شەتەلدە تاعىلىمدامادان وتكىڭىز كەلسە...

مەملەكەت باسشىسى الەم­نىڭ جەتەكشى عىلىمي ورتالىقتارىن­دا تاعىلىمدامادان ءوتۋ ءۇشىن عا­لىمدارعا 500 گرانت ءبولۋ تۋرالى تاپسىرما بەرگەن-ءدى. وسىعان وراي 2021 جىلى حالىقارالىق باع­دارلامالار ورتالىعى «500 عا­لىم» عىلىمي تاعىلىمداما باع­دار­لاماسىن ىسكە قوسقان بولاتىن. باعدارلاما 2025 جىلعا دە­يىن زەرتتەۋ ۋنيۆەرسيتەتتەرىندە, زەرتتەۋ ورتالىقتارىندا جانە باس­قا دا عىلىمي مەكەمەلەردە 3 ايدان 12 ايعا دەيىنگى عىلىمي تاعى­لىم­دا­مادان ءوتۋ ءۇشىن جىل سايىن 500 ستيپەنديا بەرەدى.

«عىلىمي زەرتتەۋلەردىڭ باسىم باعىتتارىنىڭ تىزبەسى «اقپارات­تىق جانە كوممۋنيكاتسيالىق تەح­نو­لوگيالار», ء«بىلىم بەرۋ», «مە­دي­تسينا», «ۇلتتىق قاۋىپسىزدىك جانە قورعانىس» سياقتى وزەكتى زەرت­­تەۋ سالالارىن قامتيدى», دەدى «حالىق­ارا­لىق باعدارلامالار ورتالىعى» اق باسقارما توراعاسى ولجاس ساكەنوۆ.

مەملەكەت تاعىلىمدامادان وتۋ­شىلەرگە تاعىلىمدامادان ءوتۋ, ەكى جاققا ۇشۋ شىعىندارىن, سون­داي-اق مەديتسينالىق ساقتاندىرۋ مەن اي سايىنعى ستيپەنديانى تو­لەيدى. ستيپەنديا مولشەرى قالا جانە بەلگىلى ءبىر ەلدەگى ءومىر ءسۇرۋ دەڭ­گەيىنە بايلانىستى بولماق.

عىلىمي تاعىلىمدامانى تاعا­يىنداۋ كونكۋرسىنا ۇسىنىلاتىن تىزىمگە كىرەتىن شەتەلدىك ۇيىمنان شاقىرۋى بار ۇمىتكەرلەر قاتىسا الادى. سونداي-اق عىلىمي ناتي­جەلەرگە, مىسالى, وتاندىق جانە حالىقارالىق عىلىمي باسىلىمداردا جانە دەرەكتەر بازاسىندا يندەكستەلەتىن ماقالالارعا يە بو­لا الادى. كانديداتتاردىڭ جالپى جۇمىس ءوتىلى تاڭدالعان مامانداندىرۋ سالاسىندا كەمىندە 12 ايدى قۇراۋعا ءتيىس. سونداي-اق ۆ1 دەڭگەيىنەن كەم ەمەس ناتيجەمەن مەملەكەتتىك ءتىل بويىنشا IELTS ناتيجەسىمەن شەت ءتىلى بويىنشا ەمتيحان تاپسىرۋ تۋرالى سەرتيفيكات (9.0-دەن كەمىندە 5.0) مىندەتتى تۇردە بولۋى كەرەك.

عىلىمي تاعىلىمدامادان ءوتۋ ءۇشىن ۇسىنىلاتىن ۋنيۆەر­سيتەت­تەردىڭ, عىلىمي ورتالىقتاردىڭ, جەتەكشى شەتەلدىك ۇيىمداردىڭ تىزبەسىنە الەمنىڭ 34 ەلىنەن QS World University Rankings, Academic Rankings of World Universities, Times Higher Education World توپ-250 حالىقارالىق اكادەميالىق رەيتينگىنە كىرەتىن 400-دەن استام جوعارى وقۋ ورنى, عىلىمي-زەرت­تەۋ ورتالىقتارى, ۇيىمدار كىردى. عىلىمي تاعىلىمدامادان وتۋگە عىلىمي زەرتتەۋلەردىڭ باسىم باعىتتارىنىڭ ءتىزىمى 134 ما­ماندىقتان تۇرادى. باسىم ما­ماندىقتار ينجەنەرلىك, جارا­تى­­لىستانۋ, الەۋمەتتىك جانە گۋما­نيتارلىق عىلىمدار سالاسىنداعى, سونداي-اق اقپاراتتىق-كوممۋ­ني­كاتسيالىق تەحنولوگيالار, مەديتسينا, ونەر, ءبىلىم, اگروونەركاسىپتىك كەشەن, ۇلتتىق قاۋىپسىزدىك جانە قور­عانىس سالالارىنداعى زەرتتەۋ­لەر سياقتى باعىتتارعا بولىنگەن.

تولىق اقپاراتتى حالىقارالىق باعدارلامالار ورتالىعىنان بىلۋگە بولادى (استانا قالاسى, سى­عا­ناق كوشەسى, 70-ءۇي, «سىعاناق» بيز­نەس ورتالىعى, 5-قابات, 508-كابينەت).