورى ۋ نايوننىڭ «ۋ نايونمەن قازاقستاندا كەزدەسۋ: ەرتەگىلەردەگى حانبوك» اتتى تاماشا كورمەسى اشىلدى. كورمە بولعاندا قانداي, اۋزىڭدى اشىپ, كوزىڭدى جۇماسىڭ. بۇل مازمۇندى ءىس-شارا ىرگەلى ەكى ەل اراسىنداعى مادەني الماسۋ جىلى اياسىندا ۇيىمداستىرىلدى. وعان قازاقستانداعى كورەيا رەسپۋبليكاسى ەلشىلىگىنىڭ كورەي مادەني ورتالىعى مۇرىندىق بولدى.
كورمە ەكى تاقىرىپتان تۇرادى. ءبىرىنشىسى, ايگىلى ەرتەگى كەيىپكەرلەرىن بەينەلەۋ ارقىلى كورەي ءداستۇرلى كيىمىن تانىستىراتىن «ەرتەگىلەردەگى حانبوك» سەرياسى بولسا, ەكىنشىسىنە «حانبوك كيگەن قىز» دەگەن اتاۋ بەرگەن. كورمەگە تالانتتى سۋرەتشىنىڭ 24 جۇمىسى قويىلدى. ونىڭ تۋىندىلارى ۇلتتىق ناقىشقا باي, اسىرەسە «حانبوك» كيىمىنە نەگىزدەلگەن ءداستۇرلى ەلەمەنتتەردى قامتيدى.
بىرنەشە ەلدە كورمەسى وتكەن ۋ نايون تۋىندىلارى دۇنيە جۇزىنە وتە تانىمال. سونىمەن بىرگە ول Netflix, Disney, Marvel, Samsung, LG جانە تاعى باسقا اتاعى جەر جارعان الەمدىك برەندتەرمەن بىرلەسىپ جۇمىس ىستەگەن. 2019 جىلى كورەيا رەسپۋبليكاسى مادەنيەت, سپورت جانە تۋريزم مينيسترلىگىنىڭ «حانبوكتى ناسيحاتتاۋعا قوسقان ۇلەسى ءۇشىن» سىيلىعىن يەلەنگەن.
مادەني ءىس-شارانىڭ اشىلۋىندا ۇلتتىق مۋزەي ديرەكتورىنىڭ مىندەتىن اتقارۋشى ايبەك سىدىقوۆ ەكى ەل اراسىنداعى مادەني-رۋحاني بايلانىس پەن كورمەنىڭ ماڭىزىن اتاپ ءوتتى.
«قازاقستان مەن كورەيا اراسىنداعى, ونىڭ ىشىندە مادەنيەت سالاسىنداعى قارىم-قاتىناس قارقىندى دامىپ كەلەدى. بۇگىنگى ءىس-شارا دا وسى مادەني ىنتىماقتاستىق باعىتىندا ءوتىپ وتىر. كورمەنىڭ دە مازمۇنى وتە باي. ويتكەنى ونى كورگەندەر كورەي ەلىنىڭ داستۇرىمەن, مادەنيەتىمەن, تاريحىمەن تانىسىپ, رۋحاني باي تۇسەدى», دەي كەلىپ, سوناۋ كورەيادان ات ارىتىپ كەلگەن قىلقالام شەبەرىنە ريزاشىلىعىن جەتكىزدى.
ودان كەيىن قازاقستانداعى كورەيا رەسپۋبليكاسىنىڭ توتەنشە جانە وكىلەتتى ەلشىسى چجو تەيك جينالعان قاۋىممەن قازاقشا امانداسىپ, قازاق تىلىندە سويلەدى. بۇعان ءىشىمىز جىلىپ قالدى.
«قۇرمەتتى دوستار!» – دەپ باستادى ءسوزىن ەلشى. – بىلتىردان باستالعان كورەيا مەن قازاقستاننىڭ ءوزارا مادەني الماسۋ جىلى اياسىندا بىرنەشە ءىس-شارا ۇيىمداستىرىلدى. ال 2023 جانە 2024 جىلدار كورەياعا بارۋ جىلى بولىپ جاريالاندى. سوندىقتان ۋاقىتتارىڭىز بەن مۇمكىندىكتەرىڭىز بولسا, وسى جىل شەڭبەرىندە كورەيا ەلىنە ساياحاتتاپ, ونىڭ تاريحىمەن, داستۇرىمەن جاقىن تانىسۋعا بولادى. بيىلعى كوكتەمدە تۇڭعىش پرەزيدەنت كىتاپحاناسىندا كورەي فوتوسۋرەتشىلەرىنىڭ كورمەسى بولدى. مىنا ءىس-شارا دا سونىڭ جالعاسى دەپ ايتا الامىز. مۇندا سۋرەتشىنىڭ كورەي حالقىنىڭ سان عاسىردان بەرى ساقتالعان مادەنيەتى مەن ءداستۇرلى ۇلتتىق كيىمىن زاماناۋي ۇلگىمەن اسەم ۇيلەستىرىپ, ادەمى بەينەلەگەن جۇمىستارى ۇسىنىلدى. سوندىقتان وسى ءىس-شارانى وتكىزۋگە بەلسەنە اتسالىسقان بارشا ازاماتقا العىسىمدى ايتامىن», دەدى ول.
شىنىندا, ۋ نايون ءوز شىعارماشىلىعىندا ءداستۇرلى قوعام مەن قازىرگى زامان بەينەلەرىن قيسىنىن تاۋىپ, شەبەر ۇندەستىرەدى. ول «حۆان چجين ي» تەلەحيكاياسىن كورگەننەن كەيىن شابىت الىپ, كورەي ءداستۇرلى كيىمى «حانبوكتىڭ» سۇلۋلىعىن بەينەلەيتىن يلليۋستراتسيالار سالا باستاعان. سۋرەتشى نەگىزگى جۇمىستارىندا باستى كەيىپكەرلەردى «حانبوكتە» بەينەلەۋ ارقىلى شىعىس پەن باتىستىڭ ۇزدىك دۇنيەلەرىن جاڭاشا تۇسىندىرەدى. ونىڭ ۇلگىسى رەتىندە باتىس ەرتەگىلەرىندەگى حانشايىمداردىڭ كورىنىستەرى مەن گولليۆۋد اكتەرلەرىنىڭ كورەي كەسكىندەمە ستيلىندەگى بەينەلەرىن ايتا الامىز.
ماسەلەن, اۆتوردىڭ كورمەگە قويىلعان «اققۋ حانزادا», «اقشاقار – اقشاقار مەن جانۋارلار», «سۇلۋ مەن قۇبىجىق», «اليسا عاجايىپتار ەلىندە», «قىزىل تەلپەك» جانە تاعى باسقا دا كورەيدىڭ «حانچجي» قاعازىنا جيكلە تەحنولوگياسىمەن باسىپ شىعارعان جۇمىستارى ءمىنسىز سۇلۋلىعىمەن, تابيعيلىعىمەن, قانىق بوياۋىمەن كوز تارتادى. سونداي-اق سۋرەتشى كورەيلەردىڭ ءتۇرلى ناقىشتاعى ۇلتتىق كيىمدەرىن بەدەرلەگەن يلليۋستراتسيالارى ارقىلى ءوز حالقىنىڭ داستۇرىنە ءتان ەرەكشەلىكتى, سىپايى بولمىستى, اسەمدىكتى ايشىقتى جەتكىزگەن.
ۋ نايوننىڭ ءبىزدىڭ ەلىمىزدى تانىپ-ءبىلۋى دە قىزىق. ونى ءوزى ايتىپ بەردى. «بىردە تەلەديداردان قازاق جەرىندە تۇراتىن ەتنوستىق كورەيلەر تۋرالى تۇسىرىلگەن دەرەكتى ءفيلمدى كورىپ, وسى ەلگە ءوزىمنىڭ ءبىر جاقىندىعىم بار ەكەنىن سەزىندىم. مەن ءۇشىن اسىرەسە قازاقستاندىق كورەيلەردىڭ ۇرپاقتان-ۇرپاققا ءوز ءتىلى مەن ءداستۇرىن ساقتاپ كەلە جاتقانى وتە اسەرلى بولدى. سونىمەن قاتار جەرگىلىكتى كورەيلەردىڭ ۇلتتىق تاعامى ايرىقشا تاڭعالدىردى. مىسالى, «كيمچي» كورەي ءداستۇرلى جەڭىل تاماعى قازاقستاندىق قوسپالارىمەن تولىعىپ, ءدامدى «كورەي سالاتىنا» اينالعان. سوندىقتان مەن مىندەتتى تۇردە وسى ەلگە بارۋىم كەرەك دەپ ويلادىم. مىنە, ءساتى ءتۇسىپ ورتالارىڭىزدا تۇرمىن. بۇعان وتە قۋانىشتىمىن. بۇگىنگى كورمەگە كەلگەن قوناقتار «حانبوكتىڭ» ەرەكشە سۇلۋلىعىن سەزىنە الادى دەپ سەنەمىن», دەدى ول.
بۇل كورمەنىڭ تاعى ءبىر ەرەكشەلىگى رەتىندە سۋرەتشىنىڭ حالقىمىزدىڭ «ەر توستىك» قيال-عاجايىپ ەرتەگىسى نەگىزىندە بەينەلەگەن ەڭبەگىن بولەك ايتساق بولادى. بۇل تۋىندى ەكى ەل اراسىنداعى مادەني الماسۋ جىلى اياسىندا ارنايى سالىنعان. شىعارمادا سۋرەتشى قازاق ەرتەگىسى مەن ءداستۇرلى كورەي مادەنيەتىن ساباقتاستىرا وتىرىپ, ەر توستىكتىڭ جولىندا كەزدەسكەن قيىندىقتى قاجىماس كۇش-قايراتتىڭ ارقاسىندا جەڭگەنىن بەينەلەيدى.
«بۇگىنگە دەيىن ءبىراز ەلدە كورمە وتكىزدىم. سوعان دايىندىق كەزىندە سول ەلدىڭ ءبىر ەرتەگىسىنىڭ جەلىسىمەن سۋرەت سالعاندى جاقسى كورەمىن. وسىندا كورمە وتكىزەتىن بولعاندىقتان, قازاقستانداعى كورەي مادەني ورتالىعى ماعان ءبىراز قازاق ەرتەگىلەرىن جىبەردى. سونىڭ ىشىنەن «ەر توستىك» ەرتەگىسىن وقىپ, قاتتى ۇناتتىم. بۇل ەرتەگىنىڭ باس كەيىپكەرى ەر توستىك – بويىندا كۇش-قايراتى تاسىعان جىگىت. اعالارىن ىزدەپ جولعا شىققاندا وعان جاناشىر بولعان كەيىپكەرلەردىڭ ءوزى – قىزىقتى بەينەلەر. ماسەلەن, كولتاۋىسارعا ۇقساس كەيىپكەر بىزدە دە بار. مىنە, وسىنىڭ ءبارى ماعان اسەر ەتىپ, جاقسى تۋىندى دۇنيەگە كەلدى», دەدى قىلقالام شەبەرى.
ايتا كەتەيىك, ۋ نايوننىڭ كورمەسى 15 قازانعا دەيىن جالعاسادى.