وتكەن اپتادا شاعىن فۋتبولدان باق وكىلدەرى اراسىندا وسكەمەن قالاسى اكىمىنىڭ كۋبوگىنە رەسپۋبليكالىق تۋرنير ءوتتى. قالا كۇنىنە وراي ۇيىمداستىرىلعان فۋتبولدا سالاۋاتتى ءومىر سالتىن ناسيحاتتاپ جۇرگەن ءار ءوڭىردىڭ جۋرناليستەرى باس قوستى.
تۋرنيرگە ەلىمىزدىڭ ءار وڭىرىنەن كەلگەن 8 كوماندا قاتىستى. ولار ەكى توپقا ءبولىنىپ, ءوزارا مىقتىنى انىقتاپ العان سوڭ ءتورت كوماندا جارتىلاي فينالعا شىقتى. جارتىلاي فينالدا استانالىق «Qaz365.kz» پەن «قازمەديا», تالدىقورعاندىق «قارەكەت» پەن تاراز قالاسىنان كەلگەن «تاراز پرەسس» كوماندالارى ءوزارا باق سىناستى. فينالعا جولداما ءۇشىن ويىنداردا ەلوردالىق «Qaz365.kz» قارسىلاسىنان باسىم تۇسسە, ەكىنشى جۇپتا «قارەكەت» باسىم ءتۇستى. ناتيجەسىندە فينالعا «Qaz365.kz» پەن «قارەكەت» شىقتى. ال «قازمەديا» مەن «تاراز پرەسس» ءۇشىنشى ورىن ءۇشىن تالاستى.
جارىس ناتيجەسىندە «تاراز پرەسس» قولا جۇلدەگەر اتانىپ, 400 مىڭ تەڭگە اقشالاي سىياقىعا يە بولدى. فينالدا قارسىلاسپەن تەڭبىل دوپقا تەڭ تالاسىپ, ءبىر ءساتتى عانا ءمۇلت جىبەرگەن «قارەكەتتىڭ» جىگىتتەرى 700 مىڭ تەڭگەنىڭ سەرتيفيكاتىنا يە بولدى. ال «Qaz365.kz» كومانداسى وسكەمەن قالاسى اكىمىنىڭ كۋبوگى مەن 1 ميلليون تەڭگەنىڭ سەرتيفيكاتىن جەڭىپ الدى.
تارتىستى تۋرنيردە شەبەر ويىن كورسەتكەن جۋرناليستەر دە شەت قالماي, لايىقتى ماراپاتتارعا يە بولدى. ءتۋرنيردىڭ «ۇزدىك ويىنشىسى» نوميناتسياسى «Qaz365.kz» كومانداسىنان باقىتجان ماساقوۆقا بەرىلدى. ەڭ كوپ گول سالعان «قازمەديا» وكىلى ەلدوس ءومىرحان «ۇزدىك سۇرمەرگەن» اتانسا, تارازدىق جاسۇلان ايتقۇلوۆ «ۇزدىك قورعاۋشى» اتالىمىن الدى. جەر ءجانناتى جەتىسۋدان كەلگەن سامات ەسەنتاي ۇلى «ۇزدىك قاقپاشى» اتاندى. «وسكەمەن» كومانداسىنىڭ وكىلى وڭعار قابدەن «ۇزدىك شابۋىلشى» نوميناتسياسىن ەنشىلەدى. ولارعا ەستەلىك مۇسىنشەلەر مەن 50 مىڭ تەڭگەنىڭ سەرتيفيكاتى بەرىلدى.
– تۋرنير جوعارى دەڭگەيدە ءوتتى. رەسپۋبليكالىق جارىسقا كوكپەكتى اۋدانىنىڭ اتىنان قاتىسىپ, ەلىمىزدىڭ ءار وڭىرىنەن كەلگەن ارىپتەستەرمەن ارالاسىپ, ارقا-جارقا بولىپ قالدىق. مۇنداي ءىس-شارالاردى ءجيى وتكىزۋ اراداعى ارىپتەستىك بايلانىستىڭ بەكي تۇسۋىنە, ءبىر-بىرىمىزبەن تاجىريبە الماسۋعا زور ىقپال ەتەدى. ماقسات جۇلدە ەمەس – جولداستىق قارىم-قاتىناس, دوستىق ويىن. وسى جاعىنان العاندا بۇل فۋتبول باسەكەسى ءوزىنىڭ ميسسياسىن تولىق ورىندادى. وسىنداي سپورتتىق شارانى وتكىزۋگە مۇرىندىق بولعان, قولداۋ كورسەتكەن وسكەمەن قالاسىنىڭ اكىمدىگىنە العىس ايتامىز, – دەيدى اباي وبلىسى, كوكپەكتى اۋدانىنىڭ نامىسىن قورعاعان «كوكپەكتى» كومانداسىنىڭ كاپيتانى, «جۇلدىز-نوۆايا جيزن» گازەتىنىڭ رەداكتورى دارحان بەردىبەك.
شىعىس قازاقستان وبلىسى