اتىراۋ وبلىسىنداعى كەنباي اۋىلىندا جالعىز وقۋشى ءبىلىم الادى. بيلىكتەگىلەر بالا سانى از مەكتەپكە قىرۋار قارجى جۇمساي المايتىندارىن ايتادى. ال مۇنداعى حالىق مەكتەپ جابىلسا اۋىل قۇريدى دەپ وتىر, دەپ حابارلايدى Egemen.kz كتك تەلەارناسىنا سىلتەمە جاساپ.
ءۇشىنشى سىنىپقا باراتىن بالاعا 5 مۇعالىم ساباق بەرەدى. اتالعان مەكەمەدە ودان بولەك 15 قىزمەتكەر جۇمىس ىستەيدى. جالعىز بالانى وقىتىپ كەلگەن مەكتەپ بيىل جابىلۋى مۇمكىن. بيلىكتەگىلەر مەكتەپكە قىرۋار قارجى جۇمساي المايتىندارىن ايتادى. بۇل شەشىمگە اۋىل حالقى تۇبەگەيلى قارسى بولىپ وتىر.
«مەن كۇيەۋىمنىڭ جالعىز ايلىعىنا كامەلەتكە تولماعان 4 بالامەن قالالىق جەردە تۇرا المايمىن. سول ءۇشىن وسى جەردە تۇرىپ جاتىرمىن. مەن اۋىلىم ءۇشىن, وسى جەر ءۇشىن شىرىلداپ تۇرمىن. سول ءۇشىن مەكتەپتى جاپپاۋلارىن تالاپ ەتەمىن. بالا جوق, بالا جوق دەيدى. بەر جاعىندا ءوسىپ كەلە جاتقان 10-نىڭ ۇستىندە بالا بار. مەكتەپ جوعالىپ كەتسە, ءبىزدىڭ اۋىل جوعالىپ كەتەدى», دەيدى اۋىل تۇرعىنى ايسارا ابەزباەۆا.
ءبۇتىن ءبىر اۋىلدى اسىراپ وتىرعان مەكتەپتى جاپپاۋدى سۇراعان كەنبايلىقتار جەرگىلىكتى بيلىك كەرىسىنشە ەلدى مەكەنگە كوڭىل بولۋلەرى كەرەك دەيدى. ولار ءوسىپ كەلە جاتقان بالالاردى قالاعا قاڭعىتا المايمىز دەپ وتىر.
شەنەۋنىكتەر بۇل مەكتەپتىڭ جوندەۋ جۇمىستارىنا وسىدان ءۇش جىل بۇرىن 30 ملن تەڭگە جۇمساپتى. وعان قوسا وسى اۋىلعا گاز جۇرگىزۋگە 2 ملرد تەڭگە تاعى بولىنگەن. قارايعان قارجى جۇمسالىپ جاتقان ەلدى مەكەن تۇرعىندارى تەنتىرەپ كەتۋدەن قورقادى. ال ءبىلىم باسقارماسى 1 بالا ءۇشىن 1 مەكەمە ۇستاپ وتىرۋدىڭ تيىمسىزدىگىن ايتادى.
«قارجىلىق باعىتىنان الىپ قاراعاندا, ءبىر بالاعا بىرنەشە پەرسونالدى ۇستاپ, ءبىر مەكتەپتى ۇستاپ تۇرۋ قيىندىق تۋدىرىپ وتىر. جالپى حالىقتىڭ ۇسىنىس پىكىرىن ەسكەرىپ, ءارى قاراي ماسەلەنى وڭ باعىتتا شەشۋ ءۇشىن تالاپ قويعالى وتىرمىز», دەدى وبلىستىق ءبىلىم بەرۋ باسقارماسى باسشىسىنىڭ ورىنباسارى ورىنتاي بيمانوۆا.