2 قىركۇيەكتە «كوپەر» فۋتبول كومانداسى سلوۆەنيا چەمپيوناتىنىڭ جەتىنشى تۋرى اياسىندا سىرت الاڭدا «دومجالەمەن» كەزدەستى. بۇل ماتچتا قوناقتار كومانداسىنىڭ ويىنشىسى, جەرلەسىمىز رامازان ورازوۆ دەبيۋتتىك ويىنعا شىقتى.
ر.ورازوۆ «كوپەر» ساپىندا اندراج رۋەدلدىڭ ورنىنا 46-مينۋتتا الاڭعا شىعىپ كوماندالاستارىمەن بىرگە جەڭىسكە جەتتى. ويىن باراسىندا ماكس باريسيچ (5-ءشى مينۋت) جانە ماتەي پالچيچ (62-ءشى) قاقپانى ءدال كوزدەپ, «كوپەردى» جەڭىسكە جەتەلەسە, ال «دومجالە» ساپىندا تيلەن كلەمەنچيچ (43-ءشى) گول سوقتى. وسى جەڭىستىڭ ارقاسىندا ر.ورازوۆتىڭ كومانداسى 12 ۇپاي جيناپ, تۋرنير كەستەسىندە ەكىنشى ورىنعا كوتەرىلدى. ال «دومجالە» 5 ۇپايمەن جەتىنشى ورىنعا سىرعىدى.
ايتا كەتەيىك, ورازوۆ ەركىن اگەنت قۇقىعىمەن 28 تامىزدا «كوپەرگە» اۋىسىپ, 2025 جىلدىڭ 31 مامىرىنا دەيىن كەلىسىمشارتقا قول قويدى. 25 جاستاعى حاۆبەك بۇعان دەيىن «توبىل», «اقسۋ», «اقتوبە» جانە «قايرات» كوماندالارىندا وينادى. ءتىپتى رەسەيلىك «چايكا» جانە لاتۆيالىق «داۋگاۆپيلس» ساپىندا دوپ تەپكەن. 2021 جىلدان بەرى ۇلتتىق قۇراماعا شاقىرىلا باستادى.