30 تامىز – كونستيتۋتسيا كۇنى مەرەكەسىنە وراي شىمكەنتتەگى «تۇركىستان» سارايىندا سالتاناتتى كەش ءوتتى. مەرەكەلىك جيىن ەلىمىزدىڭ انۇرانىمەن باستالىپ, تۋ كوتەرۋ راسىمىمەن جالعاستى. ساپ تۇزەگەن ساربازدار جاۋىنگەرلىك تارتىپپەن كوك بايراعىمىزدى ساحنا تورىنە الىپ شىقتى. شىمكەنت قالاسىنىڭ اكىمى مۇرات ايتەنوۆ سالتاناتتى باسقوسۋعا جينالعان بارشا مەگاپوليس تۇرعىندارىن ەلىمىزدىڭ ايتۋلى مەرەكەسىمەن شىن جۇرەكتەن قۇتتىقتاپ, ىزگى تىلەگىن جولدادى.
اتا زاڭىمىز – اسىل قازىنامىز. باستى زاڭعا ەنگىزىلگەن وزگەرىستەر مەن تولىقتىرۋلار ازاماتتاردىڭ قۇقىقتارىن قورعاۋ تەتىكتەرىن كۇشەيتە ءتۇسىپ, ەلىمىزدىڭ دامۋ باعىت-باعدارىن ايقىنداپ بەردى. حالىقتىڭ تاڭداۋى كونستيتۋتسيامىز وركەنيەتتى مەملەكەتتىڭ بارلىعىنا ءتان دەموكراتيالىق قاعيدالارمەن تولىقتىردى. باستى قۇندىلىعىمىز – تاۋەلسىزدىگىمىز تۇعىرلى بولىپ, بىرلىگىمىز جاساي بەرسىن. ءار شاڭىراقتا قۇت-بەرەكە, ىرىس پەن ىنتىماق سالتانات قۇرسىن», دەدى شاھار باسشىسى.
مەرەكەلىك جيىندا قوعامنىڭ بەلسەندى ازاماتتارى – ەڭبەك وزاتتارى كونستيتۋتسيا كۇنىنە وراي ماراپاتتالدى. ماراپاتتالعانداردىڭ ءبىرى راحات مومىنوۆانىڭ كىتاپحانا سالاسىندا ەڭبەك ەتىپ كەلە جاتقانىنا 27 جىل بولعان. سونىڭ 17 جىلدان استام ۋاقىتىندا مەگاپوليستەگى اباي اتىنداعى كىتاپحانانىڭ وقىرماندارعا قىزمەت كورسەتۋ ءبولىمىنىڭ مەڭگەرشىسى قىزمەتىن اتقارىپ كەلەدى.
كىتاپحاناشى – وتە قىزىقتى ماماندىق. جان ازىعىنىڭ ورداسىنداعى قىزمەت رۋحاني جۇتاڭدىقتى سەزدىرمەيدى. تالاي ادامدى كورەسىڭ. ولارمەن تىلدەسىپ, ءوزىڭ دە ءبىلىمىڭدى تولىقتىراسىڭ. تۋعان جەرىم جاڭاقورعاندا 5 جىل, ودان ارىس قالاسىندا 5 جىل كىتاپحاناشى بولسام, شىمكەنتتەگى اباي كىتاپحاناسىنداعى قىزمەتىمە 17 جىلدان اسىپ بارادى. بۇگىنگى جاستار كىتاپ وقيدى. جاس اقىندار ولەڭدەرىن وقىپ, اقىندىق كەشتەرىن وتكىزىپ جاتادى. سوندىقتان جاستار كىتاپ وقىمايدى دەۋ بەكەر. كونستيتۋتسياداعى جاڭا وزگەرىستەرمەن ەلىمىز جاڭا قازاقستانعا قادام باستى. ال ونىڭ جاستارى ءبىلىمدى, اقىلدى, زەرەك. ونى ءوز تاجىريبەمنەن كورگەن كەيىن ايتىپ وتىرمىن. دەمەك ءبىزدى جارقىن كەلەشەك كۇتىپ تۇر. سەبەبى جاستارى بەلسەندى قوعام عانا العا وزادى», دەدى ر.مومىنوۆا.
مەرەكەگە جينالعان ازاماتتاردىڭ ارقايسىسى دا كونستيتۋتسيا زاڭ كەپىلى, زاڭدار مەن ەرەجەلەردىڭ باستى قۇجاتى, سوندىقتان وعان قۇرمەت ەرەكشە بولۋ كەرەك دەگەن ويلارىن جەتكىزدى. تىلدەسكەن تۇرعىنداردىڭ ايتقان پىكىرى بىرەۋ عانا, ەل ەگەمەندىگىن العالى بەرى زاڭدىلىقتىڭ ۇستەمدىگىن قامتاماسىز ەتىپ كەلە جاتقان كونستيتۋتسياعا باعىنىپ ءومىر ءسۇرۋ – رەسپۋبليكانىڭ ءاربىر سانالى ازاماتىنا پارىز. كەيىنگى جاس ۇرپاق تا سول تاربيەمەن ءوسۋ قاجەت.
سالتاناتتى كەش سوڭى فيلارمونيا, وپەرا جانە بالەت تەاترى, شىمكەنت تسيرك ۇجىمدارىنىڭ دايىنداعان مەرەكەلىك كونتسەرتىنە ۇلاستى. سونىمەن بىرگە « ۇلى دالا شەجىرەسى – اتا زاڭ» اتتى كونتسەرتتىك باعدارلامادا «قاسىم حاننىڭ قاسقا جولى», «ەسىم حاننىڭ ەسكى جولى», تاۋكە حاننىڭ «جەتى جارعىسىنان» بۇگىنگى كۇنگە دەيىنگى زاڭداردىڭ دامۋ تاريحى مەن قازاق ەلىنىڭ قۇقىقتىق مادەنيەتىنىڭ قالىپتاسۋ كەزەڭدەرىنەن سىر شەرتىلدى.
شىمكەنت