عىلىم جانە جوعارى ءبىلىم مينيسترلىگى «ادامي كاپيتال – ەل ەكونوميكاسى ءوسۋىنىڭ نەگىزى» اتتى فورۋم اياسىندا عىلىم, جوعارى ءبىلىم, ءتىل ساياساتى بويىنشا سەكتسيالار وتكىزىلدى.
ء«تىل ساياساتىنىڭ وزەكتى ماسەلەلەرى» اتتى سەكتسيانىڭ جۇمىسىنا پارلامەنت دەپۋتاتتارى, مەملەكەت جانە قوعام قايراتكەرلەرى, وڭىرلەردىڭ تىلدەردى دامىتۋ سالاسىنا جاۋاپتى باسقارمالارىنىڭ باسشىلارى, بەلگىلى عالىمدار, ءتىل جاناشىرلارى, سونداي-اق ۇكىمەتتىك ەمەس ۇيىمداردىڭ وكىلدەرى قاتىستى.
القالى جيىندى اشقان ۆيتسە-مينيستر تالعات ەشەنقۇلوۆ مەملەكەتتىك ءتىلدىڭ قولدانىس اياسىن كەڭەيتۋ جانە ونىڭ قوعامدىق قاتىناستاردىڭ بارلىق سالاسىنداعى ءرولىن كۇشەيتۋ باعىتىندا جۇيەلى ءىس-شارالار جۇزەگە اسىرىلىپ جاتقانىن اتاپ ءوتتى.
– اسىرەسە ءتىل ساياساتىن ءتيىمدى ىسكە اسىرۋعا باعىتتالعان كەشەندى جۇمىستاردى مەملەكەتتىك ورگاندارمەن, عالىمدارمەن, قوعام بەلسەندىلەرىمەن جانە ءتىل جاناشىرلارىمەن بىرلەسىپ اتقاراتىن بولامىز, – دەدى ول.
ەلىمىزدە ءتىل ساياساتىن دامىتۋدىڭ 2023-2029 جىلدارعا ارنالعان تۇجىرىمداماسىنىڭ جوباسىندا اتقارىلار جۇمىستىڭ ءبارى جان-جاقتى تالدانىپ, ايقىن كورىنىس تاپقان. قۇجاتتىڭ عىلىمي سارالانىپ, ەلىمىزدىڭ ناقتى قارجىلىق مۇمكىندىكتەرىنە نەگىزدەلگەنىن جيىنعا قاتىسۋشىلار اتاپ ءوتتى. وسى تاقىرىپتا بايانداما جاساعان ءتىل ساياساتى كوميتەتىنىڭ توراعاسى, بەلگىلى عالىم ەربول تىلەشوۆ جوبانىڭ ءار تاراۋىنا جەكە-جەكە توقتالىپ ءوتتى. ەڭ باستىسى, جوبا رەسمي تالقىلاۋعا تۇسكەن ساتتەن باستاپ وڭىرلەردە, جوعارى وقۋ ورىندارىندا عالىمدار, ءتىل جاناشىرلارى تالقىلاپ ءوز ۇسىنىس, پىكىرلەرىن ايتتى.
حالىقارالىق «قازاق ءتىلى» قوعامدىق بىرلەستىگىنىڭ پرەزيدەنتى راۋان كەنجەحان ۇلى ءتىل توڭىرەگىندەگى تۇيتكىلدى ماسەلەلەرگە توقتالىپ, مەكتەپتەگى قازاق ءتىلى مەن ادەبيەتى مۇعالىمىنىڭ بەدەلىن كوتەرۋ كەرەك دەگەن ويىمەن ءبولىستى.
ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ باس ديرەكتورى ماقپال جۇمابايدىڭ ايتۋىنشا, بۇگىنگى قۇندىلىقتاردىڭ ومىرشەڭدىگى تسيفرلاندىرۋ دەڭگەيىمەن ولشەنەدى. وسى كۇنگە دەيىن ورتالىق ازىرلەگەن 13 جوبانى زامان تالابىنا ساي جەتىلدىرۋ قاجەت. ءىت-جوبالاردىڭ جاساندى ينتەللەكتىنى مەملەكەتتىك تىلگە بەيىمدەۋگە ىقپالى زور. وسى باعىتتاعى جۇمىستار ءوز جالعاسىن تابادى.
پارلامەنت دەپۋتاتتارى بيبىگۇل جەكسەنباي, جاناربەك ءاشىمجان, جۇلدىز سۇلەيمەنوۆا, تاڭساۋلە سەرىكوۆ تالقىلاۋ بارىسىندا ەلىمىزدىڭ جوعارى وكىلەتتى ورگانىندا ءتىل ساياساتىن ىسكە اسىرۋ باعىتىندا اتقارىلىپ جاتقان جۇمىستارمەن تانىستىردى. سونداي-اق وسى باعىتتاعى باستامالاردى قولداۋعا ءازىر ەكەندەرىن ءبىلدىردى.
قوعام بەلسەندىسى ورازكۇل اسانعازى مەملەكەتتىك مەكەمەلەردىڭ قۇجات اينالىمىنداعى قازاق ءتىلىنىڭ ۇلەسى وسپەي وتىرعانىنا قىنجىلىس ءبىلدىردى. اسىرەسە كوشەدەگى جارنامالار مەن قىزمەت كورسەتۋ سالاسى قازاقشا «سويلەمەي» وتىرعانىن جەتكىزدى. قوعام قايراتكەرى ابدىجالەل باكىر ءتىلدىڭ زاڭدىق تۇعىرناماسى بولۋ كەرەكتىگىن باسا ايتتى. ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى انار فازىلجاننىڭ ناقتى ۇسىنىستارى دا كوپشىلىك كوڭىلىنەن شىقتى.
جەتىسۋ وبلىستىق تىلدەردى دامىتۋ جونىندەگى باسقارماسىنىڭ باسشىسى ەرمەك اقشاباەۆ, اقمولا وبلىستىق ىشكى ساياسات باسقارماسىنىڭ باسشىسى الماس الين, شىعىس قازاقستان وبلىستىق مادەنيەت باسقارماسىنىڭ باسشىسى نۇربولات احمەتجانوۆ, اقتوبە وبلىستىق تىلدەردى وقىتۋ ورتالىعىنىڭ ديرەكتورى كلارا سەرعازينا مەملەكەتتىك ءتىلدىڭ قولدانىس اياسىن كەڭەيتۋ باعىتىندا اتقارىلىپ جاتقان ناقتى ىستەر جونىندە باياندادى.
سونىمەن قاتار ورتاق ىستە كەدەرگى بولىپ وتىرعان جايتتار دا قوزعالدى. ماسەلەن, وبلىستىق ءتىل باسقارمالارىن وڭتايلاندىرۋ مەن ءتىل وقىتۋ ورتالىقتارىنداعى مامانداردىڭ تومەن جالاقىسى وزىندىك كەدەرگىسىن كەلتىرىپ وتىر. بۇل ءوز كەزەگىندە مامانداردىڭ تۇراقتى جۇمىس ىستەۋىنە مۇمكىندىك بەرمەيدى. جوعارىدا اتالعان ماسەلەلەردى شەشۋگە پارلامەنت دەپۋتاتتارى ءوز تاراپىنان كومەك بەرەتىنىن جەتكىزدى. فورۋمنىڭ ءتىل سالاسىنا ارنالعان سەكتسياسىندا تالقىلاعان ماسەلەلەر مەن قابىلدانعان قارار مەملەكەتتىك شەشىمدەرگە وڭ ىقپال ەتەدى دەپ سەنەمىز.